MNS-BJP : आगामी काळात मनसे-भाजप खरंच एकत्र येणार की छुपी युती साधणार?

नितीन गडकरी यांनी राज ठाकरे यांची भेट घेतली आणि त्यानंतर आता पुन्हा एकदा मनसे-भाजप युतीची चर्चा जोर धरु लागली आहे. त्यामुळे आगामी काळात खरंच मनसे-भाजप एकत्र येणार की छुपी युती साधणार हे पाहावं लागेल.

Nitin Gadkari Raj Thackeray

मुंबई : भाजपचे वरिष्ठ नेते आणि केंद्रीय मंत्री नितीन गडकरी यांनी मनसे प्रमुख राज ठाकरे यांची भेट घेतली आणि त्यानंतर भाजप-मनसे युतीच्या चर्चांना आता वेग आला आहे. आगामी महापालिका निवडणुका लक्षात घेता राज ठाकरे यांच्या घरी भाजपच्या नेत्यांच्या वाढत जाणाऱ्या भेटी नक्कीच आगामी काळातील युतीचे संकेत दर्शवत असल्याची राजकीय वर्तुळात चर्चा आहे

केंद्रीय मंत्री नितीन गडकरी यांच्यापूर्वी भाजपचे मुंबई अध्यक्ष मंगलप्रभात लोढा यांनी देखील 20 फेब्रुवारीला राज ठाकरेंची त्यांच्या शिवतीर्थ निवासस्थानी जाऊन भेट घेतली होती. लवकरच मुंबईसह राज्यातील अनेक बड्या महापालिकांच्या निवडणुका होत आहेत. यामध्ये मुंबईसह नाशिक, ठाणे, कल्याण डोंबिवली, पुणे महापालिकेतील मनसेचं प्राबल्य पाहता भाजपला याचा युतीचा फायदा होण्याची शक्यता दाट आहे.

मुंबईत मराठी मतं 36 टक्के आहेत. ती मिळवायीच असतील आणि शिवसेनेची पोकळी भरायची असेल तर नक्कीच मनसेची साथ भाजपला फायदेशीर ठरणारी आहे. शिवाय नाशिक भेटीत माध्यमांशी बोलताना मनसे आपली उत्तर भारतीयांबाबतची भूमिका बदलण्यास तयार असेल तर आगामी काळात चित्र वेगळं असेल, या चंद्रकांत पाटील यांच्या शंकेचं निरसन देखील राज ठाकरे यांनी आपल्या सभेतून केलेलं आहे. पंतप्रधान नरेंद्र मोदी यांचे आभार कारण त्यांनी मुंबईत येणारे लोंढे कमी करण्यासाठी उत्तरप्रदेश, बिहारमध्ये उद्योग उभारले, असं राज ठाकरे म्हणाले.

मनसेसोबतच्या युतीचा भाजपला कोणता फायदा? 

1) भाजपला मुंबईतील मराठी मतं मिळू शकतील

2) युती तुटल्यामुळे शिवसेनेची पोकळी भरण्यास भाजपला मदत

3) शिवसेनेच्या मतांची विभागणी होईल

4) शिवसेनेचं प्राबल्य असलेल्या भागात मनसेला भाजपची साथ मिळेल

आगामी काळात राज्यात पार पडत असलेल्या 12 महानगरपालिकांमध्ये भाजपचं एक हाती वर्चस्व असणाऱ्या महापालिकांची संख्या जास्त आहे. त्यामुळे याठिकाणी मनसेला सोबत घेऊन भाजपला फारसा फायदा होण्याची शक्यता कमी आहे. त्यामुळे केवळ मुंबई, ठाणे, कल्याण डोंबिवली महापालिकांसाठी छुप्या युतीचा पर्याय भाजप अवलंबण्याची शक्यता नाकरता येणार नाही.