राम कदमांच्या दहीहंडी उत्सवावर समन्वय समितीचा बहिष्कार

पुढच्या वर्षीपासून समन्वय समितीचे गोविंदा पथक आमदार राम कदम यांच्या दहीहंडी उत्सवात सहभागी होणार नाहीत. आधीच बेताल वक्तव्यामुळे अडचणीत आलेले राम कदम यांची दहीहंडी सुद्धा आता अडचणीत आली आहे.

मुंबई : बेताल वक्तव्यामुळे अडचणीत आलेल्या भाजप आमदार राम कदम यांचा दहीहंडी उत्सवही आता अडचणीत आला आहे. कारण थर रचलेल्या पथकाला खाली उतरण्यास सांगितल्याने नाराजी व्यक्त करत, दहीहंडी समन्वय समितीने राम कदमांच्या दहीहंडी उत्सवावर बहिष्कार टाकण्याचा निर्णय घेतला आहे. पुढच्या वर्षीपासून समन्वय समितीचे गोविंदा पथक आमदार राम कदम यांच्या दहीहंडी उत्सवात सहभागी होणार नाहीत. आधीच बेताल वक्तव्यामुळे अडचणीत आलेले राम कदम यांची दहीहंडी सुद्धा आता अडचणीत आली आहे. नेमकं काय प्रकरण आहे? अभिनेत्री प्राची देसाईच्या डायलॉगसाठी राम कदम या महाशयांनी हंडी फोडण्यासाठी सर्वात वरच्या थरावर पोहचलेल्या गोविंदांना पुन्हा खाली उतरवलं. मुंबईतील घाटकोपरमध्ये राम कदम यांनी आयोजित केलेल्या दहीहंडी उत्सवात हा प्रकार घडला. मालिका आणि चित्रपटांतून गाजलेली अभिनेत्री प्राची देसाईने राम कदमांच्या दहीहंडी उत्सवाला हजेरी लावली होती. प्राचीला एखादा संवाद म्हणण्याची फर्माईश यावेळी करण्यात आली. तिने माईक हातात घेतला आणि तुम्हाला बघून मला 'बोलबच्चन' चित्रपटातला एक डायलॉग आठवला, असं म्हणत डायलॉग म्हणायला सुरुवात केली. व्यासपीठावर डायलॉगबाजी आणि आगत-स्वागत सुरु असतानाच एक गोविंदा पथक दहीहंडी फोडण्यासाठी थर लावत होतं. योगायोगाने प्राचीने डायलॉग म्हणायला सुरुवात केली, त्याचवेळी त्या पथकाने जवळपास आठ थर रचत दहीहंडीपर्यंत मजल मारली होती. खरं तर, इतक्या मेहनतीने गोविंदा आठव्या थरावर पोहचले असताना प्राची देसाईला डायलॉग थांबवण्याची विनंती करणं सहज शक्य आणि व्यवहार्य होतं. किंबहुना ते अपेक्षित असताना राम कदमांनी उंचीवर गेलेल्या गोविंदांना थांबवलं. 'ए थांब थांब थांब.. फोडायची नाही. थांब. नितीन. त्याला खाली उतरव. खाली उतरव. फोडायची नाही. थांब, थांब, खाली उतरव. खाली उतरव. ए नितीन. मी सांगेन योग्य वेळेस. दोन मिनिटं थांब. खाली उतरा सगळे.' अशी दमबाजी राम कदमांनी करताच बिचारे गोविंदा निमूटपणे खाली उतरले. राम कदमांचा हा वायरल व्हिडिओ पाहून अनेकांनी आश्चर्याने तोंडात बोटं घातली आहेत. पाहा व्हिडीओ :