गिरगाव चौपाटीवर 'ब्लू बॉटल' जेलीफीशचा पाच जणांना दंश

गिरगाव चौपाटीवर ब्लू बॉटल जेलीफीशने पाच जणांना दंश केला आहे. जुहू आणि गिरगाव समुद्रकिनाऱ्यांवर गेल्या काही दिवसांपासून मोठ्या संख्येत विषारी ’ब्लू बॉटल’ जेलीफिश आढळत आहेत.

मुंबई : गिरगाव चौपाटीवर ब्लू बॉटल जेलीफीशने पाच जणांना दंश केला आहे. आज सायंकाळी काहीजण कुटुंबासह गिरगाव चौपटीवर फिरायला आले होते. त्यावेळी समुद्राच्या पाण्यात मजा मस्ती करताना यातील काही जणांना विषारी ब्लु बॉटल जेलिफिशने दंश केला आहे.

गिरगाव चौपाटीवर असलेल्या जीवरक्षकाने या पाच जणांवर प्रथमोचार करुन त्यांना नायर हॉस्पिटलला जाण्याचा सल्ला दिला. जुहू आणि गिरगाव समुद्रकिनाऱ्यांवर गेल्या काही दिवसांपासून मोठ्या संख्येत विषारी ’ब्लू बॉटल’ जेलीफिश आढळत आहेत.

ब्लू बॉटल जेलीफिश दंश करत असल्याने नागरिकांनी सतर्क राहून, उत्साहाच्या भरात समुद्रात उतरु नये. जेलीफिशच्या दोरीसारख्या पायांमध्ये विष असल्याने नागरिकांनी सुमद्रकिनाऱ्यावरुन अनवाणी फिरु नये, असे आवाहन अभ्यासकांकडून करण्यात येत आहे.

समुद्राच्या लाटांसोबत हे जेलीफिश हेलकावे घेतात. छत्रीच्या आकाराचे असणारे हे जेलीफिश दिसायला आकर्षक असतात, मात्र यातल्या काही प्रजाती विषारी आहेत. मुंबईच्या समुद्रात साधारणत: तीन प्रकारचे जेलीफिश आढळतात. पावसाळ्याआधी ‘ब्लू बटन’ नावाचे जेलीफिश समुद्रकिनारी येतात, तर पावसाळ्यात ‘ब्लू बॉटल’ आणि पावसाळ्यानंतर ‘बॉक्स’ जेलीफिश किनाऱ्यावर येतात. यातील ब्लू बॉटल जेलीफिश विषारी असतात.

‘ब्लू बॉटल’ जेलीफिशचे शरीर दोन इंच आकाराचे निळ्या रंगाचे फुग्यासारखे असते, तसेच सात इंच दोरीसारखे पाय असतात. ‘ब्लू बॉटल’ जेलीफिशने डंख केल्यास त्या ठिकाणी लाल रंगाचे व्रण उठून गाठ येते आणि असह्य वेदनाही होतात.