आशिष शेलार नवी मुंबई महापालिका निवडणूक प्रभारी, भाजपकडून जबाबदारीचे वाटप
भाजपने आगामी महापालिका निवडणुकीच्या जबाबदारीचे वाटप केले आहे. आशिष शेलार यांना नवी मुंबई महापालिका निवडणुकीसाठी प्रभारी म्हणून नेमण्यात आले आहे.
मुंबई : भाजपने नुकत्याच झालेल्या संघटनात्मक बैठकांमध्ये आगामी महानगरपालिका निवडणुकीच्या जबाबदारीचे वाटप केले आहे. आशिष शेलार यांना नवी मुंबई पालिका निवडणुकीसाठी प्रभारी म्हणून नेमले आहे. गणेश नाईक आणि मंदा म्हात्रे या दोघांमध्ये समतोल राखत पालिका निवडणुका जिंकून द्यायचे आव्हान आता आशिष शेलार यांच्यापुढे आहे. तर इतर महापालिका निवडणुकीसाठी मुख्य जबाबदारी आणि प्रभारी यांचे वाटप भाजपने निश्चित करत निवडणुकीच्या तयारीला सुरुवात केली आहे.
कोअर कमिटीच्या बैठकीत महापालिका निवडणुकीवर चर्चा मुंबईत मंगळवारी (5 जानेवारी) भाजप महाराष्ट्र कोअर कमिटीची बैठक पार पडली. या बैठकीत आगामी ग्रामपंचायत, महापालिका निवडणुकीची रणनीती ठरवण्यात आली. आगामी काही दिवसात नवी मुंबई, औरंगाबाद, कोल्हापूरसह पाच महापालिकांच्या निवडणुका होणार आहेत. त्या पार्श्वभूमीवर उमेदवार निवडण्यापासून ते निवडून येण्याची क्षमता असलेल्या इतर पक्षातील उमेदवारांना भाजपत प्रवेश देऊन त्यांना उमेदवारी देण्यावरही चर्चा झाली. बहुतांश महापालिकेत भाजपने स्वबळावर निवडणूक लढण्याची तयारी केली आहे. पण काही ठिकाणी शक्य असेल तर स्थानिक आघाडी करुन भाजप निवडणूक लढणार आहे.
मुंबई महापालिका निवडणुकीसाठी अतुल भातखळकर प्रभारी दरम्यान 2022 मध्ये होणाऱ्या मुंबई महापालिका निवडणुकीसाठी भाजपने कांदिवली पूर्व विधानसभा मतदारसंघाचे आमदार अतुल भातखळकर यांची प्रभारी म्हणून निवड केली होती. 18 नोव्हेंबर 2020 रोजी ही घोषणा झाली होती. शिवसेनेचा गड समजला जाणाऱ्या मुंबई महापालिकेवर सत्ता आणण्यासाठी भाजपने तयारी सुरु केली आहे. केवळ मुंबई महापालिकाच नाही तर आगामी सर्व महापालिकांमध्ये सत्ता मिळवण्यासाठी भाजपने कंबर कसली आहे. त्यादृष्टीने पक्षाने संघटनात्मक बैठकांमध्ये जबाबदारीचं वाटप केलं आहे.
भाजपमध्ये जबाबदारीचं वाटप
1. नवी मुंबई महापालिका निवडणूक प्रमुख -गणेश नाईक निवडणूक सहप्रमुख - मंदा म्हात्रे निवडणूक संघटनात्मक प्रमुख - संजय उपाध्याय निवडणूक प्रभारी - आशिष शेलार
2. कल्याण डोंबिवली महापालिका निवडणूक प्रमुख - रवी चव्हाण निवडणूक प्रभारी - संजय केळकर.
3.औरंगाबाद महापालिका निवडणूक निवडणूक प्रमुख - अतुल सावे निवडणूक प्रभारी - गिरीश महाजन निवडणूक संघटनात्मक जबाबदारी - संभाजी पाटील निलंगेकर.
4. कोल्हापूर महापालिका निवडणूक निवडणूक प्रमुख - धनंजय महाडिक आणि महेश जाधव. निवडणूक प्रभारी - शेखर इनामदार, रणजित सिंह निंबाळकर
5. वसई-विरार महापालिका निवडणूक निवडणूक प्रभारी - प्रसाद लाड निवडणूक सहप्रभारी - जयप्रकाश ठाकूर, भरत राजपूत
महत्त्वाच्या बातम्या
ट्रेंडिंग न्यूज
