Latur News: लातूरमध्ये ओबीसी आंदोलकाने जीवन संपवलं, छगन भुजबळ, धनंजय मुंडे सांत्वनाला घरी पोहोचले, गावकऱ्यांची प्रचंड गर्दी
Latur News: मंत्री छगन भुजबळ यांनी ओबीसी बांधव भरत महादेव कराड यांच्या लातूरच्या वांगदरी गावात जाऊन आत्महत्याग्रस्त कुटुंबीयांची भेट घेऊन सांत्वन केलंय. यावेळी धनंजय मुंडे देखील उपस्थित होते.
Latur News: राज्य शासनाने हैदराबाद गॅझेट लागू केल्यामुळे ओबीसींचे आरक्षण संपवले आहे. आता ओबीसींच्या आरक्षणाचं कसं? अशी चिंता व्यक्त करीत लातूर जिल्ह्यातील रेणापूर तालुक्यातील वांगदरी येथील भरत महादेव कराड या 35 वर्षीय ओबीसी बांधवाने नदीत उडी मारून आत्महत्या केली. हि दुर्दैवी घटना लातूर (Latur) जिल्ह्याच्या रेणापूर तालुक्यातील वांगदरी गावात घडलीय. ओबीसी आरक्षण (OBC Reservation) संपुष्टात येत असल्याच्या निषेधार्थ त्याने मांजरा नदीपात्रात उडी मारुन आपली जीवन यात्रा संपवली आहे.
दरम्यान, या दुर्दैवी घटनेची माहिती मिळताच राज्याचे अन्न, नागरी पुरवठा व ग्राहक संरक्षण मंत्री छगन भुजबळ (Chhagan bhujbal) यांनी दुःख व्यक्त करत आज (शुक्रवार 12 सप्टेंबर 2025) तातडीने लातूरच्या वांगदरी गावात जाऊन आत्महत्याग्रस्त कुटुंबीयांची भेट घेऊन सांत्वन केलंय. मंत्री छगन भुजबळ यांच्या सोबत यावेळी धनंजय मुंडे हे देखील उपस्थित होते. यावेळी गावकऱ्यांची मोठी गर्दी बघायला मिळाली. तर कराड कुटुंबियांनी अश्रूचा बांध फोडल्याने उपस्थित साऱ्याचे मन गहिवरून आल्याचे चित्र बघायला मिळाले आहे.
भरत कराड याने आरक्षण टिकवण्यासाठी लढा दिलाय-छगन भूजबळ
आम्ही आज का आलो हे सांगायला नको. आमचा भरत कराड प्रत्येक ओबीसी लढ्यात हजर रहायचा. एक ध्यास त्याने घेतला होता. आमचं ओबीसी आरक्षण कमी होता कामा नये. आज कित्येक भरत कराड सारखे आपल्या प्राणाचे बलिदान देत आरक्षणासाठी लढत आहे.
भरत कराड याने आरक्षण टिकवण्यासाठी लढा दिलाय. सरकारने मराठा आरक्षण देखील 10 टक्के दिलंय. मात्र आता ते म्हणतात आम्हाला ओबीसीतूनच आरक्षण द्या. पण आमच्याकडे 17 टक्के आरक्षण शिल्लक राहिल आहे. अशात देशातील सर्वात मोठ्या कोर्टाने सांगून देखील ते ऐकायला तयार नाही. जे खरं कुणबी असतील तर त्यांना द्या. शिंदे कमिटीने लाखो कागद तपासले. कुणबी प्रमाणपत्र दिले आम्ही शांत बसलो. आम्ही काय पाप केलं? लहान समाजात जन्म झाला हे पाप आहे का? आम्ही शिक्षण घ्यायचं नाही का? असा प्रश्न या वेळी मंत्री छगन भूजबळ यांनी उपस्थित करत टीका केलीय
आम्ही हे बलिदान व्यर्थ जावू देणार नाही, पूर्ण ताकतीने लढू- छगन भुजबळ
ओबीसी महामंडळाला पाच कोटी देण्यात आले. हा काय न्याय आहे? आमच्या लोकात बोलण्याची हिंमत नाही. भरत कराड हा आरक्षण गेले म्हणून ओरडत गेला. आम्ही हे बलिदान व्यर्थ जावू देणार नाही, पूर्ण ताकतीने लढू. आता सुद्धा लढायच आहे. पण आत्महत्या करू नका. तुम्ही लढण्याचा जिद्दीने पुढे या. लोकशाही मार्गाने पुढे जाऊ. राज्यात लोकशाही नाही का? बाबासाहेब आंबेडकरांचा कायदा नाही का? कोर्ट नाही का? रोज वेगळी घोषणा करून दहशत, दादागिरी का करताय? वर्षभरापूर्वी बीडमध्ये जाळपोळ करण्यात आली. या पुढे आपापसातील मतभेद विसरून जा. भरत कराडबद्दल प्रेम असेल तर शपथ घ्या. अठरापगड जातीने एकजूट तोडू द्यायची नाही. आम्ही लढू.. अनेक वर्षांनी मिळालेले आरक्षण निश्चित टीकवल्याशिवाय राहणार नाही. असा निर्धारही मंत्री छगन भुजबळ यांनी यावेळी केला आहे.
रिक्षा चालवूनच उदरनिर्वाह, कुटुंबीयांचा आधार गेला
भरत कराड हे रिक्षाचालक होते. रिक्षा चालवूनच ते उदरनिर्वाह करत होते. ओबीसी आरक्षण बचाव आंदोलनातही ते गेल्या काही वर्षांपासून सक्रियपणे सहभागी झाले होते. सरकारने मराठा समाजाला हैद्राबाद गॅझेट लागू करून ‘कुणबी’ म्हणून ओबीसी आरक्षणात सामील करण्याचा निर्णय घेतल्यामुळे ओबीसींचे आरक्षण संपुष्टात येईल, या निषेधार्थ त्यांनी हे टोकाचे पाऊल उचलल्याचे सांगण्यात येत आहे.
हेही वाचा
महत्त्वाच्या बातम्या
