Nanded : विजेच्या धक्क्याने वीज वितरण कर्मचाऱ्याचा मृत्यू; मृतदेह बराच वेळ खांबावर लोंबकळत

नांदेडच्या देगलूर तालुक्यातील शहापूर इथे विजेच्या धक्क्याने वीज वितरणच्या कर्मचाऱ्याचा दुर्दैवी मृत्यूविजेच्या धक्क्याने मृत्युमुखी पडलेल्या वीज कर्मचाऱ्याचा मृतदेह बराच वेळ खांबावर लोंबकळत

Nanded Mahavitaran

नांदेड : नांदेड जिल्ह्याच्या देगलूर तालुक्यातील शहापूर इथे वीज वितरण कर्मचाऱ्याचा विजेच्या धक्क्याने दुर्दैवी मृत्यू झाल्याची घटना घडली आहे. वीज पुरवठा सुरळीत करण्यासाठी विजेच्या खांबावर चढून काम करत असताना हा अपघात घडला. ज्ञानेश्वर ताटे असं या वीज वितरण कर्मचाऱ्याचं नाव आहे. या अपघातानंतर बराच वेळ ज्ञानेश्वर ताटे यांचा मृतदेह खांबावर लोंबकळत होता.

वरिष्ठ तंत्रज्ञ असणारे ज्ञानेश्वर ताटे विजेच्या खांबावर काम करत होते, परंतु अचानक वीज प्रवाह सुरु झाल्याने शॉक लागून त्यांचा दुर्दैवी मृत्यू झाला. हे काम करत असताना यासाठी फोन परमिट घेण्यात आलं होतं. तरीही वीज प्रवाह कसा सुरु झाला, याचं नेमकं कारण काय? याची चौकशी होणं गरजेचं आहे. मृत्यू झाल्यानंतर त्या घटनेची दखल घेऊन मृतदेह खांबावरून खाली घेणं गरजेचं होतं. पण या अपघातानंतर बराच वेळ ज्ञानेश्वर ताटे यांचा मृतदेह  खांबावर लोंबकळत होता. त्यामुळे वीज वितरण विभागाचा असंवेदनशीलपणा दिसून येतो.

दोन महिन्यातील दुसरी घटना
वीज कर्मचाऱ्याचा विजेच्या धक्क्याने मृत्यू होण्याची ही दोन महिन्यातली दुसरी घटना आहे. याआधी 3 फेब्रुवारी रोजी वीज पुरवठा करणाऱ्या डीपीवर काम करण्यासाठी गेलेल्या वीज कर्मचाऱ्याचा शॉक लागून जागीच मृत्यू झाल्याची घटना घडली होती. 3 फेब्रुवारी रोजी हदगाव तालुक्यातील मौजे रावणगाव शिवारात ही घटना घडली. अवधूत नागोराव शेट्टे (वय 50 वर्षे)असं या मृत वीज कर्मचाऱ्याचं नाव आहे. 

रत्नागिरीत इलेक्ट्रिक पोलवर काम करताना विजेचा धक्का, वायरमनचा मृत्यू
काही दिवसांपूर्वी रत्नागिरी जिल्ह्यातही अशीच घटना घडली होती. इलेक्ट्रिक पोलवर काम करत असताना विजेचा धक्का लागून प्रकाश बाबू गमरे या 52 वर्षीय वायरमनचा मृत्यू झाला होता. राजापूर तालुक्यात ओणी कोंडीवळे इथे हा प्रकार घडला होता. मुंबई-गोवा महामार्गावर ओणी इथे पेट्रोल पंपाच्या समोरील महावितरणच्या डीपीवर दुरुस्तीचं काम करत असताना ही घटना घडली. धक्कादायक म्हणजे जळालेल्या अवस्थेत त्याचा मृतदेह डीपीला लटकत होता.