Ganesh Naik : गणेश नाईक यांना सत्र न्यायलयाचा धक्का; दोन्ही गुन्ह्यात अटकपूर्व जामीन फेटाळला

Ganesh Naik : भाजप आमदार गणेश नाईक यांच्या अडचणीत वाढ झाली असून ठाणे सत्र न्यायालयाने त्यांचा अटकपूर्व जामीन अर्ज फेटाळून लावला आहे.

Ganesh Naik : गणेश नाईक यांना सत्र न्यायलयाचा धक्का; दोन्ही गुन्ह्यात अटकपूर्व जामीन फेटाळला

Ganesh Naik : भाजप नेते आमदार गणेश नाईक यांच्यासमोरील अडचणीत वाढ झाली आहे. ठाणे सत्र न्यायलयाने गणेश नाईक यांनी दाखल केलेला अटकपूर्व जामीन अर्ज फेटाळला आहे. गणेश नाईक यांच्याविरोधात बेलापूर आणि नेरूळ येथील पोलीस ठाण्यात बलात्कार आणि जीवे मारण्याची धमकी दिल्याचा गुन्हा दाखल करण्यात आला आहे. अटकेच्या कारवाईपासून वाचण्यासाठी गणेश नाईक यांनी सत्र न्यायालयात अटकपूर्व जामीन अर्ज दाखल केला होता. 

महिलेवर अत्याचार केल्याप्रकरणी तसेच धमकविल्या प्रकरणी अटकपूर्व जामीनासाठी भाजप आमदार गणेश नाईक यांनी ठाणे न्यायालयात अर्ज केला होता. याप्रकरणी बुधवारी न्यायमूर्ती एन.के. ब्रम्हे यांच्यासमोर सुनावणी होणार होती. मात्र या प्रकरणात दोन्ही बाजूच्या वकिलांचा युक्तिवाद ऐकल्यानंतर आज सत्र न्यायलयाने निकाल सुनावला. 

गणेश नाईक यांच्याविरोधात दाखल असलेल्या दोन्ही गुन्ह्यातील तपास अधिकाऱ्यांनी गणेश नाईक यांच्या कोठडीची मागणी केली होती. नेरूळ पोलिसांनी बलात्कार प्रकरणामध्ये नाईक यांची मेडिकल करणे गरजेचे आहे, यासाठी कोठडी पाहिजे अशी मागणी केली. तर बेलापूर पोलीस तपास अधिकाऱ्यांनी धमकावण्यात आलेल्या गुन्ह्यात शस्त्र जप्त करायचे आहे, म्हणून त्यांची कोठडी पाहिजे असे सांगितले. त्यामुळे जामीन देवू नका अशी विनंती कोर्टाला करण्यात आली. तर नाईक यांच्या वकिलांनी सर्व संमतीने झाले आहे, त्यामुळे याला बलात्कार मानू नये असा युक्तिवाद केला होता.

फिर्यादीवर बलात्कार होत होता, मनाविरुद्ध सबंध ठेवला जात होता असा धक्कादायक खुलासा महिलेच्या वकिलांनी केला. तसेच सध्या दोन वेळा नातेवाईकांमार्फ़त फिर्यादी यांना गुन्हा मागे घेण्यासाठी धमकी देण्यात आलीय, त्याची तक्रार पोलिस ठाण्यात दाखल आहे, असे पीडित महिलेच्या वकीलांनी सांगितले. 

काय आहे प्रकरण?

भाजप नेते गणेश नाईक यांच्यावर बलात्काराचा गुन्हा दाखल झाला आहे. दीपा चौहान यांनी त्यांच्यावर बलात्काराचा आरोप केला आहे. याबाबत बोलताना दीपा चौहान म्हणाल्या की, गणेश नाईक यांच्यासोबत गेल्या 27 वर्षापासून आपण लिव्ह-इन रिलेशनशिप'मध्ये राहत असून त्यांच्यासोबतच्या संबंधातून 15 वर्षाचा मुलगा झाला आहे. गणेश नाईक यांनी आपल्या मुलाला वडिलांचे नाव द्यावे आणि त्याची जबाबदारी घ्यावी अशी मागणी त्यांनी केली.