Sushma Andhare : सुषमा अंधारेंचं राज ठाकरेंना खोचक पत्र; विचारले थेट सहा प्रश्न अन् केली राज ठाकरेंची कोंडी
खारघरमध्ये झालेल्या दुर्घटनेवरुन आरोप-प्रत्यारोप सुरू आहे. त्यातच मनसे अध्यक्ष राज ठाकरेंनी केलेल्या विधानावरुन शिवसेना ठाकरे गटाच्या नेत्या सुषमा अंधारे यांनी चांगलाच समाचार घेतला आहे.
Sushma Andhare : खारघारमध्ये झालेल्या दुर्घटनेवरुन वादावादी सुरु आहे. त्यातच मनसे अध्यक्ष राज ठाकरेंनी केलेल्या विधानावरुन शिवसेना नेत्या सुषमा अंधारे (Sushma Andhare) यांनी चांगलाच समाचार घेतला आहे. राज ठाकरे (Raj Thackeray) यांना अंधारे यांनी पत्र लिहिलं आहे. 'कोरोनाच्या काळातही अनेक प्रकारचे हलगर्जीपणा झालेला आहे. तिथेही सदोष मनुष्यवधाचा गुन्हा आजही भरला जाऊ शकतो. त्यामुळे याचं राजकारण करू नये. आयोजकांनी सकाळची वेळ घ्यायची नव्हती. हा एक अपघात आहे. या अपघाताचं काय राजकारण करायचं?, असं राज ठाकरे म्हणाले होते. त्यावरच आता सुषमा अंधारे यांनी पात्रातून टीका केली आहे.
या पत्रात सुषमा अंधारे यांनी सहा मुद्दे मांडले आहेत. त्यात कोरोना, महाराष्ट्र भुषण, आप्पासाहेब धर्माधिकारी या अनेक मुद्दांवर त्यांनी भाष्य केलं आहे. त्यासोबतच सरकारला त्यांनी काही प्रश्नदेखील विचारले आहेत.
सुषमा अंधारेंनी पत्रात मांडलेले मुद्दे
मुद्दा क्रमांक एक :
कोरोना महामारी ही उद्धव ठाकरे निर्मित नाही तर निसर्गनिर्मित होती हे आपल्याला ज्ञात असेलच. पण खारघर मध्ये घडलेली दुर्घटना ही मानवनिर्मित आहे कृपया याची नोंद घ्यावी.
मुद्दा क्रमांक दोन :
भारतरत्न सारखा पुरस्कार एका हॉलमध्ये दिला जातो आणि त्याचे प्रक्षेपण जगभर केले जाते. तर महाराष्ट्र भूषण पुरस्कारासाठी एवढ्या मोठ्या गर्दी आणि सभेची गरज होती काय? गर्दीचे प्रशासकीय नियोजन का केले गेले नव्हते?
मुद्दा क्रमांक तीन :
श्री आप्पासाहेब धर्माधिकारी यांच्या लोकप्रियतेचा फायदा घेत मुळात ही गर्दीच राजकीय हेतूने प्रेरित होऊन शिंदे फडणवीस सरकारने एकत्रित करण्याचा प्रयत्न केला. तर याचे राजकारण करू नका असे म्हणणे कितपत संयुक्तिक ठरते.
मुद्दा क्रमांक चार :
कोरोना काळात मुख्यमंत्री निधीला सहाय्यता देण्याच्या ऐवजी खासगी पीएम केअर फंडमध्ये निधी द्या असे म्हणणारे देवेंद्र फडणवीस यांचे कोरोना काळात राजकारण करत नव्हते का?
मुद्दा क्रमांक पाच :
गर्दी टाळणे हाच मोठा उपाय असताना सुद्धा मंदिरे उघडलेच गेले पाहिजेत यासाठी सुपारीबाज लोकांना पुढे करून करून राज्यातली एकूण व्यवस्था अस्थिर करण्याचा प्रयत्न करणारे भाजपाई नेते राजकारण करत नव्हते का?
मुद्दा क्रमांक सहा :
सर्व धर्मीय प्रार्थना स्थळे बंद असताना, जशी मंदिरे बंद होती, वारी बंद होती तशी आंबेडकर जयंती सुद्धा साजरी झालीच नव्हती. पण मंदिरेच कशी बंद राहिली अशी आवई उठवत जाणीवपूर्वक मुख्यमंत्री आणि आरोग्य मंत्री यांना एवढ्या गंभीर काळामध्ये सहकार्य करायचे सोडून त्यांच्या कामात अडथळे आणण्याचे प्रयत्न करणारे भाजप नेते राजकारण करत नव्हते का ?
असू द्या दादा मी आपल्याला फार अडचणीत आणणारे प्रश्न विचारणार नाही. पण ज्याचं जळतं त्यालाच कळतं. आपल्या पक्षातल्या देशपांडे नावाच्या एका कार्यकर्त्याला साधे खरचटलेही नव्हते तरी सुद्धा आपण काय तातडीने रुग्णालयाकडे धाव घेतली. बापरे, आपली ती शून्यात हरवलेली नजर माध्यमे वारंवार दाखवत होते. दादा, खारघरच्या दुर्घटनेनंतर मृतांच्या नातेवाईकाला आपण असेच धावतपळत भेटायला गेलात का नाही?
शेवटचा मुद्दा:
कोरोना काळामध्ये माजी मुख्यमंत्री उद्धव ठाकरे यांनी केलेल्या कामाची दखल फक्त भारतात नाही तर जगभरात घेतली गेली. आंतरराष्ट्रीय न्यायालय आणि दस्तूर खुद्द पंतप्रधान मोदीजींनी सुद्धा श्री उद्धव ठाकरे यांच्या कोरोना कामगिरीचे कौतुक केले. “धारावी पॅटर्न” तर जगभर गाजला. या उलट कोरोना काळात उत्तर प्रदेशमध्ये मात्र गंगा नदीवर प्रेतं तरंगलेली उभ्या जगाने पाहिली. प्रेतांची विल्हेवाट व्यवस्थित न लावल्यामुळे कोरोनाचा फैलाव उत्तर प्रदेशमध्ये अधिक प्रमाणात झाला. हा हलगर्जीपणा करणाऱ्या मुख्यमंत्री योगी आदित्यनाथ यांच्यावर सदोष मनुष्यवधाचा गुन्हा दाखल करण्याच्या संदर्भात आपण काही सुतोवाच करणार आहात का?
महत्त्वाच्या बातम्या
