Shivsena VBA Alliance: बाळासाहेबांच्या जयंतीच्या मुहूर्तावर शिवशक्ती-भीमशक्ती नवा पॅटर्न, आज शिवसेना-वंचित युतीची घोषणा
Prakash Ambedkar: शिवसेनाप्रमुख बाळासाहेब ठाकरे यांच्या जयंतीचा मुहूर्त साधून आज शिवसेना आणि वंचित बहुजन आघाडीच्या युतीची घोषणा केली जाणार आहे.
मुंबई: राज्याच्या राजकीय पटावर आता शिवशक्ती आणि भीमशक्तीच्या युतीचा नवा पॅटर्न (Shivsena VBA Alliance) आकारास येणार आहे. शिवसेना आणि वंचित बहुजन आघाडीची आज युती होणार असल्याची घोषणा करण्यात येणार आहे. तसे स्पष्ट संकेत शिवसेनेच्या वतीनं आणि वंचितच्या प्रकाश आंबेडकरांच्याकडून देण्यात आले आहेत. आज दुपारी 1 वाजता यासंबंधित एक पत्रकार परिषद होणार आहे.
शिवसेनाप्रमुख बाळासाहेब ठाकरे यांच्या जयंतीच्या निमित्ताने शिवसेनेच्या वतीनं आज राज्यात अनेक कार्यक्रमांचे आयोजन केलं आहे. हाच मुहूर्त साधून शिवसेना आणि वंचित बहुजन आघाडीच्या युतीची घोषणा केली जाणार आहे. तर दुसरीकडे आज विधीमंडळामध्ये राज्य सरकारच्या वतीनं बाळासाहेब ठाकरे यांच्या तैलचित्राचं अनावरण करण्यात येणार आहे.
आमचं मनातून सगळं ठरलं आहे, आता फक्त घोषणा बाकी असल्याचं शिवसेना नेते सुभाष देसाई म्हणाले. तर माझी युती ही फक्त शिवसेनेसोबत असेल, महाविकास आघाडीमधील इतर दोन सहकारी काँग्रेस आणि राष्ट्रवादीबद्दल काय ठरवायचं ते नंतर पाहू असं वक्तव्य वंचितचे नेते प्रकाश आंबेडकर यांनी केलं आहे.
महाविकास आघाडी विस्तारणार?
वंचितचे नेते प्रकाश आंबेडकर म्हणाले की, "वंचित आणि शिवसेना युतीवर शिवसेनेकडून घोषणा होऊ शकते. यावर अजूनही दोन्हीकडून चर्चा सुरू आहे. उद्धव ठाकरे यांनी या युतीमध्ये राष्ट्रवादी आणि काँग्रेसला सोबत घेतलं पाहिजे असं मत मांडलं होतं. आम्ही काँग्रेस- राष्ट्रवादीसोबतही जायला तयार आहोत. याआधी काँग्रेस-राष्ट्रवादीने आम्हाला नाकारलं आहे. सध्या वंचित आणि शिवसेना युती होईल. माझी युती ही शिवसेनेसोबत असेल. काँग्रेस आणि राष्ट्रवादीचे नंतर पाहून घेऊ."
कोणत्याही क्षणी शिवशक्ती-भीमशक्ती युतीच्या घोषणेची शक्यता आहे असं वक्तव्य शिवसेना नेते आणि विधानपरिषद विरोधी पक्षनेते अंबादास दानवे यांनी रविवारी केलं होतं. युतीबाबत अंतिम निर्णय घेण्याचे अधिकार उद्धव ठाकरे यांच्याकडे असून या युतीमध्ये काँग्रेस आणि राष्ट्रवादीलाही सहभागी करून घेण्याचे प्रयत्न सुरू असल्याचंही अंबादास दानवे म्हणाले.
भाजपची प्रतिक्रिया
शिवसेना आणि वंचित युतीबाबत प्रतिक्रिया देताना भाजप नेते सुधीर मुनगंटीवार म्हणाले की, "प्रकाश आंबेडकर यांनी कोणासोबत जावं हा त्यांच्या पक्षाचा प्रश्न आहे, पण त्यांनी एक लक्षात ठेवावं की बाबासाहेब आंबेडकर हे काँग्रेस विरोधी होते, पंडित नेहरू यांनी स्वतःच स्वतःला भारतरत्न दिला, पण काँग्रेसने संविधान निर्माता असलेल्या बाबासाहेबांना कधी भारतरत्न दिला नाही. एवढंच काय तर त्यांना कधी लोकसभेतही जाऊ दिलं नाही. त्यामुळे प्रकाश आंबेडकर जरी काँग्रेससोबत गेले तरी बाबासाहेबांच्या अनुयायांना हे कधीच आवडणार नाही."
महत्त्वाच्या बातम्या
