एक्स्प्लोर

Sanjay Raut : सोमय्या हा #*@#, महाराष्ट्राला लागलेली कीड; संजय राऊतांचा पलटवार

Sanjay Raut on Kirit Somaiya : किरीट सोमय्या यांना संजय राऊत यांनी प्रत्युत्तर दिले आहे. राऊत यांनी आरोपांऐवजी पुरावे सादर करावे असे म्हटले होते.

Written By : एबीपी माझा वेब टीम | Edited By: श्रीकांत भोसले | Updated at : 06 Apr 2022 10:15 AM (IST)

Sanjay Raut on Kirit Somaiya : शिवसेना नेते खासदार संजय राऊत यांनी किरीट सोमय्यांवर जोरदार पलटवार केला. किरीट सोमय्या यांनी संजय राऊतांच्या आरोपांवर उत्तर देताना आयएनएस विक्रांत घोटाळ्याबाबत पुरावे सादर करण्याची मागणी केली. त्याला प्रत्युत्तर देताना राऊत यांनी राजभवनाच्या पत्रापेक्षा आणखी मोठा पुरावा कोणता असू शकतो, असा सवाल केला. सोमय्या ही महाराष्ट्राला लागलेली कीड असून ही कीड संपवणार असल्याचेही राऊतांनी म्हटले.

सोमय्या महाराष्ट्राला लागलेली कीड

किरीट सोमय्या ही महाराष्ट्राला लागलेली कीड आहे. ही कीड संजय राऊत, शिवसेना संपवणार असल्याचेही राऊत यांनी म्हटले. सोमय्या यांनी सातत्याने महाराष्ट्रविरोधी भूमिका घेतली आहे. महाराष्ट्र सरकारला बदनाम करण्यासाठी सोमय्याकडून प्रयत्न सुरू असल्याचेही राऊत यांनी म्हटले. सोमय्यांवर टीका करताना संजय राऊत यांची जीभ घसरली.

'कश्मीर फाइल्स' नंतर आता 'विक्रांत फाइल्स'ही पाहा

'कश्मीर फाइल्स' चित्रपट पाहून झाला असेल तर आता पंतप्रधान नरेंद्र मोदी, गृहमंत्री अमित शाह यांच्यासह भाजप नेत्यांनी आता 'आयएनएस विक्रांत फाइल्स' पाहावी असा टोला शिवसेना नेते खासदार संजय राऊत यांनी दिले. सोमय्या यांनी जमा केलेला निधी हडपला आहे. हा देशद्रोह असल्याचे राऊत यांनी म्हटले.

आयएनएस विक्रांतच्या नावावर जमा केलेल्या निधीत घोटाळा झाला आहे. सोमय्या आणि भाजप नेत्यांनी देशभावनेशी खेळ केला असल्याचे राऊत यांनी म्हटले. देशद्रोहाचा गुन्हा दाखल करून सोमय्याला अटक करायला हवी असेही राऊत यांनी म्हटले. सोमय्याने गरिबांकडून पैसे गोळा केले आणि घोटाळा केला असल्याचा घणाघात राऊत यांनी केला. विक्रांतच्या नावाखाली निधी जमवून घोटाळा करणे हा 1971 मधील सैनिकांच्या बलिदानाच्या रक्ताचा लीलाव असल्याचेही राऊत यांनी म्हटले. भाजपला याचे उत्तर द्यावे लागणार असल्याचे त्यांनी म्हटले.