दोन्ही राष्ट्रवादी एकत्र येणार का? प्रफुल्ल पटेल म्हणाले, महत्त्वाचे निर्णय हे प्रेस समोर घ्यायचे नसतात
ज्या दिवसापासून राष्ट्रवादी वेगळी झाली त्या दिवसांपासून अनेकवेळा दोन्ही राष्ट्रवादी एकत्र येणार असल्याच्या चर्चा सुरु आहेत. याबाबत प्रफुल्ल पटेल यांनी महत्वाचं वक्तव्य केलं आहे.
Praful Patel : ज्या दिवसापासून राष्ट्रवादी वेगळी झाली त्या दिवसांपासून अनेकवेळा दोन्ही राष्ट्रवादी एकत्र येणार असल्याच्या चर्चा सुरु आहेत. मात्र, शरद पवार (Sharad pawar) यांनी राष्ट्रवादीचे दोन्ही गट एकत्र येण्यावरुन सुप्रिया सुळे या निर्णय घेतील अशी प्रतिक्रिया दिली आहे. त्यानंतर पुन्हा एकदा राष्ट्रवादीचे दोन्ही गट एकत्र येणार असल्याची चर्चा सुरु झाली आहे. अशातच राष्ट्रवादी काँग्रेस अजित पवार गटाचे कार्याध्यक्ष प्रफुल्ल पटेल (Praful Patel) यांना देखील सूचक वक्तव्य केलं आहे. असे महत्त्वाचे निर्णय हे प्रेस समोर घ्यायचे नसतात, अशी सूचक प्रतिक्रिया पटेलांनी दिली आहे.
देशामध्ये सध्या महत्त्वाच्या विषय सुरु आहे. पाकिस्तान आणि भारतामध्ये तणावाची स्थिती आहे अशा वेळेस आम्ही राष्ट्रवादी एकत्रित करण्याच्या मुद्द्यावर चर्चा करणे योग्य होणार नाही. हा मुद्दा महत्त्वाचा नसून सध्या देशहितासाठी देशात एकत्र येणं आम्हाला महत्त्वाचं असल्याचे प्रफुल्ल पटेल म्हणाले.
चिल्लर माणसाला उत्तर देणं योग्य वाटत नाही, प्रफुल्ल पटेलांचा संजय राऊतांना टोला
चिल्लर माणसाला आणि चिल्लर राजकारण करणाऱ्यांना उत्तर देणे योग्य वाटत नाही असे म्हणत प्रफुल्ल पटेल यांनी शिवसेना ठाकरे गटाचे खासदार संजय राऊत यांना टोला लगावला. पाकिस्तान सोबतच्या युद्धामध्ये माघार का घेतली असा सवाल संजय राऊत यांनी केला होता. यावर प्रफुल पटेल यांना विचारले असता ते म्हणाले की, भारत पाकिस्तान युद्धामध्ये आपण कितपत नोंद घ्यावी ही महत्वाची गोष्ट आहे. म्हणून ज्यांना स्वतःला काही माहित नाही आंतरराष्ट्रीय राजकारण काय आहे. देशाचं भलं कश्यामध्ये आहे, त्यांना माहीत नसेल. अशा चिल्लर लोकांबद्दल आणि चिल्लर राजकारण करणाऱ्यांबद्दल उत्तर देणं मला योग्य वाटत नाही असा टोला प्रफुल्ल पटेल यांनी संजय राऊतांना लगावला.
जुलै 2023 मध्ये अजित पवारांनी भाजपसोबत जाण्याचा निर्णय घेतला होता
उपमुख्यमंत्री अजित पवार यांनी जुलै 2023 मध्ये खासदार शरद पवारांच्या भूमिकेशी फारकत घेऊन भाजपसोबत जाण्याचा निर्णय घेतला. त्यानंतर ओरिजनल राष्ट्रवादी काँग्रेस पक्ष (Nationalist Congress Party) कोणाचा यावरुन दोन्ही नेते न्यायालयातही गेले आहेत. लोकसभेची आणि विधानसभेची निवडणूक देखील दोन्ही पक्षांनी एकमेकांच्या विरोधात लढली होती. त्यानंतर दोन्ही गटाच्या नेत्यांच्या ऐकमेकांशी गाठी भेटी देखील सुरु होत्या. विविध कार्यक्रमांच्या निमित्ताने शरद पवार आणि अजित पवार एकत्र आल्याचं देखील पाहायला मिळालं होतं. अशातच शरद पवार यांनी दोन्ही राष्ट्रवादी एकत्र येण्यासंदर्भात केलेल्या वक्तव्यावरुन विविध चर्चा रंगू लागल्या आहेत.
काय म्हणाले होते शरद पवार?
शरद पवारांच्या वक्तव्यानं भूवया उंचावल्या आहेत. भविष्यात दोन्ही राष्ट्रवादी एकत्र आल्यास आश्चर्य वाटणार नाही, असं शरद पवार यांनी म्हटलं आहे. दरम्यान, इंडियन एक्सप्रेसला दिलेल्या मुलाखतीत शरद पवार म्हणाले, संसदेत विरोधी बाकांवर बसावं की नाही? हा निर्णय सुप्रियानं घ्यावा. सुप्रिया सुळेंचं काय? या प्रश्नावर शरद पवारांनी उत्तर दिलं आहे. पक्षात दोन प्रवाह आहेत, एकाला वाटते अजितसोबत जावे. दुसरा प्रवाह भाजपपासून दूर राहावे या मताचा आहे, असंही शरद पवार यांनी स्पष्ट केलं. भविष्यात एकत्र यायचं की नाही? हे राष्ट्रवादीच्या नव्या पिढीतील नेतृत्वाने ठरवावे. मी आता त्या निर्णय प्रक्रियेतून काहीसा बाजूला झालोय...आमची मंडळी विविध पक्षात विभागली असली तरी विचाराने एकत्र आहेत. आमचे दिल्लीतील खासदारही एकाच विचाराने बांधले गेलेले आहेत. होय, राज्यातील आमच्या काही आमदारांना असं वाटतं मतदारसंघातली विकासकामं करून घेण्यासाठी अजित पवारांसोबत गेलं पाहिजे, पण याबाबतचा निर्णय हा मी देणार नाही, त्यांनी तो निर्णय एकत्र बसून घ्यावा. एकत्र येण्यासंदर्भात सुप्रिया आणि अजितने बसून ठरवावं. पक्ष उभा करताना आज बाजूला गेलेलं सगळे एकत्र होते त्यांच्या सगळ्यांची विचारधारा एकचं आहे. त्यामुळे भविष्यात जर हे सगळे एकत्र आले तर मला आश्चर्य वाटणार नाही. माझे सगळे खासदार एक मताचे आहेत, असे शरद पवार म्हणाले.
महत्वाच्या बातम्या:
शरद पवार मोठे नेते, त्यांच्या अनुभवाचा सरकारला फायदा होईल, शिवसेना शिंदे गटाच्या मंत्र्याचं मोठं वक्तव्य
महत्त्वाच्या बातम्या
