'प्रवाशांच्या सोयीसाठी'.... प्रत्येक एसटी बसमध्ये आगारप्रमुख, विभागप्रमुखांचे नंबर झळकणार

'प्रवाशांच्या सेवेसाठी' असं ब्रीदवाक्य असलेलं एसटी महामंडळ प्रवाशांच्या सेवेसाठी अनेक उपक्रम राबवत असतं. आता प्रवाशांच्या तक्रारी अथवा समस्यांचे तातडीने निरसन एसटी बसमध्ये आगारप्रमुख, विभागप्रमुखांचे नंबर झळकणार आहेत. तसे निर्देश मंत्र्यांनी दिले आहेत.

मुंबई : प्रवाशांच्या तक्रारी अथवा समस्यांचे तातडीने निरसन करण्याच्या उद्देशाने एसटी महामंडळाच्या प्रत्येक बसमध्ये, ती बस ज्या आगाराची आहे, त्या आगार प्रमुखांचा दूरध्वनी क्रमांक, भ्रमणध्वनी क्रमांक तसेच त्या विभाग प्रमुखांचा दूरध्वनी क्रमांक, भ्रमणध्वनी क्रमांक ठळकपणे प्रदर्शित करावे, असे निर्देश परिवहन मंत्री तथा एसटी महामंडळाचे अध्यक्ष ॲड. अनिल परब यांनी एसटी प्रशासनाला दिले आहेत. मंत्र्यांच्या या निर्णयामुळे प्रवाशांनी समाधान व्यक्त केलं आहे.

परिवहन मंत्री ॲड. अनिल परब म्हणाले की, दररोज एसटीने सुमारे 67 लाख प्रवासी प्रवास करतात. सुरक्षित प्रवासाबरोबरच प्रवाशांना सौजन्यशील सेवा देणे हे एसटी महामंडळाचे प्रमुख ध्येय आहे. एसटीच्या प्रवाशांना प्रवासामध्ये काही समस्या उद्भवल्यास अथवा प्रवासी सेवेबाबत काही सूचना द्यावयाची असल्यास सध्या त्यांना संपर्क करण्यास अडचणी येत आहेत. सेवा क्षेत्रामध्ये काम करीत असताना 'ग्राहकाचे महत्तम समाधान' हेच ‍अंतिम उद्दिष्ट्य असले पाहिजे, असं परब यांनी म्हटलं आहे.

परब म्हणाले की, ग्राहकाच्या तक्रारी,समस्या आणि सूचनांचे निराकरण त्या-त्या पातळीवर तातडीने होणे आवश्यक आहे. यासाठी संबंधीत आगार व्यवस्थापक आणि विभाग नियंत्रक यांनी आपले उत्तरदायित्व ओळखून प्रत्येक प्रवाशाच्या तक्रारी अथवा समस्यांना सकारात्मक प्रतिसाद देणे गरजेचे आहे. प्रवासी सेवांचा दर्जा उंचावणे आणि अधिकाधिक प्रवाशांना आपल्याकडे आकर्षित करण्यासाठी चालक-वाहकांच्या बरोबरच अधिकाऱ्यांनी देखील प्रवाशांच्या समस्या जाणून त्याचे तातडीने निरसन करणे महत्वाचे आहे,असे ही ते म्हणाले. एसटी बसमध्ये आगार प्रमुख आणि विभाग प्रमुखांचा दूरध्वनी क्रमांक प्रदर्शित करण्याबाबतचे परिपत्रक लवकरच निर्गमित करण्यात येत असल्याचं एसटी प्रशासनाने म्हटलं आहे.