Maharashtra Rain LIVE Update | अतिवृष्टीमुळे पश्चिम महाराष्ट्राला मोठा फटका

Maharashtra Rain LIVE Update | राज्यभरातील, प्रत्येक शहरातील, गावा खेड्यातील पावसासंदर्भातील सर्व अपडेट्स एका क्लिकवर... राज्यातील अनेक भागांत पावसाने धुमाकूळ घातला आहे. पुणे-सोलापूर हायवेवर पावसामुळे ट्रॅफिक जॅम (Traffic on Pune Solapur Highway) झालं आहे. तर पुण्यातही सकाळी पावसाने उसंत घेतली तरी रात्रभर पावसामुळे अनेक भागांत पाणी साचलं. साचलेल्या पाण्यामुळे पुण्यातही अनेक ठिकाणी वाहतूक ठप्प झाली आहे. तसेच अनेक भागांत ट्रॅफिक जॅम (Pune traffic Update) झालं आहे. याशिवाय इंदापूर (Indapur), पंढरपूर (Pandharpur), सांगली (Sangali) या भागांतही मुसळधार पाऊस कोसळत आहे.

Background

Maharashtra Rain LIVE Update | पुढील चार  दिवस महाराष्ट्रात सर्वदूर पावसाची शक्यता असून, काही ठिकाणी मुसळधार ते अति मुसळधार पावसाचा अंदाज हवामान खात्याने (आयएमडी) वर्तवला आहे. बंगालच्या उपसागरात तयार झालेले तीव्र कमी दाबाचे क्षेत्र पुढील तीन दिवसांत महाराष्ट्रावरून सरकत 16 ऑक्टोबरच्या सकाळी अरबी समुद्रात प्रवेश करण्याचा अंदाज आहे.

आयएमडीच्या माहितीनुसार, बंगालच्या उपसागरात तयार झालेल्या अतितीव्र कमी दाबाच्या क्षेत्राने मंगळवारी सकाळी आंध्र प्रदेशची किनारपट्टी ओलांडली. हे क्षेत्र पश्चिम दिशेला सरकत असून, 14 आणि 15 तारखेला महाराष्ट्रावरून त्याचा प्रवास होईल. 16 तारखेच्या सकाळी कमी दाबाच्या क्षेत्राचे अवशेष उत्तर कोकण आणि गुजरात किनारपट्टीजवळ अरबी समुद्रात प्रवेश करण्याची शक्यता आहे. त्यानंतर कमी दाबाच्या क्षेत्राची तीव्रता पुन्हा वाढण्याची शक्यता आहे.

मध्य महाराष्ट्र आणि मराठवाड्यात 14 तारखेला काही ठिकाणी अतिवृष्टीची शक्यता असून, 15 आणि 16 तारखेला मुंबईसह कोकणात अनेक ठिकाणी मुसळधार पाऊस होईल, असा अंदाज आयएमडीने वर्तवला आहे. गेला आठवडाभर राज्यात झालेल्या परतीच्या पावसाने शेतकऱ्यांचे मोठे नुकसान झाले आहे. कापणीच्या काळात राज्यात मोठा पाऊस येण्याची शक्यता असल्यामुळे शेतकऱ्यांमध्ये चिंतेचे वातावरण आहे.

पुण्यात मुसळधार पाऊस, पावसामुळे अनेक भागांमध्ये पाणी साचायला सुरुवात

पुण्यात पावसाने जोरदार हजेरी लावत अक्षरश: धुमाकूळ घातला आहे. अनेक रस्ते, नाले पाण्याखाली गेले आहेत. संध्याकाळपासून पावसाने झोडपून काढले आहे. पुण्यातील पावसाचा जोर काही वेळात कमी होईल असा अंदाज वेधशाळेने दिला आहे. तोपर्यंत  पुणेकरांना आजची संपूर्ण रात्र जागून काढावी लागण्याची शक्यता दिसत आहे.

पुण्यात मुसळधार पाऊस आणि अनेक भागातील वीज गायब झाली आहे. पाषाण, कर्वे नगर या भागातील वीज गायब आहे तर बिबवेवाडी परिसरात अनेक सोसायट्यांमध्ये पाणी शिरले आहे. मुसळधार पावसाच्या अंदाजानुसार पुण्याच्या जिल्हाधिकाऱ्यांनी उद्या माझे कुटुंब माझो जबाबदारी मोहिमेअंतर्गत गृह सर्वेक्षण स्थगित केले आहे. तसेच पुणे -सोलापुर हायवे पावसामुळे बंद केला आहे. उजनी धरणाचे पाणी भिगवण, डाळज, पळसदेव, इंदापूर येथे हायवेवर आल्याने पुण्यातुन सोलापुरकडे जाणारी वाहतुक लोणी काळभोर येथे थांबवली आहे. कोणीही सोलापुर दिशेने प्रवास करू नये असे आवाहन करण्यात आले आहे. उजनी धरणाचे 42 दरवाजे उघडले आहेत.

पुण्याप्रमाणेच पिंपरी चिंचवड शहरात मुसळधार पाऊस कोसळतोय. गेल्या तीन तासापासून पावसाची संततधार सुरूच. मावळ तालुक्यात ही पाऊस बरसतोय. रात्रभर पावसाने जोर सुरूच ठेवला तर पवना धरणातून कधीही पाण्याचा विसर्ग केला जाऊ शकतोय. त्यामुळं पवना नदी लगतच्या नागरिकांना सतर्कतेचा इशारा देण्यात आला आहे.

दरम्यान, राज्यातील अनेक भागांत पावसाने धुमाकूळ घातला आहे. पुणे-सोलापूर हायवेवर पावसामुळे ट्रॅफिक जॅम (Traffic on Pune Solapur Highway) झालं आहे. तर पुण्यातही सकाळी पावसाने उसंत घेतली तरी रात्रभर पावसामुळे अनेक भागांत पाणी साचलं. साचलेल्या पाण्यामुळे पुण्यातही अनेक ठिकाणी वाहतूक ठप्प झाली आहे. तसेच अनेक भागांत ट्रॅफिक जॅम (Pune traffic Update) झालं आहे. याशिवाय इंदापूर (Indapur), पंढरपूर (Pandharpur), सांगली (Sangali) या भागांतही मुसळधार पाऊस कोसळत आहे. 

15:26 PM (IST)  •  16 Oct 2020

अतिवृष्टीमुळे पश्चिम महाराष्ट्राला मोठा फटका; राज्यात पावसामुळे 28 जणांचा मृत्यू झाल असून एक जण बेपत्ता आहे. पुणे, सातारा, सांगली, सोलापूर, कोल्हापूर या पाच जिल्ह्यांमध्ये 57 हजार 354 हेक्टरवरील पिकांचे नुकसान झालंय. ऊस, सोयाबीन, भात कापूस, तूर, भाजीपाला, डाळिंब या पिकांचे मोठे नुकसान झालं आहे. या पाच जिल्ह्यांमध्ये 2319 घराची पडझड झाली आहे, सगळ्यात जास्त फटका सोलापूर जिल्ह्याला बसला आहे. सोलापुरात 34 हजार 788 हेक्टर वरील पिकांचे नुकसान झाले तर 1716 घरांची पडझड झाली आहे. 513 लहान मोठ्या जनावरांचा मृत्यू झालाय.

11:09 AM (IST)  •  16 Oct 2020

खासदार सुप्रिया सुळे यांनी पूरग्रस्तांच्या मदतीबाबत भाष्य केलंय. त्या म्हणाल्या, अतिवृष्टीग्रस्ताच्या केंद्रीय मदतीसाठी पंतप्रधानाकडे प्रयत्न करू, पुण्यातील पुरास कारणीभूत ठरलेल्या अंबिल ओढ्याची वर्क ऑर्डर दोन दिवसात काढणार, लवकरच हा विषय मार्गी लागणार , पुण्यामध्ये गेल्या दोन वर्षात पूर परस्थिती निर्माण होतेय आणि त्यामुळे याला आम्ही जबाबदार असल्याच्या आरोपात तथ्य नाही , सुरक्षा भिंत दोन वर्षांपूर्वी पडली आणि अजूनही त्याच काम पूर्ण झालं नाही तर यामध्ये २५ वर्षाचा हिशोब होऊ शकतो असा प्रतिप्रश्न महापौराना विचारालाय,टीका करावी पण काम ही करावे, चंद्रकांत पाटील यांनी ज्या भागात कृषी विधेयक साठी रॅली काढली त्याच भागात त्यांच्या विचाराचा साखर कारखाना बंद आहे. पवार कुटूंबियावर टीका केल्याशिवाय हेडलाईन्स होत नाहीत, कोणीही यावं आणि मनमोकळ करावं आम्ही दिलदार आहोत, एकनाथ खडसे प्रवेशाबाबत राष्ट्रवादी प्रदेशाध्यक्ष जयंत पाटील यांना विचारा, असं सुप्रिया सुळे म्हणाल्या.

20:02 PM (IST)  •  15 Oct 2020

सांगली जिल्ह्यातील पावसाचा ओसरलेला जोर आणि कोयना धरणातून कमी करण्यात आलेला विसर्ग यामुळे कृष्णा नदीचे पाणी पातळी 35 फुटावर स्थिरावली आहे. काल रात्री कृष्णा नदीचे पाणी पातळी 36 फुटाच्या वर गेली होती यामुळे आज सकाळपर्यंत कृष्णा नदी 40 फुटाची इशारा पातळी ओलांडून अशी शक्यता व्यक्त केली जात होती . मात्र पावसाचा जोर ओसरला आणि कोयना धरणातून विसर्ग कमी केल्याने आता कृष्णा नदीचे पाणी पातळी 36 फुटावरून हळूहळू कमी होऊ लागली आहे. यामुळे कृष्णा नदीकाठच्या नागरिकांना मोठा दिलासा मिळाला आहे. असं असलं तरी अजूनही ढगाळ वातावरण कायम असून पावसाची दाट शक्यता आहे. तरी नागरिकांनी सतर्क राहावे असे प्रशासनाकडून कळविण्यात आले आहे.

20:01 PM (IST)  •  15 Oct 2020

सांगली : जिल्ह्यात परतीच्या पावसात पूर्व भागातील नद्याच्या पुलावरून आतापर्यंत 9 जण वाहून गेले आहेत.यातील 6 जणांचे मृतदेह सापडले तर 3 जणांचा शोध सुरु आहे. तर महापालिका क्षेत्रातील 300 हुन अधिक लोकांचे स्थलांतर काल करण्यात आले होते.

22:36 PM (IST)  •  14 Oct 2020

सोलापूर : मोहोळ तालुक्यात सीना आणि भोगावती नदी दुथडी भरून वाहत आहे. त्यामुळे तालुक्यात पूर परिस्थिती निर्माण झाली आहे. काल रात्री पासून अनेकांना पोलिसांनी स्थलांतरित केलं आहे. नदी काठच्या गावात जिथे लोक अडकलेली आहेत त्यांना बाहेर काढण्यासाठी प्रशासन प्रयत्न करत असल्याची माहिती पोलिसांतर्फे देण्यात आली आहे.