Maharashtra Breaking News 08 September 2022 : मुंबई पुणे एक्सप्रेस मार्गावर बोरघाटात कंटेनर ट्रेलरचा अपघात, एकाचा मृत्यू
Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...
LIVE
Background
ब्रेकिंग न्यूज कधी पूर्वसूचना देऊन येत नाहीत.. हे खरं असलं तरी..पण आज दिवसभरात घडणाऱ्या काही पूर्वनियोजित घटना,कार्यक्रम असतातच.. त्याचाच दिवसभरात विस्तार होतो. त्या घटना-घडामोडींची पार्श्वभूमी-पूर्वपिठिका हाताशी असल्यावर या घटना-घडामोडी समजून घेणं सोपं होतं. आज दिवसभरातल्या कोणत्या महत्वाच्या बातम्यांवर आमचं लक्ष असेल किंवा महत्वाच्या घडामोडी आम्ही तुमच्यापर्यंत सविस्तर पोहोचवू याची ही थोडक्यात उजळणी... या नियोजित-घटना कार्यक्रमांसोबतच आयत्यावेळी येणाऱ्या घडामोडीही आम्ही तुमच्यापर्यंत पोहोचवू.
शिवसेना खासदार संजय राऊत यांच्या जामीनावर आज सुनावणीची शक्यता
शिवसेना खासदार संजय राऊत यांनी जामीनासाठी मुंबई सत्र न्यायालयातील विशेष पीएमएलए कोर्टात अर्ज दाखल केला आहे. यावर आज सुनावणी होण्याची शक्यता आहे. संजय राऊत सध्या आर्थर रोड कारागृहात न्यायालयीन कोठडीत आहेत. ईडीनं संजय राऊत यांना गोरेगाव पत्राचाळ प्रकरणी मनी लाँड्रींगच्या आरोपांत केली आहे.
पंतप्रधान नरेंद्र मोदींच्या हस्ते 'कर्तव्य पथा' चे उद्‌घाटन
पंतप्रधान नरेंद्र मोदी आज, 8 सप्टेंबर 2022 रोजी संध्याकाळी 7 वाजता 'कर्तव्य पथा' चे उद्‌घाटन करणार आहेत. सत्तेचे प्रतीक असलेले पूर्वीचे राजपथ हे आता कर्तव्य पथाकडे अर्थात जनतेची मालकी आणि त्यांच्या सशक्तीकरणाचे प्रतिक म्हणून बदलले जाणार आहे. याप्रसंगी इंडिया गेटवरील नेताजी सुभाषचंद्र बोस यांच्या पुतळ्याचेही पंतप्रधानांच्या हस्ते अनावरण होणार आहे.
योगी आदित्यनाथ दोन दिवसांच्या वाराणसी दौऱ्यावर
मुख्यमंत्री योगी आदित्यनाथ उद्यापासून दोन दिवसाच्या वाराणसी दौऱ्यावर जाणार आहेत. सायंकाळी योगी आदित्यनाथ बीएचयू मध्ये पाहणी करणार आहेत. येथील अधिकाऱ्यांसोबत चर्चा करतील. संपूर्णानंद स्पोर्ट्स स्टेडियम आणि भुल्लनपुर पीएसी येथे तयार होणाऱ्या बॅरेकचीही ते पाहणी करणार आहे. त्यानंतर श्रीकाशी विश्वनाथ मंदिरात दर्शन घेणार आहेत.
काँग्रेसच्या कन्याकुमारी ते काश्मीर यात्रेला सुरुवात
कॉंग्रेसच्या 'भारत जोडो' या यात्रेला आज सुरुवात झाली आहे. आज राहुल गांधी यांच्या अध्यक्षतेखाली सकाळी सात वाजता पदयात्रेची सुरुवात करण्यात येणार आहे. यात्रा सुरू करण्यासाठी राहुल गांधींकडे तिरंगा सोपवण्यात आला आहे. कन्याकुमारी ते काश्मीर असं 3500 किमी अंतर ही यात्रा असणार आहे. आतापर्यंतची ही देशातील सर्वात मोठी यात्रा असणार असल्याचं म्हटलं जात आहे. देशाला एकत्र करणं हा या यात्रेचा मुख्य उद्देश असून बेरोजगारी, महागाई अशा मुद्द्यांवर लोकांसोबत जोडलं जाण्याचा प्रयत्न या यात्रेच्या माध्ममातून होणार आहे.
BCCI आणि राज्य क्रिकेट संघातील वादावर सुप्रीम कोर्टात सुनावणी
BCCI आणि राज्य क्रिकेट संघातील वादावर सुप्रीम कोर्टात आज सुनावणी होणार आहे. बीसीसीआयकडून दाखल करण्यात आलेल्या याचिकेवर आज सुनावणी होणार आहे. बीसीसीआयनं आपल्या नियमात बदल करण्याची परवानगी मागितली आहे. कोर्टाकडून बीसीसीआयला परवानगी मिळाल्यास बीसीसीआय अध्यक्ष सौरव गांगुली आणि सचिव जय शाह यांचा कार्यकाळ वाढू शकतो.
दिल्ली दौरा आटोपून नितीशकुमार बिहारमध्ये परतणार
बिहारचे मुख्यमंत्री नितीशकुमार आज पटनासाठी रवाना होणार आहेत. ते चार दिवसांपासून दिल्ली दौऱ्यावर होते. सकाळी साडेअकरा वाजता नितीशकुमार बिहारसाठी रवाना होणार आहेत. आज दिल्लीमध्ये त्यांचा कोणत्याही नेत्याशी भेटण्याचा प्लॅन नाही. बुधवारी नितीशकुमार यांनी राष्ट्रवादीचे अध्यक्ष शरद पवार यांची भेट घेतली आहे.
भारत आणि अफगाणिस्तान यांच्यात लढत
आशिया चषकात आज भारत आणि अफगाणिस्तान यांच्यामध्ये लढत होणार आहे. दोन्ही संघाचं स्पर्धेतील आव्हान संपुष्टात आले आहे. दोन्ही संघाला श्रीलंका आणि पाकिस्तान यांच्याकडून पराभवाचा सामना करावा लागला होता. आजचा सामना जिंकून शेवट गोड करण्याचा दोन्ही संघाचा प्रयत्न असेल.
Nagpur Breaking : गणेशोत्सव मंडळात दर्शनासाठी गेलेल्या वृद्धेचा वीजेचा शॉक लागून मृत्यू
नागपूरः शहरातील भेंडे लेआउट परिसरात एका सार्वजनिक गणेशोत्सव मंडळ मध्ये दर्शनासाठी गेलेल्या 80 वर्षीय वृद्ध महिलेचा विजेचा शॉक लागून मृत्यू झाला आहे. कमलाबाई रेवडे असे मृत महिलेचे नाव आहे. पोलिसांनी या प्रकरणी आकस्मिक मृत्यूची नोंद केली आहे.
रायगड येथील पेण येथे पतीकडून पत्नीची हत्या
रायगड येथील पेण येथे पतीने पत्नीची हत्या केली आहे. पत्नीच्या डोक्यात सिलेंडर मारून हत्या केल्या करण्यात आलीय. या प्रकणी संशयित आरोपी संजय दळवी याला पोलिसांनी अटक केली आहे.
Mumbai- Pune Express Way Accident : मुंबई पुणे एक्सप्रेस मार्गावर बोरघाटात कंटेनर ट्रेलरचा अपघात, एकाचा मृत्यू
Mumbai- Pune Express Way Accident : मुंबई पुणे एक्सप्रेस मार्गावर बोरघाटात कंटेनर ट्रेलरचा अपघात झाला आहे. मुंबईकडे येणाऱ्या मार्गावर कंटेनर ट्रेलर आणि कारचा अपघात झाला आहे. या अपघातात 24 वर्षीय परशुराम आंधळे याचा मृत्यू झाला आहे. तीव्र उतारावर कंटेनरचा ब्रेक फेल झाल्याने ट्रेलर चालकाचा ताबा सुटल्याने अपघात झाल्याची माहिती समोर आली आहे
अमरावती शिवसेना जिल्हाप्रमुख राजेश वानखडे यांचा भाजप प्रवेश
अमरावती शिवसेना जिल्हाप्रमुख राजेश वानखडे यांनी भाजपमध्ये प्रवेश केलाय. भाजप प्रदेशाध्यक्ष चंद्रशेखर बावनकुळे यांच्या उपस्थितीत नागपूरमध्ये राजेश वानखडे यांनी भाजपमध्ये कार्यकर्त्यांसह प्रवेश केलाय.
दहिसर नदीत गणेश विसर्जनाला हायकोर्टाची मनाई
दहिसर नदीत गणेश विसर्जनाला हायकोर्टाने मनाई केलीय. संजय गांधी राष्ट्रीय उद्यानात पर्यावरण संवर्धनाच्या मुद्यावर हायकोर्टाने निर्देश दिले आहेत. दरम्यान, कुणालाही परवानगी दिलेली नसल्याची राज्य सरकारची माहिती.
महत्त्वाच्या बातम्या
ट्रेंडिंग न्यूज
