आग्र्यात छत्रपतींचे स्मारक तर मुंबईत अटल बिहारी वाजपेयींचे स्मारक, राज्यात 10 मोठ्या स्मारकांची घोषणा, तरतूद किती?
Maharashtra Budget : छत्रपती संभाजी महाराजांचे संगमेश्वरमध्ये स्मारक उभारण्यात येणार आहे. तर मौजे वढु बुद्रुक येथील स्मारकाचे काम प्रगतीपथावर आहे.
Maharashtra Budget : राज्याच्या अर्थसंकल्पात अनेक मोठ्या घोषणा करण्यात आल्या. त्यामध्ये 10 मोठ्या स्मारकांच्या कामासाठी निधी देण्याची घोषणा अजित पवारांनी केली. आग्र्यामध्ये छत्रपती शिवाजी महाराज तर संगमेश्वरमध्ये छत्रपती संभाजी महाराजांच्या स्मारकाची घोषणा करण्यात आली. तर आधी काम सुरू असलेल्या काही स्मारकांसाठी निधी उपलब्ध करून देण्यात येणार आहे.
1. शिवाजी महाराजांचे आग्र्यामध्ये स्मारक
मुघलांच्या नजरकैदेतून आग्र्याहून सुटका हा शिवचरित्रातील प्रेरणादायी प्रसंग आहे. छत्रपती शिवाजी महाराज नजरकैदेत होते, तेथे भव्य स्मारक उभारण्याचे राज्य शासनाने ठरविले आहे. त्यासाठी उत्तर प्रदेश शासनाच्या सहकार्याने जागा उपलब्ध करुन घेण्यात येईल अशी घोषणा अजित पवारांनी केली.
2. संभाजी महाराजांचे संगमेश्वरात स्मारक
छत्रपती शिवरायांनी स्थापन केलेल्या स्वराज्याच्या रक्षण आणि विस्तारासाठी जीवन समर्पित केलेल्या, असीम शौर्य आणि धैर्याने लढलेल्या, सर्व लढायांत विजयश्री मिळविणाऱ्या छत्रपती संभाजी महाराजांच्या पराक्रमाच्या खुणा महाराष्ट्रात जिथे आहेत, त्यात कोकणातील संगमेश्वर हे एक प्रमुख ठिकाण आहे. औरंगजेबाच्या महाकाय सेनेशी महाराजांनी बोटावर मोजता येतील एवढ्या शूर मावळ्यांना सोबत घेऊन येथेच पराक्रमाची शर्थ केली. स्वराज्यासाठी प्राणांची आहुती देणाऱ्या स्वाभिमानी राजाच्या पराक्रमाची स्मृती कायमस्वरुपी जपण्यासाठी संगमेश्वर येथे त्यांचे भव्य स्मारक उभारण्यात येणार आहे.
3. तुळापूर आणि मौजे वढु बुद्रुक स्मारकाचे काम प्रगतीपथावर
छत्रपती संभाजी महाराजांचे पवित्र बलिदानस्थळ असलेल्या मौजे तुळापूर आणि समाधीस्थळ मौजे वढु बुद्रुक येथे त्यांच्या भव्य स्मारकाचे काम प्रगतीपथावर आहे. दरवर्षी एका प्रेरणादायी गीताला “छत्रपती संभाजी महाराज राज्य प्रेरणा गीत” पुरस्कार प्रदान करण्याचा निर्णयही शासनाने नुकताच घेतला आहे.
4. पानिपतमध्ये मराठा शौर्याचे स्मारक
स्वराज्यासाठी बलिदान देणाऱ्या लाखो मराठ्यांच्या शौर्याचे प्रतिक म्हणून हरियाणातील पानिपत येथे यथायोग्य स्मारक उभारण्याचा निर्णयही आम्ही घेतला आहे. हरियाणा शासनाच्या मदतीने या स्मारकासाठी जागा उपलब्ध करुन घेण्यात येईल.
5. चैत्यभूमी स्मारकाचे काम प्रगतीपथावर
चैत्यभूमी दादर, मुंबई येथे इंदू मिलच्या जागेवर भारतरत्न डॉ. बाबासाहेब आंबेडकर यांचे आंतरराष्ट्रीय दर्जाचे स्मारक उभारण्याचे काम सुरु असून त्यासाठी पुरेसा निधी उपलब्ध करुन देण्यात येत आहे.
6. मुंबईत अटल बिहारी वाजपेयींचे स्मारक
भारताचे दिवंगत पंतप्रधान भारतरत्न अटलबिहारी वाजपेयी यांच्या जन्मशताब्दी वर्षानिमित्त मुंबई येथे भव्य स्मारक उभारण्यात येणार आहे.
7. बाळासाहेब ठाकरेंच्या स्मारकासाठी निधी
स्वर्गीय बाळासाहेब ठाकरे राष्ट्रीय स्मारकाच्या पहिल्या टप्प्यातील काम पूर्ण झाले असून दुसऱ्या टप्प्यातील कामासाठी राज्य शासनाकडून 220 कोटी रुपयांचा निधी उपलब्ध करुन देण्यात आला आहे.
8. क्रांतीज्योती सावित्रीबाई फुलेंचे नायगावात स्मारक
आद्य शिक्षिका ज्ञानज्योती सावित्रीबाई फुले यांचे जन्मगाव असलेल्या नायगांव, तालुका खंडाळा, जिल्हा सातारा येथे त्यांच्या कार्यास साजेसे स्मारक व महिला प्रशिक्षण केंद्र उभारण्यात येणार आहे.
9. लहुजी साळवेंचे पुण्यात स्मारक
संगमवाडी, पुणे येथील वस्ताद लहुजी साळवे यांच्या स्मारकाचे काम प्रगतिपथावर आहे.
10. आण्णाभाऊ साठे यांचे सांगलीत स्मारक
साहित्यरत्न लोकशाहीर अण्णाभाऊ साठे यांचे जन्मस्थळ वाटेगांव, तालुका वाळवा, जिल्हा सांगली येथील स्मारकासाठी तसेच त्यांच्या नांवे प्रस्तावित चिरागनगर, मुंबई येथील संशोधन व प्रशिक्षण संस्थेसाठी पुरेसा निधी उपलब्ध करुन देण्यात येणार आहे.
ही बातमी वाचा:
महत्त्वाच्या बातम्या
