Lok Sabha Election : मतदान पार पडल्यानंतर मतदानाच्या टक्केवारीत वाढ? सोशल मीडियावरील व्हायरल पोस्टवरुन समनक पार्टीचा आक्षेप

Lok Sabha Election 2024 : यवतमाळ-वाशिम लोकसभा मतदारसंघात मतदानानंतर मतांच्या टक्केवारीत वाढ झाल्याची एक पोस्ट सोशल मीडियावर व्हायरल होते आहे. यावर समनक पार्टीने आता हरकत घेत तक्रार दिली आहे. 

( Image Source : Abp Majha, Reporter)

Yavatmal Washim Lok Sabha : अठराव्या लोकसभा निवडणुकांच्या (Lok Sabha Election 2024) दुसऱ्या टप्प्यातील मतदानाच्या रणधुमाळीची सांगता झालीय. विदर्भ आणि मराठवाड्यातील आठ मतदारसंघातील मतदारांचा कौल 26 एप्रिलला मतपेटीत बंद झाला आहे. तर अनेक दिग्गज नेत्यांचे भवितव्य आता 4 जूनला ठरणार आहे. अशातच काही ठिकाणी मतदानाच्या टक्केवारी वाढल्याचे चित्र आहे. तर काही ठिकाणी मतदार याद्यातील घोळ, मतदानाप्रती असलेली उदासीनता आणि उष्णतेची लाट इत्यादी कारणांमुळे काही ठिकाणी मतदान अपेक्षेप्रमाणे झालेले नाही.

असे असले तरी यवतमाळ-वाशिम (Yavatmal Washim) लोकसभा मतदारसंघात मतदानानंतर मतांच्या टक्केवारीत अचानक वाढ झाल्याची एक पोस्ट सोशल मीडियावर व्हायरल होते आहे. या व्हायरल पोस्ट मुळे नागरिक आणि राजकीय वातावरणात काहीसा संभ्रम निर्माण झाला आहे. असे असताना या वाढलेल्या मतदानाच्या टक्केवारीच्या अंदाजावर समनक पार्टीने हरकत घेत तक्रार दाखल केली आहे. 

व्हायरल पोस्टवरुन समनक पार्टीचा आक्षेप

यवतमाळ-वाशिम लोकसभा मतदारसंघाच्या निवडणुकीदरम्यान झालेल्या मतदानानंतर मतदान टक्केवारीत कालांतराने वाढ होतेच कशी? असा सवाल समनक जनता पार्टीने उपस्थित केला आहे. परिणामी, यासंबंधी निवडणूक विभागाकडे तक्रार देखील दाखल केली आहे. मतदानाच्या दिवशी झालेला गैरप्रकार, मतदानाचा अंदाज सोशल मीडियावर प्रसारित करून एकूणच मतदान प्रक्रियेवर प्रश्नचिन्ह निर्माण झाल्याबद्दल समनक जनता पार्टीने हरकत घेतली आहे. याप्रकरणी 13 मे रोजी वाशिम जिल्हाधिकारी तथा निवडणूक अधिकाऱ्यांकडे तक्रार दाखल करण्यात आली आहे. 

....अन्यथा आम्ही न्यायालयात धाव घेऊ!

या तक्रारीत नमूद केले आहे की, यवतमाळ-वाशिम लोकसभा मतदारसंघात 26 एप्रिलला मतदान प्रक्रिया पार पडली. या दिवशी मतदानाच्या टक्केवारीत कालांतराने 5.87 टक्के मतदान वाढीचा अंदाज वर्तविण्यात आला आहे. अशा आशयाची एक पोस्ट काही दिवसांपासून व्हायरल होते आहे. तसेच हा प्रकार मतदारांची दिशाभूल करणारा असून यात विजयी उमेदवाराबाबतचा अंदाजदेखील सोशल मीडियावर व्हायरल होत आहे. जेव्हा की या पोस्टला कुठल्याही प्रकारचे ठोस पुरावे किंवा आधार नाही. असे सांगत समनक पार्टीने यावर हरकत घेतली आहे. यावेर वेळीच कारवाई व्हावी, अन्यथा वेळप्रसंगी आम्ही न्यायालयात धाव घेऊ, असेही समनक जनता पार्टीने तक्रारीत नमूद केले आहे. 

दोषींवर कारवाईची मागणी 

यवतमाळ-वाशिम लोकसभा मतदारसंघात मतदानाच्या दिवशी यवतमाळ शहरात भाजपचे कार्यकर्ते लोकांच्या बोटाला शाई लावताना आढळून आले  होते. त्या प्रकरणात अदखलपात्र गुन्हा दाखल करण्यात आला. तर सध्या सोशल मीडियावर वेगवेगळ्या उमेदवारांना किती मते मिळणार, यावरून आकडेमोड करत काही संदेश फिरवले जात आहेत. या सगळ्या विरोधात समनक जनता पार्टीचे उमेदवार प्राध्यापक अनिल राठोड यांनी जिल्हाधिकाऱ्याकडे तक्रार दाखल केली असून या प्रकरणाची चौकशी करावी आणि दोषींवर कारवाई करावी, अशी मागणी त्यांनी केली आहे.

इतर महत्वाच्या बातम्या 

• Yavatmal News : पोलिसांना सांगून सांगून वैतागले, भाजप आमदार स्वत:च मटका अड्ड्यावर धाडीसाठी पोहोचले!