नागपूरमध्ये महाविद्यालयीन तरुणीवर सामूहिक बलात्कार

नागपूरच्या हुडकेश्वर पोलीस स्टेशनअंतर्गत जबलपूर-हैदराबाद महामार्गावर काल रात्री 9 ते 10 वाजता ही घटना घडली. पीडित तरुणी बीकॉमच्या तिसऱ्या वर्षी शिक्षण घेत आहे.

नागपूर : नागपूरमध्ये एका 19 वर्षीय महाविद्यालयीन तरुणीवर सामूहिक बलात्कार झाल्याची घटना समोर आली आहे. जबलपूर-हैदराबाद महामार्गावर ही घटना घडली आहे. पीडित तरुणी तिच्या महाविद्यालयीन मित्रासोबत एका निर्जन ठिकाणी गप्पा मारत होती. त्यावेळी तिथे आलेल्या दोन जणांनी दमदाटी करत तिच्यावर बलात्कार केला. याप्रकरणी दोघांना अटक करण्यात आली आहे.

नागपूरच्या हुडकेश्वर पोलीस स्टेशनअंतर्गत जबलपूर-हैदराबाद महामार्गावर काल रात्री 9 ते 10 वाजता ही घटना घडली. पीडित तरुणी बीकॉमच्या तिसऱ्या वर्षी शिक्षण घेत आहे.

तिच्या वर्गमित्रसोबत गप्पा मारत पीडित तरुणी महामार्गाच्या बाजूला काहीशा निर्जन ठिकाणी बसली होती. दरम्यान 2 गुन्हेगारी वृत्तीच्या दोघांनी येऊन त्यांना दमदाटी केली आणि तरुणाला मारहाण करत पळवून लावले. त्यानंतर तरुणीसोबत या दोघा नराधमांनी तरुणीवर बलात्कार केला.

घटनेनंतर तरुणाने महामार्गावर येऊन एका दुसऱ्या व्यक्तीच्या फोनवरून पोलिसांशी संपर्क साधला. काही वेळातच पोलीस घटनास्थळी दाखल झाले, मात्र तोपर्यंत दोघे आरोपी तरुणीला सोडून पळून गेले होते. पोलिसांनी तरुणीला विचारपूस केली, मात्र तरुणीने तिच्यासोबत घडलेले प्रकारावर कोणतीही तक्रार दिली नव्हती.

मात्र, तरुणीच्या कुटुंबियांनी आज पहाटे पीडित तरुणीसोबत हुडकेश्वर पोलीस स्टेशनमध्ये येऊन घडलेल्या प्रकाराबद्दल तक्रार दिली. तरुणीच्या तक्रारीनंतर आज तिची वैद्यकीय तपासणी करून पोलिसांनी सामूहिक बलात्काराचा गुन्हा नोंदवला. याप्रकरणी पोलिसांनी 43 वर्षीय अनिल थेटे आणि 37 वर्षीय बाबा भगत या दोन गुन्हेगारी पार्श्वभूमीच्या आरोपींना अटक केली आहे.