एक्स्प्लोर

भाजप नेते नारायण राणे यांच्याविरोधात गुन्हा दाखल; मुख्यमंत्र्याविरोधात टीका करताना अपशब्द वापरल्याचा आरोप

आतापर्यंतच्या मुख्यमंत्र्यांनी आपल्या भाषणाच्या शैलीने स्वतःची प्रतिष्ठा राखली, दसरा मेळाव्यात उद्धव ठाकरे यांनी केलेल्या भाषणात त्याचा अभाव जाणवला. निर्बुद्ध शिवराळ बरळणं म्हणजे मुख्यमंत्र्यांचं भाषण होतं, अशी टीका नारायण राणेंनी मुख्यमंत्र्यांवर केली होती.

Written By : आफताब शेख, एबीपी माझा | Updated at : 30 Oct 2020 07:36 AM (IST)

Filed case against BJP leader Narayan Rane for Accused of using abusive language while criticizing the CM uddhav thackeray भाजप नेते नारायण राणे यांच्याविरोधात गुन्हा दाखल; मुख्यमंत्र्याविरोधात टीका करताना अपशब्द वापरल्याचा आरोप

Photo Credit : (Photo by Getty Images)

सोलापूर : भाजप नेते नारायण राणे यांच्याविरोधात सोलापुरातील बार्शी शहर पोलीस स्थानकात अदखालपात्र गुन्हा नोंद करण्यात आला आहे. या विरोधात बार्शीतील शिवसेना नेते भाऊसाहेब आंधळकर यांनी पोलिसांत तक्रार दिली होती. मुख्यमंत्री तथा शिवसेना पक्षप्रमुख उद्धव ठाकरे यांनी दसरा मेळाव्यात भाषण करताना अनेक राजकीय नेत्यांवर कडाडून टीका केली होती. भाजप नेते नारायण राणे यांचा नामोल्लेख टाळत उद्धव ठाकरे यांनी त्यांवर टीका केली होती. त्याला प्रत्यूतर देताना नारायण राणे यांनी पत्रकार परिषद घेत मुख्यमंत्री उद्धव ठाकरे यांच्यावर जोरदार टीका केली.

आतापर्यंतच्या मुख्यमंत्र्यांनी आपल्या भाषणाच्या शैलीने स्वतःची प्रतिष्ठा राखली, दसरा मेळाव्यात उद्धव ठाकरे यांनी केलेल्या भाषणात त्याचा अभाव जाणवला. निर्बुद्ध शिवराळ बरळणं म्हणजे मुख्यमंत्र्यांचं भाषण होतं, अशी टीका नारायण राणेंनी केली होती. दसरा मेळाव्यातील भाषणात एकाही विकास कामाचा उल्लेख नाही, कोरोनाचा उल्लेख नाही. जवळपास 43 हजार रुग्ण महाराष्ट्रात मृत्यूमुखी पडले. याची नैतिक जबाबदारी मुख्यमंत्र्यांवर येत नाही का? असा सवालही नारायण राणेंनी उपस्थित केला होता.

पाहा व्हिडीओ : ठाकरे विरुद्ध राणे! 'कुणाला बेडुक म्हणतो? उद्धव ठाकरेच पुळचट', राणेंची मुख्यमंत्र्यांवर जोरदार टीका

मात्र मुख्यमंत्र्यावर टीका करताना पुळचट, निर्बुद्ध अशी शिवीगाळीची आणि दमदाटीची भाषा वापरुन शिवसैनिकांचा अपमान केल्याचा आरोप बार्शीतील शिवसेना नेते भाऊसाहेब आंधळकर यांनी केला. त्यामुळे नारायण राणे यांच्याविरोधात भांदवि कलम 504, 506 नुसार गुन्हा दाखल करण्यासंदर्भात तक्रारी अर्ज दिले होते. जर पोलिसांनी तात्काळ गुन्हा दाखल करुन योग्य कारवाई केली नाही, तर 2 नोव्हेंबरला नारायण राणे यांच्या पुतळ्याचे दहन केले जाईल असा इशारा देखील भाऊसाहेब आंधळकर यांनी दिला होता. त्यांच्या या तक्रारीनंतर बार्शी शहर पोलीस स्थानकात भांदवि कलम 504, 506 नुसार अदखलपात्र गुन्ह्याची नोंद करण्यात आली आहे.

"नारायण राणे यांना शिवसेनेने मुख्यमंत्री पद दिलं होतं. बाळासाहेबांनी राणे यांच्यावर अनेक उपकार केले होते. राणेंमुळे शिवसेना वाढण्यास मदत ही झाली असेल. मात्र अशा पद्धतीने वैयक्तिक पातळीवर शिवसेना पक्षप्रमुख उद्धव ठाकरे यांच्यावर टीका करणं हे शिवसैनिकांना खपणारं नाही. यासोबतच सामान्य जनता म्हणून देखील राज्याच्या मुख्यमंत्र्यांबद्दल एकेरी भाषेत टीका करणं हे निंदनीय आहे. त्यामुळे आम्ही पोलिसांत गुन्हा दाखल केला आहे." अशी प्रतिक्रिया शिवसेना नेते भाऊसाहेब आंधळकर यांनी दिली आहे.

महत्त्वाच्या बातम्या :

बेईमानी करून, हिंदुत्वाला मूठ माती देऊन मुख्यमंत्रीपद मिळवलं, नारायण राणेंची उद्धव ठाकरेंवर टीका

#Shivsena शिवसेना नेत्यांकडून राणेंचा समाचार, राणेंचं मेडिकल चेकअप आणि NCB चौकशी करावी ही मागणी

About the author आफताब शेख, एबीपी माझा

आफताब शेख हे एबीपी माझा वृत्त वाहिनीत सिनिअर करस्पॉन्डट म्हणून कार्यरत आहेत. मागील 9 वर्षांपासून एबीपी माझाच्या माध्यमातून कार्यरत असून आपल्या संवेदनशील आणि निष्पक्ष पत्रकारितेने त्यांनी स्वतंत्र ओळख निर्माण केली आहे. 3 जुलै 2017 रोजी मुंबई येथील एबीपी माझाच्या मुख्य कार्यालयातून त्यांनी पत्रकारितेच्या प्रवासाला सुरुवात केली. फेब्रुवारी 2019 पासून ते सोलापूर येथे सिनिअर करस्पॉन्डन्ट म्हणून कार्यरत आहेत. सध्या ते सोलापूर श्रमिक पत्रकार संघाचे सरचिटणीस म्हणूनही जबाबदारी सांभाळत आहेत.

सोलापूरच्या राजकीय घडामोडींपासून सामाजिक, शैक्षणिक, प्रशासकीय, औद्योगिक, मनोरंजन, क्रीडा आणि व्यावसायिक क्षेत्रांतील महत्त्वाच्या विषयांना त्यांनी एबीपी माझाच्या माध्यमातून राज्यस्तरीय व्यासपीठ मिळवून दिले आहे. ‘कामगारांचे शहर‘ म्हणून ओळखल्या जाणाऱ्या सोलापूरमधील कामगारांचे प्रश्न, सर्वसामान्य नागरिकांच्या समस्या आणि उपेक्षित घटकांचा आवाज शासनदरबारी पोहोचवण्याचा त्यांचा सातत्यपूर्ण प्रयत्न राहिला आहे. बहुभाषिक आणि समृद्ध सांस्कृतिक वारसा लाभलेल्या सोलापूरचा इतिहास, परंपरा आणि वर्तमानही त्यांनी आपल्या वार्तांकनातून प्रभावीपणे मांडले आहे. कोरोना काळात कोविड वॉर्डमध्ये प्रत्यक्ष जाऊन रुग्णांच्या व्यथा आणि आरोग्य व्यवस्थेतील वास्तव समोर आणला तर महापूर-दुष्काळातील रिपोर्ट्समधून त्यांनी आपल्या संवेदनशील पत्रकारितेचा प्रत्यय दिला. सोलापूरसह मुंबई, पुणे, धाराशिव, लातूर, बीड, नांदेड आणि छत्रपती संभाजीनगर जिल्ह्यांतही त्यांनी वार्तांकन केले आहे.

त्यांनी सोलापूरच्या दयानंद कला व शास्त्र महाविद्यालयातून कला शाखेची पदवी, तर मुंबई विद्यापीठातून मास्टर ऑफ मास कम्युनिकेशन अँड जर्नलिझम ही पदव्युत्तर पदवी प्राप्त केली आहे. पत्रकारितेसोबतच सामाजिक कार्याचीही त्यांना विशेष आवड आहे. महाविद्यालयीन जीवनातील सामाजिक योगदानासाठी 2016 मध्ये तत्कालीन राष्ट्रपती प्रणव मुखर्जी यांच्या हस्ते त्यांना इंदिरा गांधी राष्ट्रीय सेवा योजना पुरस्काराने (Indira Gandhi NSS Award-2016) सन्मानित करण्यात आले. याशिवाय, पत्रकारितेतील योगदानासाठी त्यांना विविध संस्था आणि संघटनांकडून अनेक पुरस्कारांनी गौरविण्यात आले आहे.

Published at : 30 Oct 2020 07:32 AM (IST)

Tags :

Filed Case Against Narayan Rane Bjp Leader Narayan Rane Solapur Shivsena CM Uddhav Thackeray