Deglur By Election LIVE : आज देगलूर बिलोली मतदारसंघ पोटनिवडणुकीसाठी मतदान, पाहा प्रत्येक अपडेट्स एका क्लिकवर

Nanded Deglur Biloli By Election : आज नांदेडमधील देगलूर बिलोली विधानसभा मतदारसंघाच्या रिक्त झालेल्या जागेसाठी आज पोटनिवडणूक पार पडत आहे. या निवडणुकीत काँग्रेस आणि भाजपची प्रतिष्ठा पणाला लागली आहे.

Background

Nanded Deglur Biloli By Election : आज नांदेडमधील देगलूर बिलोली विधानसभा मतदारसंघाच्या रिक्त झालेल्या जागेसाठी आज पोटनिवडणूक पार पडत आहे. या निवडणुकीत काँग्रेस आणि भाजपची प्रतिष्ठा पणाला लागली आहे. शिवाय वंचित बहुजन आघाडीनं देखील जोमानं प्रचार करुन निवडणुकीत रंगत आणली आहे. आज पार पडणाऱ्या मतदान प्रक्रियेसाठी प्रशासनानं देखील जय्यत तयारी केली आहे. देगलूर पोटनिवडणूक मतदान प्रक्रियेसाठी 1 हजार 677 अधिकारी, कर्मचारी यांची नेमणूक करण्यात आली आहे. आज सकाळी 7 ते सायंकाळी 7 वाजेपर्यंत होणार मतदान होणार आहे. 
 
ही निवडणूक सुरळीत पार पडण्याच्या दृष्टीने प्रशासनाच्यावतीने 1 हजार 648 कर्मचारी आणि 29 क्षेत्रिय अधिकारी यांची नेमणूक केली आहे असे देगलूर निवडणूक अधिकारी यांनी कळविले आहे. या पोटनिवडणुकीत एकूण 12 उमेदवार निवडणूक रिंगणात असून आरक्षित असणाऱ्या या मतदारसंघात महाविकास आघाडी, भाजपा, वंचित आघाडी अशी प्रमुख लढत पाहण्यास मिळणार आहे. या मतदारसंघ पोटनिवडणुकीत काँग्रेस तथा महाविकास आघाडीकडून जितेश अंतापूरकर (jitesh antapurkar), भारतीय जनता पार्टीचे उमेदवार सुभाष साबणे (Subhash Sabane) तर वंचित बहुजन आघाडीचे उमेदवार डॉ. उत्तम रामराव इंगोले निवडणूक रिंगणात आहेत.

2019 साली पार पडलेल्या विधानसभा निवडणुकीत काँग्रेस पक्षाचे दिवंगत आमदार रावसाहेब अंतापूरकर यांना 89 हजार 400 मताधिक्य मिळाले मिळून विजयी झाले होते. त्याचप्रमाणे त्यावेळचे शिवसेना भाजप युतीचे उमेदवार सुभाष साबणे यांना 66 हजार 560 तर वंचित बहुजन आघाडीचे तत्कालीन उमेदवार रामचंद्र भरांडे  यांना 13 हजार 300 मतदान पारड्यात पडले होते.  

या निवडणूकीत 412 मतदान केंद्रावर मतदान होणार आहे. या मतदान प्रक्रीयेत 1 लाख 54 हजार 92 पुरुष मतदार, तर 1 लाख 44 हजार 256 स्त्री मतदार व इतर 5 आणि शासकीय अधिकारी व कर्मचारी मतदाराची संख्या 187 असून असे एकूण 2 लाख 98 हजार 540 मतदार मतदानाचा हक्क बजावणार आहेत.

दिग्गजांच्या प्रचारसभा
ही पोटनिवडणूक चांगलीच प्रतिष्ठेची ठरत आहे. निवडणुकीच्या आधी शिवसेनेत असलेले सुभाष साबणे यांनी भाजपमध्ये प्रवेश केला. त्यांना प्रवेश केल्यानंतर उमेदवारीही मिळाली तर दुसरीकडे काँग्रेसनं दिवंगत आमदार रावसाहेब अंतापूरकर यांचे चिरंजीव जितेश अंतापूरकर यांना संधी दिली. या निवडणुकीत प्रचारासाठी दिग्गजांनी हजेरी लावली आणि विजयाचा दावा केला आहे. भाजपकडून विरोधी पक्षनेते देवेंद्र फडणवीस, प्रदेशाध्यक्ष चंद्रकांत पाटील, नितेश राणे, गोपीचंद पडळकर यांच्या अनेक दिग्गजांच्या सभा पार पडल्यात तर महाविकास आघाडीकडून मंत्री अशोक चव्हाण, छगन भुजबळ, नाना पटोले यांच्यासह अनेक दिग्गजांनी हजेरी लावली. वंचितकडून प्रकाश आंबेडकरांनी देखील सभा घेतल्या आहेत. 

16:56 PM (IST)  •  30 Oct 2021

देगलूर पोटनिवडणुकीसाठी दुपारी 3 वाजेपर्यंत 48.47 टक्के मतदान    

आज सकाळी 7 ते  दुपारी  3 या दरम्यान मतदान झालेली आकडेवारी पुढीलप्रमाणे आहे. पुरुष मतदार 73  हजार 212 तर स्त्री मतदार 71 हजार 390 असे एकूण 1 लाख 44 हजार 602 मतदारांनी आपला मतदानाचा हक्क बजावला आहे. दुपारी 3 वाजेपर्यंत मतदान पार पडलेली टक्केवारी 48.47 आहे.

13:54 PM (IST)  •  30 Oct 2021

नांदेडच्या देगलूर-बिलोली पोटनिवडणुकीत मतदान केंद्रावर गोंधळ, मतदार यादीत नावांतील चुकांच्या घोळामुळे वाद

देगलूर बिलोली मतदारसंघातील पोटनिवडणुकीचं मतदान सुरु आहे. एका मतदान केंद्राबाहेर राजकीय पक्षाच्या कार्यकर्त्यांनी थाटलेले तंबू काढून टाकण्याचे आवाहन पोलिसांनी केल्यानंतर वाद निर्माण झाला. पोलिसांनी आवाहन केलं तरी कार्यकर्त्यांनी तंबू काढण्यास नकार दिला. केवळ भाजपचेच तंबू काढले जात असल्याचा आरोप कार्यकर्त्यांनी केला. 

10:31 AM (IST)  •  30 Oct 2021

मतदार केंद्राबाहेर नियमबाह्य टेंट काढून घेण्याचे पोलिसांचे आवाहन

नांदेड: मतदार केंद्राबाहेर नियमबाह्य टेंट काढून घेण्याचे पोलिसांचे आवाहन, पक्ष कार्यकर्त्यांना पोलिसांनी टेंट काढून घेण्याच्या सूचना दिल्या नंतरही कार्यकर्त्यांचा आडमुठेपणा कायम.   पोलिसांनी सदर मतदार केंद्राबाहेर राजकीय पक्षांनी थाटलेले टेंट अथवा तंबू काढून घेण्याचे आवाहन केल्यानंतरही पक्ष कार्यकर्त्यांनी आडमुठेपणा करत तंबू न काढण्याची भूमिका घेतलीय.तर यात फक्त भाजप पक्षाचेच टेंट काढले जात असल्याचा आरोप भाजपतील कार्यकर्त्यांनी केलाय. त्यामुळे मतदार यादी घोळानंतर आता तंबू वाद मतदान केंद्राबाहेर सुरू झालाय.

 

10:28 AM (IST)  •  30 Oct 2021

काँग्रेस उमेदवार जितेश अंतापुरकर व त्यांच्या आईने मतदानाचा हक्क बाजावला

देगलूर येथील अंतापूर येथे काँग्रेस उमेदवार जितेश अंतापुरकर व त्यांच्या आईने मतदानाचा हक्क बजावलाय. यावेळी  उमेदवार जितेश अंतापुरकर यांनी जनतेने 100 टक्के मतदान करून, शांततेने  मतदानाचा हक्क बजावत  लोकशाही अधिक बळकट करावी असे आवाहन केलेय.

10:27 AM (IST)  •  30 Oct 2021

सकाळी सात ते नऊ या कालावधीत मध्ये 12 टक्‍क्‍यांपर्यंत मतदान

देगलूर विधानसभा पोटनिवडणुकीसाठी मतदारांना आपले मतदानाचे पवित्र कर्तव्य  बजावता यावे यासाठी जिल्हा प्रशासन सज्ज. देगलूर तालुक्यातील कासराळी येथील मतदान केंद्रांवर आज लोकांनी उत्स्फूर्त सहभाग घेऊन मतदानाचा हक्क बजावला. आज सकाळी सात ते नऊ या कालावधीत मध्ये 12 टक्‍क्‍यांपर्यंत मतदान पूर्ण झालेय.