राज्यात अवकाळी पावसाचा इशारा, गारठा प्रचंड वाढला, IMDने तापमानाबाबत काय दिलाय इशारा?

पुण्यासह छत्रपती संभाजीनगर, जळगाव, परभणी तसेच बहुतांश महाराष्ट्रात तापमानाचा पारा 10 अंशांच्या खाली गेला होता.

IMD

Source : ABPLIVE AI

Weather alert: राज्यात थंडीचा जोर चांगलाच वाढला असून तापमान घसरत चाललं आहे. गेल्या दोन दिवसात झालेल्या हवामान बदलात राज्यात अनेक भागात किमान तापमानाचा पारा 10 अंशाच्या खाली गेला होता. येत्या दोन ते तीन दिवसात राज्यातील किमान तापमानात हळूहळू वाढ होण्याचा अंदाज हवामान विभागानं (IMD)वर्तवला असून कोकण, मध्य महाराष्ट्र आणि मराठवाड्यात पावसाची शक्यता वर्तवण्यात आली आहे. येत्या 5 दिवसात किमान तापमान दोन ते तीन अंशांची वाढ होणार आहे.  

पुण्यासह छत्रपती संभाजीनगर, जळगाव, परभणी तसेच बहुतांश महाराष्ट्रात तापमानाचा पारा 10 अंशांच्या खाली गेला होता. पहाटे अनेक भागांमध्ये प्रचंड गारठ्यासह धुक्याची चादर होती. 

अवकाळी पावसाचा अंदाज कुठे? 

राज्यात गेल्या काही दिवसांपासून तापमानात चढ-उतार होत असून पावसाला पोषक वातावरण तयार झाले आहे. उत्तर कोकणासह मराठवाडा आणि उत्तर महाराष्ट्रात अवकाळी पावसाचा अंदाज देण्यात आलाय. किमान तापमान येत्या दोन दिवसात हळूहळू वाढणार असून दोन ते तीन अंशांनी त्यात वाढ होणार आहे.

हवामान विभागाचा अंदाज काय?

हवामान विभागाच्या अंदाजानुसार, पश्चिम चक्रवतामुळे वातावरणात बदल होत असून, दक्षिण-पूर्व इराण आणि आसपासच्या भागात चक्राकार वाऱ्यांची स्थिती तयार झाली आहे. त्याचा परिणाम म्हणून राजस्थानच्या दक्षिण-पश्चिम भागातही कमी उंचीवरील चक्राकार वाऱ्यांची स्थिती निर्माण झाली आहे. यामुळे पश्चिमेकडील आणि पूर्वेकडील वाऱ्यांचा समन्वय होण्याची शक्यता आहे. याचाच परिणाम महाराष्ट्राच्या तापमानावर होणार असून सध्या वातावरणात असलेला गारठा काहीसा कमी होणार आहे. किमान तापमान दोन ते तीन अंशांनी वाढण्याचा अंदाज हवामान विभागाने वर्तवला.

विदर्भात पुढील पाचही दिवस हवामान कोरडे राहणार असून थंडीचा जोर कायम राहणार असल्याचा सांगण्यात आलंय . प्रादेशिक हवामान केंद्रानुसार 10 जानेवारी व 11 जानेवारी रोजी हा पावसाचा अंदाज देण्यात आला असून शेतकऱ्यांनी पिकांची योग्य ती काळजी घेण्याचा सल्ला देण्यात आलाय.विदर्भ वगळता उर्वरित राज्यात दोन दिवसानंतर तापमानात वाढ होणार असून हलक्या ते मध्यम सरींची शक्यता वर्तवण्यात आली आहे .