Prithviraj Chavan on BRS: बीआरएस पार्टी भाजपची बी टीम, सर्व रसद भाजपकडून; पृथ्वीराज चव्हाणांचा हल्लाबोल
Prithviraj Chavan on BRS: काँग्रेसकडून 24 टीम महाराष्ट्रात पाठवण्यात आल्या आहेत आणि त्या माध्यमातून 48 लोकसभा मतदारसंघाचा आढावा घेतला जात आहे अशी माहिती काँग्रेस नेते पृथ्वीराज चव्हाण यांनी दिली.
कोल्हापूर : तेलंगणाचे मुख्यमंत्री केसीआर यांचा महाराष्ट्रात पाय रोवण्यासाठी गेल्या काही महिन्यांपासून आटापिटा सुरु असतानाचा काँग्रेसने जोरदार हल्ला चढवला आहे. बीआरएस ही भाजपची बी टीम असल्याचा हल्लाबोल माजी मुख्यमंत्री पृथ्वीराज चव्हाण यांनी केला. पृथ्वीराज चव्हाण दोन दिवसांच्या कोल्हापूर दौऱ्यावर आहेत. कोल्हापूरचे निरीक्षक म्हणून जबाबदारी पृथ्वीराज चव्हाण यांच्याकडे देण्यात आली आहे. ते दोन दिवस जिल्ह्याचा आढावा घेणार आहेत.
पृथ्वीराज चव्हाण म्हणाले की, बीआरएस भाजपची बी टीम आहे. त्यांना सर्व रसद भाजपकडून पुरवली जात आहे. चव्हाण यांनी काँग्रेसच्या तयारीवर भाष्य केले. त्यांनी सांगितले की, काँग्रेसकडून 24 टीम महाराष्ट्र राज्यात पाठवण्यात आल्या आहेत. 48 लोकसभा मतदारसंघाचा आढावा घेतला जात आहे. माझ्याकडे कोल्हापूर जिल्ह्यातील दोन लोकसभा मतदारसंघाची जबाबदारी आहे. आता केवळ आम्ही मित्रपक्ष, विरोधात कोण आहे, आमची ताकद किती आहे याचा आढावा घेत असल्याचे चव्हाण म्हणाले.
राजू शेट्टी हे कधीही भाजप सोबत जाणार नाहीत
एकला चलो रे म्हणून भूमिका घेतलेल्या राजू शेट्टी यांच्यावरही त्यांनी भाष्य केले. राजू शेट्टी हे कधीही भाजप सोबत जाणार नाहीत, असा विश्वास त्यांनी व्यक्त केला. राजू शेट्टी यांनी जातीवादी पक्षांना विरोध केला असल्याचे ते म्हणाले. राजू शेट्टी यांच्यासोबत महाविकास आघाडीची चर्चा चालू असल्याचेही त्यांनी सांगितले.
तिन्ही पक्ष एकत्रपणे भाजपला विरोध करणार
चव्हाण म्हणाले की, विरोधकांच्या इंडिया आघाडीची ताकद वाढत आहे. कर्नाटक पॅटर्न काँग्रेसने महाराष्ट्रात राबवला आहे. राज्यात आम्ही तिन्ही पक्ष एकत्रपणे भाजपला विरोध करणार आहे. राष्ट्रवादी काँग्रेस आणि शिवसेना फुटल्यानंतर मतदारसंघात काय भावना आहेत हे मी पाहत असल्याचे त्यांनी सांगितले. पक्ष फुटला असला तरी जनता उद्धव ठाकरे आणि शरद पवार यांच्या बाजूनं आहे, नागरिक निवडणुकीची वाट पाहत आहेत, असेही पृथ्वीराज चव्हाण यांनी सांगितले.
दरम्यान, आज पहिल्या दिवशी पृथ्वीराज चव्हाण हातकणंगले लोकसभा मतदारसंघातील इचलकरंजी, शिरोळ आणि हातकणंगले विधानसभा मतदारसंघाचा आढावा घेतील. रविवारी कोल्हापूर लोकसभा मतदारसंघातील करवीर, चंदगड, कोल्हापूर उत्तर, दक्षिण आणि राधानगरी विधानसभा मतदारसंघाचा आढावा घेणार आहेत. यावेळी जिल्हाध्यक्ष आमदार सतेज पाटील यांच्यासह पक्षाचे सर्व आमदार, तालुकाध्यक्ष आणि प्रमुख नेते उपस्थित रहाणार आहेत. रविवारी पत्रकार परिषद घेणार आहेत.
इतर महत्वाच्या बातम्या
महत्त्वाच्या बातम्या
ट्रेंडिंग न्यूज
