Kerala Blast: टिफिनमध्ये ठेवलेला बॉम्ब; घटनास्थळावरुन तारा, बॅटरी सापडल्या, केरळ बॉम्बस्फोटाच्या पार्श्वभूमीवर मुंबई, पुण्यात अलर्ट

Blast in Kerala: एकापाठोपाठ झालेल्या साखळी बॉम्बस्फोटांनी केरळ हादरलं. या पार्श्वभूमीवर मुंबई, पुण्यात अलर्ट जारी करण्यात आला आहे.

Kerala Blast Updates

Kerala Blast Update : केरळच्या (Kerala News) एर्नाकुलममध्ये एकापाठोपाठ एक असे साखळी स्फोट (Kerala Blast Updates) झाले आहेत. स्फोटांमध्ये एकाचा मृत्यू झाला असून अनेकजण जखमी झाल्याची माहिती मिळते. सकाळी 9 वाजण्याच्या सुमारास स्फोट झाल्याची माहिती आहे. रविवारी सकाळी एकापाठोपाठ तीन बॉम्बस्फोटांनी केरळ हादरलं. केरळमधील एर्नाकुलम येथे एका ख्रिश्चन प्रार्थना सभेत तीन स्फोट झाले आणि एकच गोंधळ उडाला. स्फोटात आतापर्यंत एकाचा मृत्यू झाला असून 20 हून अधिक लोक जखमी झाले आहेत. केरळमधील एका कन्व्हेन्शन सेंटरमध्ये हे स्फोट झाले.

मिळालेल्या माहितीनुसार, पोलिसांना घटनास्थळावर स्फोटात वापरलेल्या तारा, बॅटरी आणि इतर संशयास्पद वस्तुही सापडल्या आहेत. हा बॉम्ब टिफिन बॉक्समध्ये ठेवल्याचं प्राथमिक तपासात समोर आलं आहे.

एकापाठोपाठ 3 ते 4 ब्लास्ट 

कन्व्हेन्शन सेंटरमधील तीन दिवसीय कार्यक्रमाचा आज शेवटचा दिवस असल्याचं स्थानिकांनी सांगितलं आहे. स्फोट झाला तेव्हा सभागृहात दोन हजारांहून अधिक लोक उपस्थित होते. एकापाठोपाठ एक 3 ते 4 स्फोट झाले, ज्यात अनेक लोक जखमी झाल्याचा दावा प्रत्यक्षदर्शींनी केला आहे.

मुंबई, पुण्यात अलर्ट

केरळमध्ये आज सकाळी झालेल्या स्फोटानंतर मुंबई पोलीस सतर्क झाले आहेत. मुंबई पोलिसांच्या सूत्रांनी दिलेल्या माहितीनुसार, शहरात सुरक्षेच्या सर्व उपाययोजना करत आहेत. सर्व महत्त्वाच्या आणि संवेदनशील ठिकाणांवर नजर ठेवण्यात आली आहे. कोणताही कायदा आणि सुव्यवस्थेचा प्रश्न निर्माण होऊ नये, यासाठी पूर्णपणे काळजी घेण्यात आलेली आहे. 

दिल्लीहून एनएसजी रवाना 

प्रकरणाचं गांभीर्य लक्षात घेत दिल्लीहून एनएसजी बॉम्बशोधक पथकही केरळला रवाना करण्यात आलं आहे. एनएसजीच्या या टीममध्ये दोन वरिष्ठ अधिकाऱ्यांचाही समावेश आहे, जे घटनास्थळी पोहोचून या प्रकरणाची चौकशी करतील. या स्फोटानंतर समोर आलेल्या व्हिडीओमध्ये सगळीकडे फक्त आग आणि धूर दिसत आहे. हा स्फोट कसा झाला आणि कोणी घडवला, हे अद्याप स्पष्ट झालेलं नाही. या घटनेबाबत देशाचे गृहमंत्री अमित शहा यांनी केरळचे मुख्यमंत्री पिनराई विजयन यांच्याशीही चर्चा केली आहे.

स्फोटांचा तपास NIA करणार 

केरळमधील साखळी बॉम्बस्फोटांचा तपास एनआयए (NIA) करणार आहे. केंद्रीय तपास यंत्रणा एनआयए लवकरच घटनास्थळी पोहोचून तपासाला सुरुवात करणार आहे. एनआयएची फॉरेन्सिक टीमही घटनास्थळी पोहोचणार आहे. साखळी स्फोटांचं कारण अद्याप स्पष्ट झालेलं नाही.

केरळमधील स्फोटाबाबत गृहमंत्री अमित शाह यांनी राज्याचे मुख्यमंत्री विजयन यांच्याशी फोनवर बोलून सर्व प्रकारची मदत करण्याचं आश्वासन दिलं आहे. गृहमंत्र्यांनी एनआयएला घटनास्थळी जाण्याच्या सूचना दिल्या आहेत.

महत्त्वाच्या इतर बातम्या :