रेल्वे कर्मचाऱ्यांना 78 दिवसांचा बोनस जाहीर

नवी दिल्ली : केंद्र सरकारने रेल्वे कर्मचाऱ्यांना 78 दिवसांचा बोनस जाहीर केला आहे. केंद्रीय मंत्रीमंडळाच्या बैठकीनंतर मनुष्यबळ विकास मंत्री प्रकाश जावडेकरांनी ही माहिती दिली. सलग पाचव्या वर्षी रेल्वे कर्मचाऱ्यांना बोनस दिला जात आहे. रेल्वे कर्मचाऱ्यांना दिल्या जाणाऱ्या बोनसमध्ये यावर्षी दुपटीने वाढ करण्यात आली आहे. कर्मचाऱ्यांच्या वेतनाच्या प्रमाणात हा बोनस दिला जाणार आहे. रेल्वे कर्मचाऱ्यांसाठी दिला जाणारा हा बोनस आरपीएफ आणि आरपीएसएफ यांना दिला जाणार नाही. गेल्या वर्षी 8975 रुपयांचा कमीत कमी बोनस कर्मचाऱ्यांना देण्यात आला होता. यावर्षी तो वाढवून 18 हजार रुपये करण्यात आला आहे. भारतीय रेल्वेच्या जवळपास 12 लाख कर्मचाऱ्यांना याचा लाभ होणार आहे. या बोनसमुळे रेल्वेच्या तिजोरीवर 2,090.96 कोटींचा बोजा पडणार आहे.