Petrol-Diesel Price Today : देशात इंधनदरवाढीचं सत्र सुरुच, सलग दुसऱ्या दिवशी डिझेल महागलं, पेट्रोलचे दर काय?

Petrol-Diesel Price Today Latest Updates : गेल्या काही दिवसांपासून देशात पेट्रोलचे दर स्थिर आहेत. मात्र आज डिझेलचे दर पुन्हा कडाडले आहेत. सलग दुसऱ्या दिवशी डिझेलच्या किमतींमध्ये 25 पैशांनी वाढ.

पेट्रोल-डिझेलचे दर (File Photo)

Petrol and Diesel Price Today 27 Sept 2021 : देशात पेट्रोल-डिझेलच्या किमतींनी उच्चांक गाठला आहे. भारतीय तेल कंपन्यांनी आज (27 सप्टेंबर 2021) साठी पेट्रोल (Petrol) आणि डिझेल (Diesel) च्या ताज्या किमती जारी केल्या आहेत. घरगुती बाजारात डिझेल सलग दुसऱ्या दिवशी महाग झालं आहे. तर पेट्रोलच्या किमतीत कोणताही बदल करण्यात आलेला नसून पेट्रोलचे दर स्थिर आहेत. पण डिझेलच्या किमतींमध्ये मात्र सलग दुसऱ्या दिवशी वाढ करण्यात आली आहे. तेल कंपन्यांनी जारी केलेल्या नव्या दरांनुसार, डिझेलच्या दरांत आज 25 पैशांची वाढ झाली आहे. 

इंडियन ऑईल कॉर्पोरेशन (IOCL) च्या माहितीनुसार, राष्ट्रीय राजधानी दिल्लीमध्ये आज (सोमवारी) पेट्रोल सलग 22व्या दिवशी 101.19 रुपये प्रति लिटरवर स्थिर आहे. तर डिझेलचे दर 25 पैसे प्रति लिटरच्या वाढीसह 89.32 रुपये प्रति लिटरवर पोहोचले आहेत. दरम्यान, डिझेलच्या दरांत (Diesel Price) गेल्या 4 दिवसांत तीन वेळा वाढ झाली आहे. 

70 पैशांनी महागलं डिझेल 

देशभरात गेल्या 4 दिवसांत डिझेलच्या दरांत 3 वेळा वाढ करण्यात आली असून किमती 70 पैशांनी वाढवण्यात आल्या आहेत. भारतीय तेल कंपन्यांनी काही दिवसांपूर्वी 24 सप्टेंबर रोजी 20 पैसे, तर 26 सप्टेंबर रोजी 25 पैसे प्रति लिटरची वाढ करण्यात आली होती. अशातच सलग दुसऱ्या दिवशी म्हणजेच, 27 सप्टेंबर रोजी पुन्हा एकदा दरांत 25 पैसे प्रति लिटरची वाढ झाली आहे. त्यामुळे सप्टेंबरमध्ये आतापर्यंत डिझेलच्या किमतींमध्ये 70 पैशांची वाढ करण्यात आली आहे. दरम्यान, पेट्रोलचे दरांत  (Petrol Price) कोणताही बदल करण्यात आलेला नाही. 

मुंबईसह देशातील इतर महत्त्वाच्या शहरांतील दर 

इंडियन ऑयल कॉर्पोरेशन (IOCL)नं दिलेल्या माहितीनुसार, देशाच्या राजधानीचं शहर असणाऱ्या मुंबईत आज पेट्रोलची किंमत 107.26 रुपये प्रति लिटर आणि डिझेलची किंमत 96.94 रुपये प्रति लिटरवर पोहोचली आहे. तर चेन्नईत पेट्रोलची किंमत 98.96 रुपये प्रति लिटर आणि डिझेलची किंमत 93.93 रुपये प्रति लिटरवर पोहोचली आहे.

देशांतील प्रमुख शहरांतील पेट्रोल-डिझेलचे दर :

देशातील महत्त्वाची शहरं	पेट्रोल रुपये/लिटर	डिझेल रुपये/लिटर
दिल्ली	101.19	89.32
मुंबई	107.26	96.93
चेन्नई	98.96	93.93
कोलकाता	101.62	92.42

पेट्रोल-डिझेल GSTमध्ये घेण्यासाठी का तयार नाही केंद्र आणि राज्य सरकार?

केंद्र सरकारनं कर प्रणालीमध्ये सुधारणांची गरज असल्याचं कारण देत जीएसटी (GST) लागू केला होता. पण जीएसटीमध्ये पेट्रोल आणि डिझेलचा समावेश करण्यात आलेला नाही. तसेच देशातील बहुतांश राज्य सरकारचंही हेच मत आहे की, पेट्रोल-डिझेलचा जीएसटीच्या कक्षेत समावेश केला जाऊ नये. पण का?  यामुळे काय फायदा होणार? यांसारखे अनेक प्रश्न आपल्या सर्वांच्या मनात निर्माण झाले आहेत. जाणून घेऊया यामागील कारणं... 

पेट्रोल-डिझेलच्या किमती जीएसटीच्या कक्षेत आणण्याची केंद्र सरकारसोबत राज्य सरकारचीही इच्छा नाही. कारण सरकारला चिंता आहे ती, देशाच्या तिजोरीची. सामान्य माणसाला दिलासा देता-देतो, देशाच्याच तिजोरीत खडखडाट होण्याची भिती सरकारला वाटतेय. जर पेट्रोल-डिझेलचा समावेश जीएसटीच्या कक्षेत केला, तर पेट्रोल-डिझेलच्या किमती अर्ध्या होणार. आजच्या किमतीनुसार जर अंदाज लावला तर, पेट्रोल 56 रुपये प्रति लिटर आणि डिझेल 55 रुपये प्रति लिटर विकलं जाईल. 

सप्टेंबरमध्ये दोन वेळा घटल्या पेट्रोल-डिझेलच्या किमती 

सप्टेंबर महिन्यात दोन वेळा पेट्रोल-डिझेलच्या किमतींमध्ये घट झाली. महिन्याच्या सुरुवातीला म्हणजेच, 1 सप्टेंबर रोजी भारतीय बाजारात सरकारी तेल कंपन्यांनी पेट्रोल-डिझेलच्या किमतीत 15-15 पैसे प्रति लिटरची कपात केली होती. तसेच, 05 सप्टेंबर रोजी पुन्हा पेट्रोल-डिझेलच्या किमतींमध्ये 15-15 पैशांची घट झाली होती. म्हणजेच, या आठवडाभरता पेट्रोल-डिझेल 30-30 पैशांनी स्वस्त झाला आहे. 

पेट्रोल आणि डिझेलचे दर कुठे आणि कसे पाहाल?

इंडियन ऑईलचं IndianOil ONE Mobile App तुमच्या मोबाईलवर डाऊनलोड करुन तुम्ही तुमच्या जवळच्या इंडियन ऑईल पेट्रोल पंपावरील इंधनाचे दर जाणून घेऊ शकता.

इंडियन ऑईलच्या वेबसाईटवर https://iocl.com/Products/PetrolDieselPrices.aspx पेट्रोल डिझेलचे दर सोप्या पद्धतीने पाहता येतील.

पेट्रोल आणि डिझेलच्या किंमती एसएमएसद्वारे देखील कळू शकतात. इंडियन ऑईलच्या वेबसाईटने दिलेल्या माहितीनुसार, RSP आणि स्पेस देऊन आपल्या शहराचा कोड टाकून 92249992249 या क्रमांकावर एसएमएस करायचा आहे. हा कोड इंडियन ऑईलच्या वेबसाईटवर मिळेल. (शहरांचे कोड इंडियन ऑईलच्या वेबसाईटवर देण्यात आले आहेत).