नवज्योत सिंह सिद्धु यांचा काँग्रेसमध्ये प्रवेश, भाजपला रामराम

दिल्ली : प्रसिद्ध क्रिकेटपटू आणि समालोचक नवज्योतसिंह सिद्धू यांनी काँग्रेसमध्ये प्रवेश केला आहे. आज दिल्लीत राहुल गांधींच्या उपस्थितीत सिद्धू यांनी काँग्रेसप्रवेश केला आहे. त्यामुळे गेल्या काही दिवसांतील चर्चांना पूर्णविराम लागला आहे. नवज्योत सिंह सिद्धू यांना 2014 साली भाजपनं अमृतसरमधून लोकसभेसाठी तिकीट नाकारलं होतं. अमृतसरमधील तिकीट नाकारुन अरुण जेटलींना दिल्यामुळे सिद्धु यांची भाजपवर नाराजी होती. राष्ट्रपती नियुक्त खासदार बनवून भाजपनं सिद्धु यांची समजूत काढण्याचा प्रयत्नही केला. मात्र त्यानंतरही नाराज असलेल्या सिद्धु यांनी भाजपला सोडचिट्ठी देत काँग्रेसची वाट धरली आहे. मध्यंतरी सिद्धू आपमध्ये जाणार अशीही चर्चा रंगली होती. सिद्धु यांची पत्नी नवज्योत कौर आधीपासूनच काँग्रेसमध्ये आहेत. 2004 साली अमृतसरमधून भाजपच्या तिकीटावर राजकारणात प्रवेश केलेल्या सिद्धू यांनी भाजपवर पंजाबमधील राजकारणापासून दूर ठेवलं जात असल्याचा आरोप केला आहे.