ISRO | इस्त्रोच्या आगामी सर्व मिशनमध्ये हरित इंधनाचा वापर होणार : के. सिवन

इस्त्रो (ISRO) आता पारंपरिक इंधनाला पर्याय म्हणून हरित इंधनाचा (green propellant) वापर करणार आहे. तसेच आपल्या गगनयान (Gaganyaan)या पहिल्या अंतराळ मिशनमध्येही हरित इंधनाचा वापर करण्याच्या दृष्टीने प्रयत्न सुरु असल्याचं इस्त्रोचे अध्यक्ष के. सिवन (K Sivan) यांनी स्पष्ट केलंय.

इस्त्रो के सिवन

बंगळुरु : इस्त्रो आपले पहिले अंतराळ मिशन 'गगनयान' मध्ये हरित इंधन वायूचा वापर करण्याच्या दृष्टीकोनातून प्रयत्न करत असल्याचं इस्त्रोचे अध्यक्ष के. सिवन यांनी शुक्र्वारी स्पष्ट केलंय. येत्या काळात इस्त्रोच्या सर्व मोहिमांमध्ये हरित इंधनाचा वापर करण्यात येणार असल्याचंही त्यांनी सांगितलं.

कोको बेटावर गगनयान मिशनसाठी ग्राऊंड स्टेशन उभे करण्यासाठी इस्त्रो ऑस्ट्रेलिया सरकारशी बोलणी करत असल्याचंही त्यांनी सांगितलं. तसेच, इस्त्रोला ऑस्ट्रेलियामध्ये NAVIC ग्राऊंड स्टेशन उभं करायचं आहे असंही त्यांनी स्पष्ट केलं. शुक्रवारी ते इंडिया इकॉनॉमिक कॉनक्लेव्हमध्ये बोलत होते. इस्त्रोला जागतिक स्तरावर नेतृत्व करायची महत्वाकांक्षा नाही असंही के. सीवन यांनी सांगितलं. 

के, सिवन म्हणाले की, "इस्त्रोचे मुख्य ध्येय हे भारतातील अंतराळ क्षेत्रातील पायाभूत सुविधांचा विकास करणे आणि इतर गरजांची पूर्ती करणे हे आहे. इस्त्रोच्या मोहिमांचा देशातील विज्ञान आणि तंत्रज्ञान तसेच इतर सर्वच क्षेत्राला कसा फायदा होईल यावर आमचा भर आहे."

हरित इंधनासंबंधी विचारलेल्या एका प्रश्नाला उत्तर देताना के. सिवन म्हणाले की, "आगामी काळात हरित इंधनाचा वापर करणे अत्यावश्यक असेल. गगनयान मिशनमध्ये आम्ही हरित इंधनाचा वापर करणार आहे. इस्त्रोने या आधीच तसे नियोजन केले असून त्याची संपूर्ण तयारीही झाली आहे. आगामी काळात इस्त्रोच्या सर्वच मिशनमध्ये हरित इंधनाचा वापर करण्यात येणार असून ती काळाची गरज आहे. त्यामुळे बहुतेक विषारी आणि धोकादायक अशा सर्व घटकांचे निर्मूलन शक्य होणार आहे."

रॉकेट लॉन्च व्हेईकलमध्ये लवकरात लवकर पारंपरिक इंधनाला पर्यायी अशा हरित इंधनाचा वापर करण्याचा आमचा मानस आहे असे के. सिवन यांनी सांगितलं. 

इस्त्रोच्या गगनयान मिशनला कोरोनाचा फटका बसला असल्याचं दिसतंय. 2022 पर्यंत या मिशनच्या माध्यमातून तीन भारतीयांना अंतराळात पाठवायचं इस्त्रोचं ध्येय होतं. 

महत्वाच्या बातम्या :