Hormuz Strait Attack : गुजरातकडे येणाऱ्या 'मयुरी नारी' कार्गो जहाजावर इराणचा हल्ला; दोन भारतीयांचा मृत्यू, हॉर्मुजच्या सामुद्रधुनीत तणाव
Iran Attack On Cargo Ship : 'मयुरी नारी' हे कार्गो जहाज भारताकडे येत असताना हॉर्मुजच्या सामुद्रधुनीत त्यावर इराणने हल्ला केला. त्यावर परराष्ट्र मंत्रालयाने चिंता व्यक्त केली आहे.
Iran Israel US War : पश्चिम आशियात इराण आणि इस्त्रायलमध्ये सुरू असलेल्या तणावाच्या पार्श्वभूमीवर होर्मुज सामुद्रधुनीत भारताकडे येणाऱ्या एका कार्गो जहाजावर हल्ला झाल्याची धक्कादायक घटना समोर आली आहे. थायलंडचे ‘मयुरी नारी’ (Mayuree Naree) हे कार्गो जहाज गुजरातमधील कांडला बंदराकडे येत असताना त्यावर हल्ला करण्यात आला. या हल्ल्यात दोन भारतीय नागरिकांचा मृत्यू झाला असून एक जण बेपत्ता असल्याची माहिती समोर आली आहे. या घटनेवर भारतानं तीव्र चिंता व्यक्त केली आहे.
MEA Reaction On Cargo Ship Attack : व्यापारी जहाजांना लक्ष्य करणं टाळावं
परराष्ट्र मंत्रालयाचे प्रवक्ते रणधीर जयस्वाल यांनी या घटनेची पुष्टी केली आहे. त्यांनी सांगितलं की, 11 मार्च रोजी होर्मुज सामुद्रधुनीत थायलंडच्या ‘मयुरी नारी’ या कार्गो जहाजावर हल्ला झाल्याची माहिती मिळाली आहे. भारत सरकारनं या घटनेचा निषेध करत व्यापारी जहाजांना लक्ष्य करणं टाळलं पाहिजे, असं स्पष्ट केलं आहे. तसेच या युद्धामुळे निर्दोष नागरिकांच्या जीवाला धोका निर्माण होत असल्याचंही भारतानं म्हटलं आहे.
Statement regarding ship bound for Kandla, India ⬇️
— Randhir Jaiswal (@MEAIndia) March 11, 2026
🔗 https://t.co/CdtmMXAdPY pic.twitter.com/xVK9AymYn2
IRGC Statement On Cargo Ship Attack : इशारा दुर्लक्षित केल्याचा इराणचा दावा
दरम्यान, इराणच्या इस्लामिक रिव्होल्युशनरी गार्ड कॉर्प्स (IRGC) कडून या हल्ल्याबाबत प्रतिक्रिया देण्यात आली आहे. त्यांच्या मते, काही जहाजांनी इराणचा इशारा दुर्लक्षित करून होर्मुज सामुद्रधुनीत प्रवेश केला होता. इराणने केलेल्या इशाऱ्याकडे दुर्लक्ष करणाऱ्या जहाजांवर हल्ला करण्यात आल्याचा दावा करण्यात आला आहे. IRGC चे नेव्ही कमांडर अलिरेजा तंगसिरी यांनी सोशल मीडियावर पोस्ट करत या मार्गाने जाणाऱ्या कोणत्याही जहाजाला इराणची परवानगी आवश्यक असेल, असा इशारा दिला आहे.
Middle East Crisis : जहाजांवर हल्ल्याचा इशारा
दरम्यान, इराणी सैन्याच्या ऑपरेशनल कमांडनं सरकारी टीव्हीवर घोषणा करत अमेरिका, इस्रायल किंवा त्यांच्या सहयोगींशी संबंधित जहाजांना लक्ष्य केलं जाईल, असा इशारा दिला आहे. तसंच होर्मुज सामुद्रधुनीतून एक थेंबही तेल जाऊ देणार नाही, असा इशाराही देण्यात आला आहे.
Indians In Iran : इराणमध्ये 9 हजार भारतीय
परराष्ट्र मंत्रालयानं सांगितलं की इराणमध्ये सध्या सुमारे 9 हजार भारतीय नागरिक अडकलेले आहेत. काहींनी भारत सरकारच्या सल्ल्यानुसार स्वदेशात परतण्याचा निर्णय घेतला आहे. मात्र अजूनही अनेक भारतीय तिथेच असून भारतीय दूतावास त्यांच्याशी सतत संपर्कात असल्याचं परराष्ट्र मंत्रालयानं सांगितलं आहे.
ही बातमी वाचा:
महत्त्वाच्या बातम्या
