मृत्यू कमी करण्यासाठी रुग्णालयातच महामृत्यूंजय यज्ञ

रुग्णालयातील मृत्यूंचं प्रमाण कमी करण्यासाठी हैदराबादमध्ये डॉक्टरांनी हॉस्पिटलमध्येच महामृत्यूंजय यज्ञ केल्याचा प्रकार घडला आहे.

हैदराबाद : रुग्णालयातील मृतांचा आकडा कमी करण्यासाठी चक्क डॉक्टरांनीच महामृत्यूंजय यज्ञ केल्याचा धक्कादायक प्रकार समोर आला आहे. वरिष्ठ डॉक्टरसह स्टाफ मेंबरनी हैदराबादमधील गांधी हॉस्पिटलमध्ये हा यज्ञ केला. अकाली मृत्यू रोखण्यासाठी महामृत्यूंजय यज्ञ करण्याचा उल्लेख वेदांमध्ये आहे. त्याला अनुसरुन रुग्णालयातील गर्भवती आणि त्यांच्या बाळांचे मृत्यू थांबवण्यासाठी हे होमहवन करण्यात आलं. चार पुजारी, काही प्राध्यापक आणि विद्यार्थीही यात सहभागी होते. स्थानिक मीडियाने हा प्रकार उचलून धरल्यानंतर या प्रकरणाची चौकशी करण्यासाठी समिती स्थापन करण्यात आली आहे. हॉस्पिटलच्या वरिष्ठ अधिकाऱ्यांकडून डॉक्टरांना यापुढे असे प्रकार थांबवण्याची ताकीद देण्यात आली आहे.