...म्हणून त्या तरुणी लुंगीमध्ये

मुंबई : दक्षिण भारतामध्ये लुंगीला अनन्य साधारण महत्त्व आहे. शाहरुख खानच्या चेन्नई एक्सप्रेसने तर ही लुंगी सर्वसामान्याच्या घरापर्यंत पोहोचवली. पण सध्या सोशल मीडियावर हीच लुंगी चर्चेचा विषय ठरली आहे. सोशल मीडियावर व्हायरल होणाऱ्या एका फोटोमध्ये मुली चक्क लुंगीमध्ये दिसत आहेत. केरळमधील एका कॉलेजने मुलींना जीन्स घालण्यात बंदी घातल्याने मुलींनी लुंगी परिधान करून कॉलेजमध्ये प्रवेश केला, अशा अशयाचा मॅसेज या फोटोसोबत व्हायरल होत आहे.   सध्या हा फोटो सोशल मीडियावरील फेसबुक, ट्विटरवर मोठ्याप्रमाणावर व्हायरल होत आहे. या फोटोला प्रसिद्ध व्हीजे अँकर अर्चना विजया यांनीदेखील ट्वीट करून मुलींच्या या कृतीचे समर्थन केले आहे. तसेच प्रसिद्ध हेअर स्टइलिस्ट सपना यांनीही या फोटोवर प्रतिक्रीया नोंदवली आहे.   या फोटो मागचे सत्य जाणून घेण्यासाठी एबीपीची टीम केरळमध्ये दाखल झाली. तेव्हा त्यामागची वेगळी माहिती मिळाली. वास्तविक, हा फोटो केरळमधील कोणत्याही कॉलेजचा नसून, 2015 मध्ये प्रदर्शित झालेल्या श्रीमनथुडू या तेलगू चित्रपटातील आहे. या चित्रपटात तेलगू सुपरस्टार महेश बाबू यांची मुख्य भूमिका होती. या चित्रपटात महेश बाबू लुंगीमध्ये दिसले होते.   हा चित्रपट प्रदर्शित होताच महेश बाबूच्या चाहत्या तरुणींनी लुंगी परिधान करून आपले फोटो सोशल मीडियावर अपलोड केले होते. या फोटोमधीलच हा एक फोटो आहे. विशेष म्हणजे, या फोटोवरून एका तेलगू वेबसाइटवर लेख प्रकाशित करण्यात आला होता.