West Bengal Election: बंगालच्या सीएम ममता बॅनर्जींची राजकीय सल्लागार कंपनी I-PAC वर तीन महिन्यात दुसऱ्यांदा EDची छापेमारी; ऐन निवडणुकीत कारवाई

कंपनीचे सह-संस्थापक आणि संचालक ऋषी राज सिंग यांच्या कार्यालयाचाही या कारवाईत समावेश आहे. आय-पॅक पश्चिम बंगालच्या मुख्यमंत्री ममता बॅनर्जी यांच्या टीएमसी पक्षासाठी निवडणूक व्यवस्थापनाचे काम पाहते.

West Bengal Election

Source : X (Twitter)

West Bengal Election: अंमलबजावणी संचालनालयाने (ED) आज (2 एप्रिल) तीन महिन्यात दुसऱ्यांदा राजकीय सल्लागार कंपनी आय-पॅकच्या (I-PAC) तीन ठिकाणी छापे टाकले. हे पथक कंपनीच्या दिल्ली, बंगळूर आणि हैदराबाद येथील कार्यालयांमध्ये कारवाई करत आहे. अधिकाऱ्यांनीहे छापे कोळसा चोरी आणि घोटाळ्याच्या प्रकरणाशी संबंधित असल्याचा दावा केला आहे. त्यामुळे बंगालमध्ये निवडणूक प्रचार शिगेला पोहोचला असतानाच ईडी सुद्धा सक्रिय झाली आहे. कंपनीचे सह-संस्थापक आणि संचालक ऋषी राज सिंग यांच्या कार्यालयाचाही या कारवाईत समावेश आहे. आय-पॅक पश्चिम बंगालच्या मुख्यमंत्री ममता बॅनर्जी यांच्या टीएमसी पक्षासाठी निवडणूक व्यवस्थापनाचे काम पाहते.

तीन महिन्यात दुसऱ्यांदा छापेमारी

अनेक कोटी रुपयांच्या कोळसा चोरी घोटाळ्याशी संबंधित मनी लाँड्रिंगचे कथित आरोप आय-पॅक आणि संचालकावर आहेत. सीबीआयने या प्रकरणात 27 नोव्हेंबर 2020 रोजी एफआयआर दाखल केला होता. यामध्ये गुंतलेली एकूण रक्कम अंदाजे 2742 कोटी रुपये आहे. यापूर्वी जानेवारी महिन्यात, ईडीने आय-पॅकच्या कोलकाता येथील कार्यालयावर आणि संचालक प्रतीक जैन यांच्या घरावर छापे टाकले होते. अलीकडेच, ईडीने सिंग आणि जैन यांना त्यांचे जबाब नोंदवण्यासाठी समन्स बजावले होते. या नोटिसा रद्द करण्यासाठी दोघांनीही दिल्ली उच्च न्यायालयात धाव घेतली आहे. ते म्हणतात की ते बंगाल आणि तामिळनाडूतील निवडणुकांमध्ये व्यस्त आहेत.

8 जानेवारी रोजी अंमलबारी संचालनालयाच्या (ईडी) एका पथकाने कोलकातामधील गुलडॉन स्ट्रीटवरील प्रतीक जैन यांच्या निवासस्थानी आणि दुसऱ्या पथकाने सॉल्ट लेकमधील त्यांच्या कार्यालयावर छापा टाकला. जैन ममता बॅनर्जी यांच्यासाठी राजकीय रणनीती तयार करतात. सकाळी सहा वाजता छापा सुरू झाला, पण नंतर साडे अकराच्या सुमारास प्रकरण अधिक चिघळले. कोलकाता पोलीस आयुक्त प्रतीक यांच्या निवासस्थानी सर्वात आधी पोहोचले. त्यानंतर थोड्याच वेळात, मुख्यमंत्री ममता बॅनर्जी स्वतः त्यांच्या लाउडन स्ट्रीटवरील निवासस्थानी पोहोचल्या. ममता तिथे काही वेळ थांबल्या. जेव्हा त्या बाहेर आल्या, तेव्हा त्यांच्या हातात एक हिरवी फाईल दिसली. त्यानंतर त्यांनी आय-पॅक (I-PAC) कार्यालयाला भेट दिली. 

आय-पॅक कंपनीची पार्श्वभूमी काय?

• आय-पॅक (इंडियन पॉलिटिकल ॲक्शन कमिटी) ही एक राजकीय सल्लागार संस्था आहे. प्रतीक जैन संचालक आहेत.
• ही संस्था राजकीय पक्षांना निवडणूक रणनीती, डेटा-आधारित प्रचार मोहीम, माध्यम नियोजन आणि मतदार संपर्कासाठी मदत करते.
• आय-पॅक (I-PAC) पूर्वी सिटिझन्स फॉर अकाउंटेबल गव्हर्नन्स (CAG) म्हणून ओळखले जात होते. 
• स्थापना 2013 मध्ये प्रशांत किशोर आणि प्रतीक यांनी केली होती. नंतर त्याचे नाव बदलून आय-पॅक (I-PAC) ठेवण्यात आले.
• प्रशांत किशोर यांच्या जाण्यानंतर, प्रतीक  यांनी आय-पॅकची सूत्रे हाती घेतली.
• प्रशांत यांनी बिहारमध्ये जन सूरज पार्टीची स्थापना केली. आय-पॅक 2021 पासून तृणमूल काँग्रेसशी (TMC) संलग्न आहे.

इतर महत्वाच्या बातम्या