Chhattisgarh Naxal Attack: हल्ल्यात 28 हून अधिक नक्षलवादी ठार, सीआरपीएफच्या डीजींचा दावा

Chhattisgarh Naxal Attack: शहीद जवानांमध्ये बिजापूरचे 8 डीआरजी जवान, छत्तीसगडचे 6 एसटीएफ जवान, 7 कोबरा जवान आणि 1 बस्तरिया बटालियन आहेत.

सीआरपीएफचे डीजी कुलदीप सिंग

Chhattisgarh Naxal Attack : छत्तीसगडच्या विजापूरमध्ये नक्षलवादी हल्ल्याबाबत सीआरपीएफचे डीजी कुलदीप सिंग यांनी मोठा दावा केला आहे. कुलदीप सिंग म्हणाले आहेत की या हल्ल्यात 28 पेक्षा जास्त नक्षलवादी ठार झाल्याचं त्यांनी म्हटलं आहे. शनिवारी झालेल्या या मोठ्या हल्ल्यात 22 सैनिक शहीद झाले. कुलदीप सिंग यांनी सांगितले की अद्याप बेपत्ता जवान सापडलेला नाही.

28 नक्षलवादींचा खात्मा : कुलदीप सिंग
कुलदीप सिंग म्हणाले, "तुमच्याकडेही या संदर्भात माहिती आली असेल की नक्षलवाद्यांच्या 28 लोकांचा मृत्यू झाला आहे. मात्र, हे खरे आहे की ते ठार झालेल्या लोकांची संख्या स्वीकारत नाहीत. मात्र, ही संख्या नक्कीच 28 पेक्षा जास्त असेल आणि जखमींची संख्या त्यापेक्षा जास्त असेल."

कुलदीप सिंग म्हणाले, जवान जेव्हा जंगलातून शोधमोहीम राबवून परत येत होते तेव्हा नक्षलवाद्यांनी टेकलागुडामजवळ अचानक हल्ला चढवत सैनिकांवर गोळीबार सुरू केला. आमच्या सैन्याने रणनीतीनुसार लढाई सुरू केली. यात बरेच लोक जखमी झाले. "

बेपत्ता जवान नक्षलवाद्यांच्या ताब्यात असल्याची खात्री नाही : कुलदीप सिंग 
कुलदीपसिंग यांनी दिलेल्या माहितीनुसार, "शहीद जवानांमध्ये बिजापूरचे 8 डीआरजी जवान, छत्तीसगडचे 6 एसटीएफ जवान, 7 कोबरा जवान आणि 1 बस्तरिया बटालियन यांचा समावेश आहे. एक दवान अद्याप बेपत्ता आहे. तो नक्षलवाद्यांच्या ताब्यात असल्याची बातमी आहे, पण अद्याप याची खातरजमा झालेली नाही."

नक्षलवादी हल्ल्याचा मास्टरमाइंड कमांडर हिडमा असल्याचं स्पष्ट
छत्तीसगड नक्षलवादी हल्ल्याचा मास्टरमाइंड हा हिडमा नावाचा नक्षलवादी कमांडर असल्याचं स्पष्ट झालंय. छत्तीसगडमधील नक्षलग्रस्त बिजापूर आणि सुकमा जिल्ह्याच्या सीमेवर झालेल्या चकमकीत 22 जवान शहीद झाले आहेत, त्यापैकी 17 जवानांचे मृतदेह पोलिसांनी ताब्यात घेतले आहेत. तर इतर 31 जवान जखमी झाले आहेत. यंदाच्या वर्षातील नक्षलवाद्यांचा आतापर्यंतचा सर्वात मोठा हल्ला आहे.

ही घटना घडायच्या आधी हिडमा टेकुलगुडा आणि जुनागुडा गावाच्या जवळ असल्याची माहिती सुरक्षा दलांना मिळाली होती. नक्षलींच्या मिलिटरी बटालियनचा मुख्य कमांडर त्या भागात असल्याची माहिती मिळाल्यानंतर सुरक्षा दलांनी एकत्रित मोहीम राबवून हिडमाला जेरबंद करण्याची योजना आखली होती. त्यासाठीच सीआरपीएफ, बीजपुर पोलिसांचे डीआरजी युनिट तसेच एसटीएफचे शेकडो जवान बीजपुर आणि सुकमा जिल्ह्यातून टेकुलगुडा आणि जुनागुडा च्या दिशेने निघाले होते.