अरविंद केजरीवाल सहा मंत्र्यासह घेणार शपथ, रामलीला मैदानावर शपथविधी सोहळा

अरविंद केजरीवाल आज दिल्लीच्या मुख्यमंत्री पदाची तिसऱ्यांदा शपथ घेणार आहेत. त्यांच्यासोबत सहा मंत्री देखील शपथ घेणार आहेत. या शपथविधी सोहळ्याचं पंतप्रधान नरेंद्र मोदी यांनादेखील आमंत्रण देण्यात आलं आहे.

नवी दिल्ली : दिल्ली विधानसभा निवडणुकीतील मोठ्या विजयानंतर आम आदमी पक्षाचे अध्यक्ष अरविंद केजरीवाल आज मुख्यमंत्रीपदाची शपथ घेणार आहेत. अरविंद केजरीवाल यांच्यासोबत सहा मंत्रीदेखील शपथ घेणार आहेत. या सहा मंत्र्यांमध्ये मनीष सिसोदिया, सत्येंद्र जैन, गोपाल राय, कैलाश गहलोत, इमरान हुसेन आणि राजेंद्र गौतम यांचा समावेश आहे. 16 फेब्रुवारी म्हणजे आज रामलीला मैदानात सकाळी 10 वाजता शपथविधी सोहळा सुरु होईल, तर 12.15 वाजता अरविंद केजरीवाल मुख्यमंत्रपदाची शपथ घेतील.

अरविंद केजरीवाल यांनी पंतप्रधान नरेंद्र मोदी यांना देखील शपथविधी सोहळ्याला आमंत्रित केलं आहे. मात्र पंतप्रधान नरेंद्र मोदी या सोहळ्याला येणार की नाही हे अद्याप स्पष्ट झालेलं नाही. आम आदमी पक्षाच्या वतीने शुक्रवारी पंतप्रधान नरेंद्र मोदी यांना आमंत्रणाचं पत्र पाठवलं आहे. नियोजित कार्यक्रमानुसार, पंतप्रधान नरेंद्र मोदी रविवारी वाराणसी येथे असणार आहेत. 'आप'च्या गोपाल राय यांनी दिलेल्या माहितीनुसार, दिल्लीतील सर्व सात खासदारांना आणि भाजपच्या आठ नवनिर्वाचित आमदारांना या शपथविधी सोहळ्याचं आमंत्रण देण्यात आलं आहे.

इतर कोणत्याही राज्याचे मुख्यमंत्री किंवा नेत्यांना या शपथविधी सोहळ्याचं आमंत्रण दिलं नाही, कारण हा सोहळा दिल्लीसाठी असणार आहे. अरविंद केजरीवाल यांनी वृत्तपत्रांमध्ये जाहिरातींद्वारे दिल्लीकरांना शपथविधी सोहळ्यात उपस्थित राहण्याचं आवाहन केलं आहे.

शपथविधी सोहळ्याच्या पार्श्वभूमीवर रामलीला मैदानात जोरदार तयारी सुरु आहे. या कार्यक्रमाला पोलिसांचा चोख बंदोबस्त आहे. एका पोलीस अधिकाऱ्याने दिलेल्या माहितीनुसार, या कार्यक्रमाला तीन हजार पोलीस कर्मचारी तैनात केले जाणार आहेत. सुरक्षेच्या कारणास्तव परिसरात सीसीटीव्ही कॅमेरे लावण्यात येणार आहेत. दिल्ली सरकार, दिल्ली महापालिका, सार्वजनिक बांधकाम विभाग मिळून या सोहळ्याची तयारी करत आहेत.

दिल्ली विधानसभेवर 'आप'ची एकहाती सत्ता

दिल्ली विधानसभा निवडणुकीच्या निकालात आपने 70 पैकी 62 जागा जिंकत एकहाती सत्ता मिळवली आहे. भाजपने उर्वरित 8 जागा ताब्यात घेतल्या, तर दिल्लीवर 25 वर्ष सत्ता गाजवलेल्या काँग्रेसला निवडणुकीत एकही जागा जिंकता आलेली नाही. आपच्या मागील वेळेपेक्षा चार जागा कमी झाल्यात. तर, भाजपच्या चारने वाढल्या आहेत. मात्र, काँग्रेस सलग दुसऱ्यांदा अपयशी ठरली आहे.