Chhatrapati Sambhajinagar: धक्कादायक! नातलग असलेल्या 3 बालकांना अचानक लुळेपणा अन् अशक्तपणा, छत्रपती संभाजीनगरमधील घटना, आरोग्य यंत्रणा हादरली

Chhatrapati Sambhajinagar: गावात पिण्यासाठी वापरल्या जाणाऱ्या पिण्याच्या पाण्याचे स्त्रोत हे सार्वजनिक पाणीपुरवठा यंत्रणेचे नळ आहे. ते पाणी तूर्त पिण्यास न वापरण्याच्या सूचना आरोग्य विभागाने दिल्या आहेत.

Chhatrapati Sambhajinagar

Source : ANI

छत्रपती संभाजीनगर: छत्रपती संभाजीनगरच्या फुलंब्री तालुक्यातील खंबाटवस्ती पाथ्री येथे 9 वर्षे व 11 वर्षे वयाच्या 3 बालकांना लुळेपणा, अशक्तपणा आल्याने आरोग्य यंत्रणा हादरली आहे. या तिन्ही मुलांवर छत्रपती संभाजीनगरात उपचार सुरू असून, तिन्ही मुले नातेसंबंधात आहेत. आरोग्य यंत्रणेने गावात सर्वेक्षणासह विविध खबरदारीच्या उपाययोजना सुरू केल्या आहेत. या घटनेनंतर खडबडून जागी झालेल्या जिल्हा परिषदेच्या आरोग्य विभागातर्फे खंबाटवस्ती पाथ्री येथे सर्वेक्षण हाती घेण्यात आले. यात या 3 मुलांव्यतिरिक्त इतर रुग्ण आढळून आलेले नाहीत.

या घटनेबाबत मिळालेल्या माहितीनुसार, सर्वप्रथम 9 वर्षीय मुलाला 12 जुलैला अचानक लुळेपणा आणि अशक्तपणा आला. आधी गावात उपचार घेण्यात आले. मात्र, तरीदेखील मुलांची प्रकृती खालावत असल्यामुळे मुलाला छत्रपती संभाजीनगरातील रुग्णालयात दाखल करण्यात आलं. त्यानंतर 16 जुलै रोजी 11 वर्षीय मुलालाही अचानक अशक्तपणा आल्याने त्यालाही उपचारासाठी दाखल केले. तर, 30 महिन्यांच्या बालकाला 17 जुलैला असाच त्रास सुरू झाला, त्यानंतर त्यालाही उपचारासाठी भरती करण्यात आलं. दोन मुलांवर 'पीआयसीयू'त आणि 30 महिन्यांच्या बालकावर जनरल वॉर्डात उपचार सुरू आहेत. या घटनेनंतर जिल्हा परिषदेच्या आरोग्य विभागातर्फे वडोदबाजार प्राथमिक आरोग्य केंद्रांतर्गत असलेल्या खंबाटवस्ती, पाथ्री येथे सर्वेक्षण हाती घेण्यात आलं आहे. या त्रास होत असलेल्या मुलांना सारखीच लक्षणे असल्यामुळे तिन्ही मुलांवर छत्रपती संभाजीनगरातील एका खासगी रुग्णालयात उपचार सुरू असून, हे सर्वजण एकमेकांच्या नात्यातील असल्याची माहिती समोर आली आहे.

पाण्याचा वापर थांबविला

गावात पिण्यासाठी वापरल्या जाणाऱ्या पिण्याच्या पाण्याचे स्त्रोत हे सार्वजनिक पाणीपुरवठा यंत्रणेचे नळ आहे. ते पाणी तूर्त पिण्यास न वापरण्याच्या सूचना आरोग्य विभागाने दिल्या.

आरोग्य विभागाने केली 'अक्यूट फ्लॅसिड पॅरालिसिस' म्हणून नोंद

या मुलांची आरोग्य विभागाने 'अक्यूट फ्लॅसिड पॅरालिसिस' (एएफपी) संशयित रुग्ण म्हणून नोंद केली आहे. 'अक्यूट फ्लॅसिड पॅरालिसिस'ची स्थिती ही पोलिओ, गुलेन-बॅरे सिंड्रोम (जीबीएस) आजारासह अन्य काही आजारांमध्ये आढळते.