मोठी बातमी! काळेंचा 'विक्रम'! मराठवाडा शिक्षक मतदारसंघात राष्ट्रवादीचा विजयी चौकार
Marathwada Teacher constituency Viram kale wins : राष्ट्रवादीचे उमेदवार विक्रम काळे यांनी चौथ्यांदा विजयाचा गुलाल उधळला आहे. तर भाजपचे उमेदवार किरण पाटील यांना पराभवाचा सामना करावा लागला आहे.
Marathwada Teacher constituency Viram kale wins : मराठवाड्यासह राज्याचे लक्ष लागून असलेल्या औरंगाबाद शिक्षक मतदारसंघाचा अंतिम निकाल हाती आला आहे. ज्यात राष्ट्रवादीचे उमेदवार विक्रम काळे (vikram kale) यांनी चौथ्यांदा विजयाचा गुलाल उधळला आहे. तर भाजपचे उमेदवार किरण पाटील (Kiran patil) यांना पराभवाचा सामना करावा लागला आहे. विक्रम काळे यांना 23 हजार 580 मतं मिळाली असून, किरण पाटलांना 16 हजार 643 मते मिळाली आहे. ज्यामुळे विक्रम काळे यांचा 6 हजार 937 मतांनी विजय झाला आहे.
सकाळी आठ वाजेपासून मराठवाडा शिक्षक मतदार संघाच्या मतमोजणीला सुरुवात झाली होती. मात्र पहिल्या पसंतीच्या मतमोजणीत कोणत्याही उमेदवाराला कोटा पूर्ण करता आला नसल्याने, दुसऱ्या पसंतीची मतमोजणी करण्यात आली. दरम्यान दुसऱ्या पसंतीच्या मतमोजणीत विक्रम काळे यांनी सर्वाधिक 23 हजार 580 मत मिळवल्याने त्यांचा विजय झाला आहे. विशेष म्हणजे गेल्या 18 वर्षांपासून मराठवाडा शिक्षक मतदारसंघाचे नेतृत्व करणाऱ्या विक्रम काळे यांचा हा सलग चौथा विजय आहे.
महाविकास आघाडीकडून जल्लोष
दुसऱ्या पसंतीच्या मतमोजणीत सुरुवातीपासूनच विक्रम काळे यांनी आघाडी घेतली होती. पुढे आघाडी मतांचा आकडा वाढत गेला. त्यामुळे शेवटच्या टप्प्यात देखील काळे यांच्या मताची आघाडी कायम होती. त्यामुळे निकालापूर्वीच महाविकास आघाडीकडून जल्लोष साजरा करण्यात आला. ठाकरे गटाचे नेते तथा माजी खासदार चंद्रकांत खैरे आणि राष्ट्रवादीचे आमदार सतीश चव्हाण यांनी विक्रम काळे यांना विजयाच्या शुभेच्छा दिल्या. तसेच काळे यांच्या समर्थकांकडून गुलाल उधळत विजय साजरा करण्यात आला. तर काही कार्यकर्त्यांनी आतिषबाजी करत आनंद साजरा केला.
विक्रम काळे यांचा चौथ्यांदा विजय!
कधीकाळी मराठवाडा शिक्षक संघाच्या ताब्यात असणाऱ्या या मतदारसंघात 2004 मध्ये राष्ट्रवादीचे वसंत काळे आपल्या ताब्यात घेत, राष्ट्रवादीचा झेंडा फडकवला. तेव्हापासून हा मतदारसंघ कायम राष्ट्रवादीकडेच राहिला आहे. तर 6 जानेवारी 2010 ते 5 डिसेंबर 2016 पर्यंत विक्रम काळे या मतदारसंघात विजयी होऊन महाराष्ट्र विधान परिषदेत पहिल्यांदा गेले. त्यानंतर 8 फेब्रुवारी 2017 मध्ये पुन्हा दुसऱ्या वेळेस निवडुन आले. त्यानंतर 2017 ते 2022 पर्यंत ते तिसऱ्यांदा औरंगाबाद शिक्षक मतदारसंघातून निवडणून आले होते. आता पुन्हा एकदा त्यांनी विजय मिळवत चौथ्यांदा मराठवाडा शिक्षक मतदारसंघ राष्ट्रवादीच्या ताब्यात ठेवला आहे.
भाजपकडूनही जोरदार प्रयत्न
राष्ट्रवादीचा बालेकिल्ला असलेला मराठवाडा शिक्षक मतदारसंघ आपल्या ताब्यात घेण्यासाठी भाजपकडून देखील जोरदार प्रयत्न करण्यात आले. यासाठी काँग्रेसमधून भाजपात आलेले किरण पाटील यांना उमेदवारी देण्यात आली. किरण पाटील यांच्या प्रचारासाठी खुद्द उपमुख्यमंत्री देवेंद्र फडणवीस यांनी प्रचार सभा घेतली. तर भाजप प्रदेशाध्यक्ष चंद्रशेखर बावनकुळे यांनी मराठवाड्यातील वेगवेगळ्या जिल्ह्यात बैठका घेतल्या. मात्र असे असले तरीही भाजप उमेदवार किरण पाटील यांना पराभव स्वीकारावा लागला आहे.
ही बातमी देखील नक्की वाचा
महत्त्वाच्या बातम्या
ट्रेंडिंग न्यूज
