एक्स्प्लोर

Nylon Manja: नायलॉन मांजाविरोधात औरंगाबाद ग्रामीण पोलिसांकडून 23 विशेष पथकांची स्थापना; तक्रारीसाठी या क्रमांकावर साधा संपर्क

Aurangabad Nylon Manja News: नायलॉन मांजा वापरणाऱ्यांविरोधात औरंगाबाद ग्रामीण पोलिसांनी 23 विशेष पथकांची स्थापना केली असून तक्रारींसाठी त्यांचे क्रमांकही जाहीर करण्यात आले आहेत.

By : मोसीन शेख | Edited By: श्रीकांत भोसले | Updated at : 03 Jan 2023 09:00 PM (IST)

Aurangabad rural police form special squad for taking action against nylon manja dealers and users Nylon Manja: नायलॉन मांजाविरोधात औरंगाबाद ग्रामीण पोलिसांकडून 23 विशेष पथकांची स्थापना; तक्रारीसाठी या क्रमांकावर साधा संपर्क

Aurangabad News: मानवी व प्राणी जिवीतास धोकादायक ठरणाऱ्या नायलॉन मांजाविरोधात (Nylon Manja) औरंगाबाद ग्रामीण पोलिसांकडून (Aurangabad Rural Police) 23 विशेष पथकांची स्थापना करण्यात आली आहे. तर नायलॉन मांजा खरेदी आणि विक्री करणाऱ्या दुकानदारांच्या विरोधात या विशेष पथकाकडून कारवाई करण्यात येणार आहे. औरंगाबाद ग्रामीण जिल्हयातील सर्व 23 पोलीस ठाण्यांमध्ये या विशेष पथकाची स्थापना करण्यात आली असून नायलॉन मांजा खरेदी आणि विक्री करणाऱ्या व्यक्तीबद्दल काही माहिती असल्यास त्याबाबत तात्काळ पोलीस नियंत्रण कक्षास 112 या क्रमांकावर संपर्क साधुन माहिती देण्याचे आवाहन ग्रामीण पोलीस अधीक्षक मनीष कलवानीया यांनी केले आहे. सोबतच माहिती देणाऱ्या व्यक्तींचे नाव गोपनीय ठेवण्यात येईल, असेही पोलिसांकडून सांगण्यात आले आहे.

शहर पोलीस पोलिसांकडूनही पथकाची स्थापना

दरम्यान औरंगाबाद शहर पोलिसांनी (Aurangabad City Police) देखील याबाबत माहिती देतांना, नायलॉन मांजा विक्री रोखण्यासाठी अधिकारी आणि कर्मचारी यांचे एक विशेष पथक तयार केली असल्याची माहिती दिली आहे. या पथकाकडून नायलॉन मांजा विक्रेत्यांवर छापा टाकला जाईल. तर नायलॉन मांजा विक्रीबाबत कोणतीही माहिती असल्यास नागरिकांनी औरंगाबाद शहर नियंत्रण कक्ष क्रमांक 0240-2240500 वर याबाबत माहिती देण्याचे आवाहन औरंगाबाद पोलीस आयुक्त निखिल गुप्ता यांनी केले आहे.