मी पुन्हा सहा सिक्सर ठोकणार : युवराज सिंह

मोहाली :  कॅन्सरला हरवलेल्या टीम इंडियाचा सिक्सर किंग युवराज सिंहने कॅन्सरग्रस्त मुलांची भेट घेतली. युवीने काल मोहालीत कॅन्सरशी लढा देत असलेल्या 17 मुलांची भेट घेऊन त्यांच्याशी दिलखुलास गप्पा मारल्या.   यावेळी त्याने पुन्हा सहा चेंडूत सहा षटकार ठोकण्याचा पराक्रम गाजवू, असं आश्वासन चिमुकल्यांना दिलं.   आयपीएलमध्ये युवराजने पंजाबविरुद्धच्या सामन्यात सनरायझर्स हैदराबादकडून खेळताना 24 चेंडूत 42 धावा कुटल्या. त्यामुळे हैदराबादने हा सामना सात विकेट्स राखून जिंकला.   या सामन्यानंतर युवराजने कॅन्सरपीडित मुलांची भेट घेतली. 17 चिमुकल्यांसोबतच्या चर्चेदरम्यान एका आठ वर्षीय चिमुकल्याने युवराजला प्रश्न विचारला. तो म्हणाला, तू पुन्हा सहा सिक्सर कधी मारणार? त्यावर युवी म्हणाला,"तुम्ही प्रार्थना करा, मी पुन्हा सहा सिक्सर ठोकेन"   या गप्पांनंतर युवराजने चिमुकल्यांसोबत सेल्फी काढला.   दरम्यान, युवराजने 2007 मध्ये टी 20 वर्ल्डकपमध्ये इंग्लंडच्या स्टुअर्ट ब्रॉडच्या गोलंदाजीवर 6 चेंडत 6 षटकार ठोकले होते.