The Kerala Story 2 : प्रदर्शनाच्या एक दिवस आधी ‘द केरळ स्टोरी 2’ला हायकोर्टाचा दणका, मेकर्सचे धाबे दणाणले
ट्रेलर आणि टीझरमधून राज्याची प्रतिमा चुकीच्या पद्धतीने दाखवल्याचा आरोप करण्यात आला आहे.
The Kerala Story 2 : वादाच्या भोवऱ्यात अडकलेल्या द केरला स्टोरी 2 गोज बियॉन्ड या चित्रपटाच्या प्रदर्शनाला केरळ हायकोर्टाने अंतरिम स्थगिती दिली आहे. यामुळे चित्रपट निर्मात्यांचे धाबे दणाणले आहे . 27 फेब्रुवारीला रिलीज होणाऱ्या या चित्रपटाच्या टीझरमध्ये सार्वजनिक धारणा बिघडवण्याची आणि सामुदायिक सलोखा धोक्यात आणण्याची क्षमता असल्याचे न्यायालयाने नमूद केले. (The Kerala story 2 controversy)
लाइव्ह लॉच्या वृत्तानुसार, न्यायालयाने स्पष्ट केले की टीझरमधील मजकूर हा चित्रपटाचाच भाग असल्याचे मान्य करण्यात आले आहे आणि त्यामुळे त्याचा परिणाम समाजावर होऊ शकतो. तसेच, चित्रपटाला प्रमाणपत्र देताना Central Board of Film Certification (CBFC) ने मार्गदर्शक तत्त्वांचे पालन केले का, यावरही न्यायालयाने प्राथमिक शंका व्यक्त केली.
Kerala story 2 :कोर्टात नेमकं झालं काय ?
सीबीएफसीने या चित्रपटाला UA 16+ प्रमाणपत्र दिले होते. मात्र याचिकाकर्त्यांनी टीझर आणि ट्रेलरमधील कथित भडक आशयावर आक्षेप घेत न्यायालयात धाव घेतली. निर्मात्यांनी प्रचार व्हिडिओतील वादग्रस्त दृश्ये अंतिम चित्रपटात नसतील, असा दावा केला होता. पूर्वी सुनावणीदरम्यान न्यायालयाने चित्रपट पाहण्याची इच्छा व्यक्त केली होती; मात्र निर्मात्यांनी स्क्रीनिंग नाकारल्याने न्यायालयाने टीझर आणि ट्रेलरच्या प्रतिलिपींवरच विचार केला.
ऑनलाइन प्रदर्शित होणाऱ्या टीझर-ट्रेलरवर सीबीएफसीचा अधिकार आहे का, असा सवालही न्यायालयाने उपस्थित केला. यावर सीबीएफसीने इंटरनेटवरील मजकुरावर आपला अधिकार नसल्याचे सांगितले. निर्मात्यांच्या अभिव्यक्ती स्वातंत्र्याच्या युक्तिवादालाही न्यायालयाने फेटाळले. कायदा-सुव्यवस्था बिघडवण्याची किंवा सामाजिक सलोखा धोक्यात आणण्याची शक्यता असलेला मजकूर हा संविधानाच्या कलम 19(1)(a) अंतर्गत संरक्षित स्वातंत्र्यात येत नाही, असे न्यायालयाने स्पष्ट केले. न्यायमूर्ती बेचू कुरियन थॉमस यांनी सीबीएफसीला याचिकाकर्त्यांच्या प्रतिनिधित्वावर दोन आठवड्यांत निर्णय घेण्याचे निर्देश दिले आहेत. चित्रपटाच्या कथित वादग्रस्त मांडणीविरोधात न्यायालयात तीन याचिका दाखल करण्यात आल्या आहेत.
‘प्रोपगंडा’च्या आरोपांवर मौन
चित्रपटाला काही जणांनी ‘प्रोपगंडा मूव्ही’ असेही म्हटले आहे. विशेषतः अनुराग कश्यप आणि प्रकाश राज यांच्या टीकेबाबत विचारले असता मेकर्सनी थेट प्रतिक्रिया देणे टाळले. दरम्यान, चित्रपटाविरोधात केरळ हायकोर्टात याचिका दाखल झाल्याची माहिती आहे. ट्रेलर आणि टीझरमधून राज्याची प्रतिमा चुकीच्या पद्धतीने दाखवल्याचा आरोप करण्यात आला आहे.
महत्त्वाच्या बातम्या
