Vinay Mandke News: 'हमारा बजाज'... जाहिरातीतून 90 मधील प्रेक्षकांच्या मनावर कोरलेला आवाज हरपला; विनय मांडकेंचं निधन, मुंबईत घेतला अखेरचा श्वास

Vinay Mandke Death Hamara Bajaj Singer: प्रसिद्ध गायक विनय मांडके यांचं निधन झालं आहे. संगीत विश्वावर शोककळा पसरली आहे.

Vinay Mandke Passes Away

Source : canva

Vinay Mandke Passes Away: संगीत विश्वातून एक दु:खद बातमी समोर येत आहे.  प्रसिद्ध गायक विनय मांडके (Vinay Mandke) यांचं निधन झालं आहे.  वयाच्या 73 व्या वर्षी त्यांनी अखेरचा श्वास घेतला. त्यांचा दादर येथील त्यांच्या निवासस्थानी 1 एप्रिल रोजी निधन झाले असल्याची माहिती आहे. त्यांनी आपल्या कारकि‍र्दीत अनेक जिंगल्ससाठी आवाज दिला होता. विनय मांडके यांनी आपल्या कारकि‍र्दीत दीडशेहून अधिक चित्रपटांसाठी पार्श्वगायन केलं. तसेच सात हजारांहून अधिक  जिंगल्स (Singer) गायले.  विशेष म्हणजे, 'हमारा बजाज' (Humara Bajaj) या जिंगलमुळे त्यांना घराघरांत ओळख मिळाली.  विनय मांडके यांच्या पश्चात पत्नी,  सून, मुलगा आणि नातू असा परिवार आहे.  दरम्यान, त्यांच्या निधनानंतर संगीत क्षेत्रातून हळहळ व्यक्त होत आहे.   मिळालेल्या माहितीनुसार, त्यांच्या पार्थिवावर शिवाजी पार्क स्मशानभूमीत  अंत्यसंस्कार करण्यात आले आहे. 

विनय मांडकेंची जाहिरात आणि चित्रपट क्षेत्रात चमकदार कामगिरी (Singer Vinay Mandke Death)

विनय मांडके यांनी आपल्या कारकि‍र्दीत अनेक दिग्गजांसोबत काम केलं. तसेच जाहिरात आणि चित्रपट क्षेत्रातही उल्लेखनीय आणि चमकदार कामगिरी केली.  दिवंगत अभिनेते लक्ष्मीकांत बेर्डे यांच्या चित्रपटांमध्येही त्यांनी आवाज दिला आहे. त्यांना लक्ष्याचा आवाज असेही म्हटले जाते.    कल्याणजी - आनंदजी,  बप्पी लहिरी,  शंकर - जयकिशन यांसह  इतर दिग्गज संगीत दिग्दर्शकांसह कार्यक्रम करण्याची सुवर्णसंधी मिळाली. जाहिरात आणि चित्रपटात पार्श्वगायन करुन आपली ओळख आणखी मजबूत केली. 

ऑर्केस्ट्रा  कार्यक्रमातही आपली कला सादर (Jingles Singer Vinay Mandke)

विनय मांडके केवळ जाहिरात, पार्श्वगायन, स्टुडिओपुरतेच मर्यादित राहिले नाही.  त्यांनी आपल्या आयुष्यात लाइव्ह ऑर्केस्ट्रा  कार्यक्रमातही आपली कला सादर केली.  गायकांना आपल्या गायनातून त्यांनी कायम प्रेक्षकांचं मनोरंजन केलं.   विनय यांनी, व्हिआयपी लगेज (कल भी, आज भी..), एमडीएच मसाला,  विको वज्रदंती, लिप्टन टी,  टाटा स्टील, प्रेस्टिज कुकर, लाईफबॉय,  निरमा,  व्हिल, ओके साबण आणि फेव्हिकॉल  यांसारख्या जाहिरातींसाठी काम केलं. 

विनय मांडके यांच्या निधनानंतर संगीत क्षेत्रात एक मोठी पोकळी निर्माण झाली असल्याचं बोललं जात आहे.  दरम्यान , त्यांच्या निधनाची बातमी समोर येताच चाहत्यांनी दु:ख व्यक्त केले आहे. जरी आज विनय मांडके आपल्यासोबत नसले तरी, ते गाणं आणि जिंगल्सच्या माध्यमातून कायम जिवंत राहतील.  

महत्त्वाच्या इतर बातम्या: