Savalyachi Vari: 'सावळ्याची वारी'मधून विठ्ठलभक्तीचा सुरेल गजर; श्रद्धेचा भावस्पर्शी अनुभव देणारं भक्तिगीत
Savalyachi Vari: आषाढी वारीच्या निमित्ताने प्रदर्शित झालेलं 'सावळ्याची वारी' हे भक्तिगीत प्रत्येक विठ्ठलभक्ताला भक्तिरसात रंगवणारं ठरत आहे.
Savalyachi Vari: वारी सोहळ्याचं भक्तिमय वातावरण, विठ्ठल नामाचा अखंड गजर आणि वारकऱ्यांच्या अढळ श्रद्धेचा भावस्पर्शी अनुभव देणारं 'सावळ्याची वारी' हे नवीन भक्तिगीत नुकतंच प्रदर्शित झालं आहे. सुरेल संगीत, अर्थपूर्ण शब्द आणि वारीच्या परंपरेचं जिवंत चित्रण यामुळे हे गीत रसिकांच्या विशेष पसंतीस उतरत आहे.
या भक्तिगीताला संगीतकार प्रफुल्ल प्रकाश यांनी संगीतबद्ध केलं असून, त्यांनीच आपल्या दमदार आणि भावपूर्ण आवाजात हे गीत साकारलं आहे. विठ्ठलभक्तीचा उत्साह, वारकऱ्यांचा आनंद आणि पालखी सोहळ्याचं दिव्य वातावरण संगीताच्या माध्यमातून प्रेक्षकांपर्यंत पोहोचवण्याचा प्रयत्न या गीतातून करण्यात आला आहे.
या गाण्याचे बोल कृष्णा वाळके यांनी शब्दबद्ध केले असून, वारीची परंपरा, भक्ती आणि विठ्ठलप्रेम यांचं सुंदर दर्शन त्यांच्या लेखणीतून घडतं. तर सागर वाळके यांनी या गाण्याचं संकलन केलं असून, गीताची दृश्यात्मक मांडणीही आकर्षक पद्धतीने करण्यात आली आहे.
आषाढी वारीच्या निमित्ताने प्रदर्शित झालेलं 'सावळ्याची वारी' हे भक्तिगीत प्रत्येक विठ्ठलभक्ताला भक्तिरसात रंगवणारं ठरत आहे. टाळ-मृदंगाचा निनाद, वारकऱ्यांचा उत्साह आणि विठ्ठलनामाचा गजर यामुळे हे गाणं वारीचा आध्यात्मिक अनुभव घरबसल्या देतं.
या गाण्याबद्दल गीतकार कृष्णा वाळके म्हणाले, "सावळ्याची वारी' हे गीत साकारताना वारीचा भक्तिमय उत्साह आणि विठ्ठलभक्तीचा भाव प्रत्येक सुरातून व्यक्त करण्याचा प्रयत्न केला आहे. हे गीत प्रत्येक विठ्ठलभक्ताच्या मनाला नक्कीच स्पर्श करेल, असा विश्वास आहे, वारी ही केवळ यात्रा नाही, तर श्रद्धा, समर्पण आणि भक्तीचा अखंड उत्सव आहे. त्या भावनेला शब्दांत मांडण्याचा प्रामाणिक प्रयत्न या गीतातून केला आहे. रसिकांना हे गीत नक्कीच आवडेल, अशी आशा आहे."
महत्त्वाच्या बातम्या
