Sonam Kapoor : बॉलिवूड अभिनेत्री सोनम कपूरच्या घरावर दरोडा, दागिन्यांसह 1.41 कोटींची चोरी

Sonam Kapoor : पोलीस अधिकाऱ्यांनी दिलेल्या माहितीनुसार, घरात जवळपास 25 नोकर आणि 9 केअरटेकर आहेत. सर्वांची चौकशी केली जात आहे, मात्र अद्यापपर्यंत आरोपींचा सुगावा लागलेला नाही.

Written By : एबीपी माझा वेब टीम | Edited By: हर्षदा भिरवंडेकर | Updated at : 09 Apr 2022 08:13 AM (IST)

Sonam Kapoor

Sonam Kapoor : बॉलिवूड अभिनेत्री सोनम कपूरच्या (Sonam Kapoor) घरात जबर चोरी झाली असून, चोरट्यांनी घरातून 1.41 कोटी रुपयांचे दागिने आणि रोख रक्कम चोरून नेली आहे. याप्रकरणी सोनम कपूरच्या सासूने तुघलक रोड पोलीस ठाण्यात तक्रार दिली आहे. तुघलक रोड पोलीस ठाण्यात गुन्हा दाखल करून तपास सुरू केला आहे. हे प्रकरण अत्यंत हायप्रोफाईल असल्याने नवी दिल्ली जिल्ह्यातील वरिष्ठ अधिकाऱ्यांनी गांभीर्याने घेत अनेक पथके तयार केली आहेत.

सोनं कपूरच्या घरात 25 नोकरांशिवाय 9 केअर टेकर, ड्रायव्हर आणि माळी आणि इतर कर्मचारीही काम करतात. पोलीस सर्वांची चौकशी करत आहेत. क्राइम टीम व्यतिरिक्त एफएसएल टीम पुरावे गोळा करण्यात गुंतलेली आहे. अद्यापपर्यंत आरोपींचा सुगावा लागलेला नाही. हे प्रकरण हायप्रोफाईल असल्याने पोलिसांनी हे प्रकरण गुप्त ठेवले होते. मात्र, हे प्रकरण नुकतेच समोर आले आहे.

पोलीस तपास सुरु

नवी दिल्लीतील एका वरिष्ठ अधिकाऱ्याने दिलेल्या माहितीनुसार, सोनम कपूरचे सासरे, 22 अमृता शेरगिल मार्ग येथे राहतात. येथे त्यांच्या आजी सासू सरला आहुजा (86), मुलगा हरीश आहुजा आणि सून प्रिया आहुजा यांच्यासोबत राहतात. सरला आहुजा यांनी व्यवस्थापक रितेश गौरासोबत 23 फेब्रुवारी रोजी तुघलक रोड पोलीस स्टेशन गाठले आणि त्यांच्या खोलीतील कपाटामधून दागिने आणि रोकड चोरीला गेल्याची तक्रार केली. 11 फेब्रुवारी रोजी कपाट तपासले असता दागिने व रोख रक्कम गायब होती. सरला आहुजा यांनी आपल्या तक्रारीत म्हटले आहे की, त्यांनी दोन वर्षांपूर्वी दागिने तपासून कपाटात ठेवले होते.

पोलीस आता मागील एक वर्षाचे सीसीटीव्ही फुटेज तपासत आहेत. तुघलक रोड पोलीस ठाण्याचे अनेक पोलीस या प्रकरणाचा कसून शोध घेत आहेत. सोनम कपूरचा पती आनंद आहुजा काका सुनीलसोबत कॅलिफोर्नियामध्ये राहतो. तो वारंवार इथे येत-जात असतो. आहुजा कुटुंबाची साई एक्सपोर्ट्स या कपड्यांची कंपनी आहे.

शिलाई मशीनपासून कंपनीची सुरुवात

पोलीस अधिकाऱ्यांनी सांगितले की, सरला आहुजा 1961 मध्ये शिलाई मशीनने महिलांचे कपडे शिवत असत. एकदा त्यांनी महिलांचे कपडे शिवले होते. एका ग्राहकाला हे कपडे खूप आवडले. या ग्राहकाने आणखी काही महिलांचे कपडे शिवून घेतले. यानंतर सरला आहुजाचा कपड्यांचा व्यवसाय सुरू झाला. आज त्यांचा जगभरात कपड्यांचा व्यवसाय आहे.

हेही वाचा :