विधान परिषदेवरच्या राज्यपाल नियुक्त आमदारकीसाठी प्रसाद कांबळींची शिफारस

प्रसाद कांबळी हे मच्छिंद्र कांबळी यांचे पुत्र. मच्छिंद्र कांबळी यांच्यानंतर भद्रकाली या संस्थेची सूत्रं त्यांनी आपल्या हाती घेतली आणि प्रयोगशील निर्माता म्हणून आपला लौकिक कमावला आहे.

मुंबई : विधान परिषदेवरच्या राज्यपाल नियुक्त आमदारकीसाठी नाट्यपरिषदेचे अध्यक्ष आणि भद्रकाली या संस्थेचे नवनाथ उर्फ प्रसाद कांबळी यांच्या नावाची शिफारस करण्यात आली आहे. ही शिफारस इतर कोणी केली नसून सध्या नाट्यपरिषदेवर असलेल्या पदाधिकाऱ्यांमार्फतच करण्यात आली आहे. राष्ट्रवादीचे नेते सुनील तटकरे यांच्याकडे याबाबत चर्चा झाली असून, तसे लेखी पत्र देण्यात आल्याचं कळतं.

गेल्या तीन महिन्यांपासून नाटकधंदा पूर्ण बंद आहे. रंगमंच कामगारापासून रंगमंच गाजवणाऱ्या कलाकारापर्यंत प्रत्येकजण घरात बसून आहे. अशावेळी राष्ट्रवादी पक्षाने नाट्यपरिषदेला मदत करत निधी दिला. त्याचे आभार मानण्यासाठी प्रसाद कांबळी यांच्यासह नाट्यपरिषदेचे पदाधिकारी राष्ट्रवादी वेल्फेअर फंडासंबंधी असलेल्या पत्रकार परिषदेला गेले होते. त्यावेळी नाट्यपरिषदेचे शरद पोंक्षे, संतोष काणेकर, दिगंबर प्रभू, अविनाश नारकर, ऐश्वर्या नारकर, रत्नकांत जगताप आदी मंडळींनी सुनील तटकरे यांची भेट घेऊन विधान परिषदेवर रा्ष्ट्रवादी मार्फत प्रसाद कांबळी यांना संधी देण्याची शिफारस करण्यात आली. याबाबत दिगंबर प्रभू यांनीही दुजोरा दिला. यावर बोलताना ते म्हणाले, 'गेल्या अनेक वर्षापासून नाट्यक्षेत्रातून एकही चेहरा विधानपरिषदेवर गेलेला नाही. अशावेळी ही चांगली संधी आहे. म्हणूनच प्रसादच्या नावाची शिफारस करण्यात आली.'

अर्थात सुनील तटकरे यांच्याशी जेव्हा ही बातचीत झाली तेव्हा प्रसाद कांबळी तिथे नसल्याचंही उपस्थितांपैकी एकाने सांगितलं. त्यावेळी राष्ट्रवादीचे नेते जयंत पाटील यांना भेटण्यासाठी ते बाहेर गेले असताना ही शिफारस झाली. प्रसाद कांबळी हे मच्छिंद्र कांबळी यांचे पुत्र. मच्छिंद्र कांबळी यांच्यानंतर भद्रकाली या संस्थेची सूत्रं त्यांनी आपल्या हाती घेतली. आणि प्रयोगशील निर्माता म्हणून आपला लौकिक कमावला. तरूण वयात ते निर्माता संघाचे अध्यक्ष झाले. शिवाय, दोन वर्षांपूर्वी ते नाट्यपरिषदेच्या अध्यक्षपदी विराजमान झाले.