फरहान अख्तरला 40 कोटी तर दूर, एक पैसाही देणार नाही; ‘डॉन 3’ प्रकरणात रणवीर सिंहचा पलटवार, म्हणाला...
या बैठकीत रणवीरने आपण निर्मात्यांकडून एक पैसाही घेतलेला नसल्यामुळे नुकसानभरपाईसाठी जबाबदार नसल्याचं स्पष्ट केलं.
Ranveer Singh Farhan Akhtar: ‘डॉन 3’मधून बाहेर पडल्यापासून रणवीर सिंह आणि फरहान अख्तर यांच्या एक्सेल एंटरटेनमेंटमध्ये 40 कोटी रुपयांच्या भरपाईवरून वाद सुरू असल्याच्या चर्चा रंगल्या आहेत. प्री-प्रोडक्शनवर मोठी रक्कम खर्च झाल्यानंतर रणवीरने चित्रपटातून माघार घेतल्याचा दावा करत निर्मात्यांनी 40 कोटींची भरपाई मागितल्याचं म्हटलं जात होतं. मात्र आता रणवीर सिंहने या मागणीवर स्पष्ट भूमिका मांडली आहे. रणवीरने सांगितलं की, अशा प्रकरणांमध्ये कुणावर कुणाचं कर्ज नसतं. बॉलिवूडमध्ये अनेकदा चित्रपटांची घोषणा होते, तयारीही सुरू होते; पण विविध कारणांमुळे प्रोजेक्ट पुढे सरकत नाहीत किंवा थंड बस्त्यात बांधले जातात. अशा वेळी कोणालाही नुकसानभरपाई दिली जात नाही.
संजय लीला भंसालींचं उदाहरण देत रणवीरची भूमिका
आपली बाजू मांडताना रणवीरने संजय लीला भंसालींच्या ‘बैजू बावरा’ चित्रपटाचा उल्लेख केला. या चित्रपटासाठी आपण जवळपास वर्षभर तयारी केली होती. मात्र नंतर भंसालींनी ‘लव्ह अँड वॉर’वर काम सुरू केलं आणि ‘बैजू बावरा’ पुढे गेला नाही. तरीदेखील आपण भंसालींकडून कोणतीही भरपाई मागितली नाही, असं रणवीरने सांगितलं. दोन्ही पक्षांतील वाद मिटवण्यासाठी प्रोड्यूसर्स गिल्ड ऑफ इंडियामध्ये बंद दाराआड बैठकही झाल्याचं समोर आलं आहे. या बैठकीत रणवीरने आपण निर्मात्यांकडून एक पैसाही घेतलेला नसल्यामुळे नुकसानभरपाईसाठी जबाबदार नसल्याचं स्पष्ट केलं.
शाहरुख खानचाही केला उल्लेख
रिपोर्टनुसार, रणवीरने बैठकीत शाहरुख खानचाही उल्लेख केला. ‘डॉन 3’साठी शाहरुखशीही संपर्क साधण्यात आला होता. त्यांनी होकार दिला असता, तर आपल्याला तात्काळ रिप्लेस केलं गेलं असतं, असं रणवीरचं म्हणणं होतं. याशिवाय रणवीरने एक्सेल एंटरटेनमेंटवर गैरव्यावसायिक वागणुकीचा आरोप करत ‘डॉन 3’बाबत गांभीर्य नसल्याचं म्हटलं. अंतिम स्क्रिप्ट तयार नव्हती आणि दिग्दर्शक फीडबॅकसाठीही उपलब्ध नव्हते, असा दावाही त्याने केला. इतकंच नव्हे तर या भूमिकेसाठी ऋतिक रोशनशीही संपर्क साधण्याचा प्रयत्न झाला होता. मात्र ‘धुरंधर’ सुपरहिट ठरल्यानंतरच पुन्हा आपल्याशी संपर्क साधण्यात आल्याचा आरोप रणवीरने केला आहे.
महत्त्वाच्या बातम्या
