Marathi Movie Bhushan Manjule : 'रील स्टार' चित्रपटात मुख्य अभिनेता म्हणून झळकणार फ्रेश चेहरा; नागराज मंजुळेसोबत आहे खास कनेक्शन
Marathi Movie Bhushan Manjule : या चित्रपटात आता मुख्य अभिनेता म्हणून नवीन चेहरा झळकणार आहे. या नव्या हिरोचे दिग्दर्शक नागराज मंजुळेसोबत खास नातं आहे.
Marathi Movie Bhushan Manjule : मराठी सिनेसृष्टीत वेगवेगळ्या विषयांवरील चित्रपटांची निर्मिती होत असते. काही चित्रपट हे पूर्णपणे मनोरंजन करणारी विनोदी धाटणीचे असतात. तर, काही मनोरंजनासोबतच प्रबोधन करणारेही असतात. समाजातील वास्तव चित्र दाखवणाऱ्या चित्रपटाचे चित्रीकरण सध्या सुरू आहे. या चित्रपटात आता मुख्य अभिनेता म्हणून नवीन चेहरा झळकणार आहे. या नव्या हिरोचे दिग्दर्शक नागराज मंजुळेसोबत (Nagraj Manjule) खास नातं आहे.
'रीलस्टार' या आगामी मराठी चित्रपटाच्या चित्रीकरणाचे दुसरे शेड्यूल सध्या सुरू आहे. या चित्रपटात आजवर काही गाजलेल्या चित्रपटांमध्ये महत्त्वपूर्ण व्यक्तिरेखा साकारणारा भूषण हा मुख्य अभिनेत्याची भूमिका साकारणार आहे. अभिनेता भूषण मंजुळे (Bhushan Manjule) हा सुप्रसिद्ध दिग्दर्शक-अभिनेते नागराज मंजुळे यांचा भाऊ आहे. 'रीलस्टार'ची निर्मिती जे 5 एन्टरटेन्मेंट आणि इनिशिएटिव्ह फिल्म या बॅनर्सखाली करण्यात येत आहे. मराठीसह हिंदीतही रिलीज झालेल्या मल्टिस्टारर 'अन्य' या बहुचर्चित चित्रपटाचे दिग्दर्शक सिम्मी जोसेफ आणि रॅाबिन वर्गिस 'रीलस्टार'चे दिग्दर्शन करीत आहेत. 'रीलस्टार'च्या माध्यमातून एक वेगळा विषय हाताळण्याचं शिवधनुष्य उचलण्यात आले आहे. अशा महत्त्वपूर्ण चित्रपटात नायकाची भूमिका साकारण्याची संधी भूषण मंजुळेला मिळाली आहे.
भूषणने यापूर्वी 'फँड्री', 'सैराट', 'कारखानिसांची वारी', 'घर बंदूक बिर्याणी' या मराठी चित्रपटांसोबतच 'झुंड' या हिंदी चित्रपटात सहाय्यक अभिनेत्याची व्यक्तिरेखा साकारली आहे. आता, 'रीलस्टार'च्या निमित्ताने तो प्रथमच मुख्य भूमिकेत दिसणार आहे. आजवर भूषणने साकारलेल्या व्यक्तिरेखांचं नेहमीच कौतुक करण्यात आलं आहे. त्यामुळे 'रीलस्टार'मधील भूमिकाही प्रेक्षकांच्या अपेक्षा असणार आहेत. या चित्रपटासाठी भूषण कसून मेहनत घेत असून, आपल्या व्यक्तीरेखेतील बारकावे कॅमेऱ्यासमोर सादर करण्यासाठी सर्वतोपरी अभ्यास करत आहे. भूषणच्या निवडीबाबत सिम्मी जोसेफ म्हणाले की, आम्हाला नायकाच्या भूमिकेसाठी एक फ्रेश चेहरा हवा होता, मात्र हा प्रेक्षकांना नवखाही वाटता कामा नये. भूषणने आजवर बऱ्याच चित्रपटांमध्ये काम केलं असल्यानं प्रेक्षकांना तो ठाऊक आहे. त्याची अभिनयशैली उत्तम असून, या चित्रपटातील नायकाला तो व्यवस्थित न्याय देऊ शकेल याची खात्री असल्याने भूषणची निवड केली गेली असल्याचे सिम्मी यांनी सांगितले. एका वेगळ्या धाटणीचं कथानक असलेल्या चित्रपटाद्वारे नायकाच्या रूपात रसिकांसमोर येण्याची संधी मिळाल्याने त्याने 'रीलस्टार'ची आॅफर आनंदानं स्वीकारली. यासाठी सध्या तो कसून मेहनत घेत असल्याचेही ते म्हणाले.
'रीलस्टार'ची पटकथा-संवादलेखन रॉबिन वर्गीस आणि सुधीर कुलकर्णी यांनी केलं आहे. भूषणसोबत यात उर्मिला जगताप, प्रसाद ओक, रुचिरा जाधव, मिलिंद शिंदे, स्वप्नील राजशेखर, सुहास जोशी, विजय पाटकर, कैलास वाघमारे, महेश सुभेदार, शिवाजी पाटने, महेंद्र पाटील, दीपक पांडे, गणेश रेवडेकर, अभिनव पाटेकर आदी कलाकार आहेत.
बालकलाकार अर्जुन गायकर, तनिष्का म्हाडसे यांनी 'रीलस्टार'मध्ये साकारलेल्या भूमिकाही महत्त्वाच्या आहेत.
सिनेमॅटोग्राफर शिनोब यांनी सिनेमॅटोग्राफी, तर राहूल शर्मा यांनी प्रॉडक्शन डिझाईन केलं आहे. महेंद्र पाटील या चित्रपटाचे क्रिएटिव्ह प्रोड्युसर तसेच नंदू आचरेकर सहदिग्दर्शक आहेत. गुरु ठाकूर, मंदार चोळकर व प्रशांत जामदार यांनी लिहिलेल्या गीतांना संगीतकार विनू थॅामस यांनी संगीतबद्ध केले आहे. रंगभूषा भागवत सोनावणे यांनी केली असून, वेशभूषा राणी वानखडे यांनी केली आहे.
महत्त्वाच्या बातम्या
ट्रेंडिंग न्यूज
and tablets
