गौतमीचा प्रवास कसा सुरू झाला? पहिला स्टेज परफॉर्मेन्स कुठे केला? सुरूवातीला किती पेमेंट मिळालं?
Gautami Patil Shares Childhood Memories and Career Challenges: गौतमी पाटीलचा प्रवास आर्थिक आणि वैयक्तिक संघर्षातून सुरू झाला. अकलूज लावणी महोत्सवात तिने बॅकडान्सर म्हणून पहिला परफॉर्मन्स केला.
Gautami Patil Opens Up About Her Struggle: थेट प्रश्नांना बिनधास्त उत्तरं देण्यासाठी गौतमी पाटीलने नुकतंच एबीपी माझाच्या कॉफी विथ कौशिक या पॉडकास्ट शोमध्ये हजेरी लावली. या शोमध्ये तिनं व्हॅलेन्टाईनपासून बालपणीच्या आठवणींना उजाळा दिला. या शोमध्ये तिनं आपली राजकीय बाजूही स्पष्ट केली. आज प्रकाशझोतात येणार्या गौतमीचा प्रवास नेमका कसा सुरू झाला? तिनं डान्सिंग क्षेत्रात का पाऊल ठेवलं? असे अनेक प्रश्न तिला विचारण्यात येतात. या प्रश्नांवर गौतमी पाटीलनं स्पष्ट शब्दांत उत्तरे दिले. तसेच बालपणीच्या आठवणींनाही उजाळा दिला.
करिअरच्या प्रवासाबाबत गौतमी म्हणते, "आई आणि मी इथे आलो. वडील पुन्हा गावाकडे गेले. आम्ही गावी न जाण्याचा निर्णय घेतला. आईने बरेच जॉब केले. आईची एक मैत्रिण झाली होती. तिनं तिच्या मैत्रिणीला, माझ्या पोरीला नृत्याची आवड असल्याचं सांगितलं. मला आईनं डान्स क्लास लावून दिला. आईच्या मैत्रिणीकडून मला कॉन्टेक्ट मिळाला. मी महेंद्र सरांकडे गेले. अकलूज लावणी महोत्सव हा माझा पहिला कार्यक्रम होता. मी तेव्हा बॅकडान्सर होते. मला घुंगरूंबाबतही माहित नव्हते. तो माझा पहिला स्टेज परफॉर्मन्स होता. मी तेव्हा खूप चुकले होते. नंतर शिकले. त्यानंतर माझा प्रवास सुरू झाला", असं गौतमी म्हणाली.
"सुरूवातीला माझं 500 रूपये पेमेंट होतं. खरंतर 1000 होते, एका पोराने आमच्याकडून 500 रूपये घेतले होते. मध्यस्थी असल्यामुळे त्यानं आमच्याकडून 500 काढून घेतले. पण 500 घुंगरालाच गेले होते", अशी माहिती गौतमीनं दिली. "मला ज्यांनी ज्यांनी शो मध्ये नेलं आहे. त्यांनी त्यांनी माझ्या माघारी पैसे काढले आहेत. ही गोष्ट मला माहित नव्हती. पण पोरींमध्ये चर्चा करताना याची माहिती मिळायची", असंही गौतमी म्हणाली.
'कदाचित मी या फिल्डमध्ये नसते...'
"माझ्या घरातलं सर्व काही ठीक असतं, तर कदाचित मी या फिल्डमध्ये नसते. वडील असते किंवा आमच्याकडे कुणी लक्ष दिलं असतं, तर मी आज या क्षेत्रात नसते. पण बघायला गेलं तर, हे पण बरं पण झालं, माझ्याकडे कुणी लक्ष दिले नाही", असं गौतमी म्हणाली "अनेक पोरी माझ्याकडे येतात. या क्षेत्रात काम करायचं आहे, असं म्हणतात. पण या क्षेत्रात कोणत्याही मुलीनं येऊ नये, असं मला वाटतं. मी महाराष्ट्रातील लहान मुलींना असं म्हणेन की, तुम्हाला नृत्य शिकायचं असेल तर, डान्स क्लास लावा. तिथे डान्स शिका, पण या क्षेत्रापासून लांब राहा", असं गौतमी पाटील म्हणाली.
महत्त्वाच्या बातम्या
