एक्स्प्लोर

Vishakha Subhedar : विनोदवीर विशाखा सुभेदारचा हास्यजत्रेला रामराम, सोशल मीडियाद्वारे दिली माहिती

Vishakha Subhedar : वेगळ्या धाटणीचं काम करण्यासाठी विशाखा सुभेदारने हास्यजत्रेला रामराम केला आहे.

Written By : एबीपी माझा वेब टीम | Edited By: मंजिरी पोखरकर | Updated at : 01 Apr 2022 05:41 PM (IST)

Vishakha_Subhedar

Vishakha Subhedar : विनोदवीर विशाखा सुभेदारने (Vishakha Subhedar) आता हास्यजत्रेला रामराम केला आहे. सोशल मीडिया पोस्ट शेअर करत तिने चाहत्यांना ही बातमी दिली आहे. वेगळ्या धाटणीचं काम करण्यासाठी तिने हास्यजत्रा सोडण्याचा निर्णय घेतला आहे.

विशाखा सुभेदारने तिच्या विनोदी अभिनयाने 'फू बाई फू', 'बुलेट ट्रेन' आणि 'हास्यजत्रा' या कार्यक्रमांच्या माध्यमातून छोटा पडदा गाजवला आहे. अभिनयासोबत विशाखा आपल्या नृत्यामुळेदेखील ओळखली जाते. विशाखा सुभेदार आणि समीर चौघुले या हास्यजत्रेतील जोडीवर प्रेक्षक मनापासून प्रेम करतात. त्यांचे अनेक व्हिडीओ सोशल मीडियावर व्हायरल होत असतात. आता मात्र ही जोडी प्रेक्षकांच्या भेटीला येणार नाही.

विशाखा सुभेदारच्या 'कुर्रर्रर्रर्र' या नाटकाचे सध्या रंगभूमीवर जोरदार प्रयोग सुरू आहेत. या नाटकाचे लेखन आणि दिग्दर्शन प्रसाद खांडेकरने केले आहे. तर पॅडी कांबडे, प्रसाद खांडेकर, नम्रता संभेराव या नाटकात मुख्य भूमिकेत आहेत. या नाटकाची निर्मातीदेखील विशाखा सुभेदारच आहे.

विशाखा सुभेदारने लिहिले आहे,"जा आता'...असं म्हणण्यापेक्षा 'अर्रर्रर्रर्र' हे ऐकायला छान वाटतं. मंडळी थोडं स्किट व्यतिरिक्त काम करायचा विचार आहे. वेगळ्या धाटणीचं काम करायचं आहे. लवकरच नव्या भूमिकेत दिसेन. माझ्यातल्या अभिनेत्रीच्या आणि नाटक निर्मातीच्या असंच पाठीशी रहा".

विशाखाने पुढे लिहिले आहे,"मंडळी हा प्रवास खरंच सोपा नाही. मी उत्तम विनोदी अभिनेत्री कधीच नव्हते. पण दिलेली भूमिका तडीस नेणे, त्यात काय वेगळं करता येईल याचा शोध घेऊन ते प्रामाणिकपणे सादर करण्याचा प्रयत्न मी करत आले आहे".

संबंधित बातम्या