Laal Singh Chaddha: ‘लाल सिंह चड्ढा’चं सोशल मीडियावर कौतुक, टीकेची झोड उठल्यावर गायक राहुल देशपांडेंनी दिले स्पष्टीकरण!
Laal Singh Chaddha: बॉलिवूड अभिनेता आमिर खानचा (Aamir Khan) ‘लाल सिंह चड्ढा’ (Laal Singh Chaddha) चित्रपट वादाच्या भोवऱ्यात सापडलाय.
Laal Singh Chaddha: बॉलिवूड अभिनेता आमिर खानचा (Aamir Khan) ‘लाल सिंह चड्ढा’ (Laal Singh Chaddha) चित्रपट वादाच्या भोवऱ्यात सापडलाय आणि या चित्रपटाचे कौतुक करणारी पोस्ट लिहिली म्हणून गायक राहुल देशपांडेही (Rahul Deshpande) टीकेचे धनी झाले आहेत. आमिर खानने देशातल्या असंहिष्णुतेचा मुद्दा उपस्थित करून देश सोडण्याबाबतचे वक्तव्य काही वर्षांपूर्वी केले होते. त्यावरून वादही झाला होता. या वादानंतर प्रथमच प्रदर्शित झालेल्या त्याच्या ‘लाल सिंह चड्ढा’ या चित्रपटावर बहिष्कार घालण्याची भाषा काही संघटनांनी केली होती. देशाच्या स्वातंत्र्याचा अमृतमहोत्सव सुरु असताना हा चित्रपट प्रदर्शित होत आहे. या पार्श्वभूमीवर ‘लाल सिंह चढ्ढा’ चित्रपटाला काही संघटनांकडून विरोध होतोय.
‘लाल सिंह चड्ढा’ या चित्रपटाच्या प्रीमियर शोला गायक राहुल देशपांडे यांचे नाव विशेष निमंत्रितांमध्ये सामील होते. त्यानंतर चित्रपटाचं कौतुक करणारी पोस्ट राहुल देशपांडे यांनी लिहिली. त्यावरून टीकेचं लक्ष्य झाल्यानंतर राहुल देशपांडेंनी स्पष्टीकरण दिलंय.
काय म्हणाले राहुल देशपांडे?
नुकताच आमिर खानचा ‘लाल सिंह चड्ढा’ हा चित्रपट चित्रपटगृहांमध्ये प्रदर्शित झाला. रिलीजच्या आधी या चित्रपटाचा विशेष शो आयोजित करण्यात आला होता. या खास शोसाठी गायक राहुल देशपांडे देखील उपस्थित होते. चित्रपट पाहिल्यानंतर त्यांनी आमिर खानसोबत एक फोटो शेअर करत या चित्रपटाचे कौतुक केले. मात्र, त्यानंतर राहुल देशपांडे यांच्यावर सोशल मीडियाच्या माध्यमातून टीका होऊ लागली. यावर आता राहुल देशपांडे यांनी पोस्ट लिहित स्पष्टीकरण दिले आहे.
त्यांनी आपल्या पोस्टमध्ये लिहिले, ‘नमस्कार रसिक मित्रहो!! लालसिंग चढ्ढा ह्या चित्रपटाच्या प्रिमियरच्या वेळेस मी व्यक्त केलेल्या विधानातून पूर्णतः अनपेक्षित संदेश जातोय, असं मला वाटतंय. त्या प्रिमीयरसाठी एक निमंत्रित कलाकार म्हणून, मी त्या चित्रपटासाठी परिश्रम घेतलेल्या पडद्यावरील व पडद्यामागील सर्वांविषयी सद्भावना व्यक्त केल्या. ह्याचा अर्थ चित्रपटातील कलाकारांनी ह्यापूर्वी केलेल्या कुठल्याही कृतीचे वा त्यांनी मांडलेल्या विचारांचे मी समर्थन करतो असे मुळीच नाही. आपणां सर्वांइतकीच भारतीयत्वाची भावना माझ्या मनांतही प्रबळ आहे व मला त्याचा सार्थ अभिमान आहे. म्हणूनच माझ्या विधानाचा विपर्यास करून घेऊ नये, अशी आपणां सर्वांकडे नम्र विनंती! लोभ आहेच. वृद्धिंगत व्हावा!!’
आमिर खानचं कमबॅक
बॉलिवूड अभिनेता आमिर खानचा बहुचर्चित अन् बहु प्रतीक्षित ‘लाल सिंह चड्ढा’ (Laal Singh Chaddha) हा बिग बजेट चित्रपट 11 ऑगस्ट रोजी थिएटरमध्ये प्रदर्शित झाला आहे. बॉलिवूडचा प्रसिद्ध अभिनेता आमिर खान 4 वर्षांच्या दीर्घ कालावधीनंतर ‘लाल सिंह चड्ढा’ या नवीन चित्रपटातून पुनरागमन करत आहे. मात्र, या दरम्यान त्याच्या या चित्रपटावर जोरदार टीका देखील होत आहे. असे, असूनही आमिर खानच्या चाहत्यांना त्याच्या चित्रपटाकडून खूप आशा आहेत.
वाचा इतर बातम्या:
महत्त्वाच्या बातम्या
