Shivpratap Garudjhep : औरंगजेबाच्या भूमिकेत अभिनेते यतीन कार्येकर; 'शिवप्रताप गरुडझेप' पाच ऑक्टोबरला होणार रिलीज
'शिवप्रताप गरुडझेप' (Shivpratap Garudjhep) चित्रपटाचे दिग्दर्शन कार्तिक राजाराम केंढे यांनी केले आहे.
Shivpratap Garudjhep : ‘आग्र्याहून सुटका’ हा छत्रपती शिवाजी महाराजांच्या कारकीर्दीतला अत्यंत महत्त्वाचा आणि थरारक प्रसंग आहेच, छत्रपती शिवाजी महाराजांच्या आयुष्यातल्या अनेक नाटयमय घडामोडींपैकी हा सर्वात महत्त्वपूर्ण कालखंड होता. महाराष्ट्रापासून दूर उत्तरेत आणि तेही औरंगजेबाच्या अमलाखालील प्रदेशात जाऊन सहीसलामत परत येणं ही अशक्यप्राय वाटणारी कामगिरी महाराजांनी फत्ते केली. आग्रा मोहिमेचा हा रोमांचकारी इतिहास 5 ऑक्टोबरला मराठी रुपेरी पडदयावर आणण्यासाठी डॉ. अमोल कोल्हे (Amol Kolhe) सज्ज झाले आहेत. 'जगदंब क्रिएशन' प्रस्तुत करीत असलेल्या डॉ. अमोल रामसिंग कोल्हे निर्मित 'शिवप्रताप गरुडझेप' (Shivpratap Garudjhep) चित्रपटाचे दिग्दर्शन कार्तिक राजाराम केंढे यांनी केले आहे.
मोगल बादशाहांमध्ये औरंगजेब असा एकमेव शासक होऊन गेलाय ज्याने आपल्या चातुर्यपूर्ण रणनीतीनी मोगल साम्राज्याचा विस्तार केला होता. इतिहासातला सर्वात क्रूर कपटी, जुलमी, धर्मांध बादशाहा अशी ओळख असलेल्या औरंगजेबाची भूमिका 'शिवप्रताप गरुडझेप' या चित्रपटात कोण साकारणार? याची उत्सुकता चित्रपटाच्या घोषणेपासून शिगेला पोहोचली होती. त्याचं उत्तर आता मिळालं असून ज्येष्ठ अभिनेते यतीन कार्येकर ही भूमिका साकारणार आहेत.
आपल्या या भूमिकेबद्दल बोलताना यतीन कार्येकर सांगतात, मराठी चित्रपटसृष्टीत उत्तम खलनायकी भूमिका साकारणारे अनेक कलाकार होऊन गेले. या खलनायकांवरही रसिकांनी प्रेम केलंय. याआधीही मालिकेमध्ये मी औरंगजेबाची भूमिका साकारली आहे. पण आता मोठया पडदयावर ती साकारण्याचा वेगळाच आनंद आहे. छत्रपती शिवाजी महाराजांच्या व्यक्तिरेखेसमोर तितक्याच तोलामोलाचा औरंगजेब साकारणं महत्त्वाचं होतं. औरंगजेबाच्या स्वभावातला बेरकीपणा, कावेबाजपणा माझ्या भूमिकेच्या माध्यमातून प्रभावीपणे दाखवण्याचा प्रयत्न केला आहे, त्याला प्रेक्षकांची पसंती मिळेल अशी आशा आहे. 5 ऑक्टोबरला 'शिवप्रताप गरुडझेप' प्रेक्षक दरबारी दाखल होणार आहे.
'बम बम भोले' गाणं प्रदर्शित
या चित्रपटातील बम बभ भोले हे गाणं काही दिवसांपूर्वी रिलीज झालं आहे. अमोल कोल्हे यांनी सोशल मीडियावर 'बम बम भोले' या गाण्याची झलक शेअर करुन कॅप्शनमध्ये लिहिलं, 'वेरूळच्या घृष्णेश्वराला, रायगडच्या जगदीश्वराला नमन करून, आपल्या "शिवप्रताप - गरुडझेप " सिनेमाचं पहिलं गाणं खास आपल्यासाठी! शिवरुद्राला वंदन करून सादर करत आहोत 'शिवप्रताप गरुडझेप' मधलं पहिलं गाणं, 'बम बम भोले'.' या गण्याचे गीतकार ऋषीकेश परांजपे हे आहेत तर गाण्याला संगीत शशांक पोवार यांनी दिले आहे. प्रसिद्ध गायक कैलाश खेर यांनी हे गाणे गायले आहे. अमोल कोल्हे यांनी त्यांच्या युट्यूब चॅनलवर हे संपूर्ण गाणं शेअर केले आहे. अनेक नेटकऱ्यांनी या गाण्याला लाइक आणि कमेंट्स करुन अमोल कोल्हे यांना या आगामी चित्रपटासाठी शुभेच्छा दिल्या आहेत.
वाचा सविस्तर बातमी:
महत्त्वाच्या बातम्या
