Shah Rukh Khan: शाहरुखचे चाहते मेकअप रुममध्ये आठ तास लपले होते; मन्नत बंगल्याच्या मॅनेजरची माहिती
शाहरुख खानचे (Shah Rukh Khan) चाहते त्याला भेटण्यासाठी मन्नत या बंगल्यात गुपचूप घुसले आणि सुमारे आठ तास शाहरुख खानच्या मेकअप रूममध्ये वाट पाहत बसले.
Shah Rukh Khan: बॉलिवूडमधील प्रसिद्ध अभिनेता शाहरुख खानच्या (Shah Rukh Khan) वांद्रे (Bandra) बँडस्टँड येथील मन्नत या बंगल्यामध्ये अवैध पद्धतीनं घुसण्याचा प्रयत्न गेल्या आठवड्यात काही लोकांनी केला. या प्रकरणी गेल्या आठवड्यात दोन व्यक्तींना मुंबई पोलिसांनी अटक केली होती. दोन्ही आरोपी शाहरुख खानला भेटण्यासाठी मन्नत या बंगल्यात गुपचूप घुसले आणि सुमारे 8 तास शाहरुख खानची मेकअप रूममध्ये वाट पाहत बसले.
शाहरुख खानच्या मन्नत बंगल्याची मॅनेजर कॉलीन डिसूझानं पोलिसांना दिलेल्या जबाबात सांगितले की, बंगल्यात काम करणाऱ्या सुरक्षा रक्षकाने 2 फेब्रुवारी रोजी सकाळी 11 वाजता तिला फोन करून दोन लोक बंगल्यात घुसल्याची माहिती दिली. दोन्हीही आरोपी शाहरुखच्या बंगल्यातील तिसर्या मजल्यावर असलेल्या मेकअप रूममध्ये पोहोचले होते आणि रात्री तीन वाजल्यापासून सकाळी साडेदहा वाजेपर्यंत शाहरुख खानची वाट पाहत बसले होते.
एफआयआरनुसार, मन्नतच्या हाऊसकीपिंग स्टाफमध्ये काम करणारा सतीश जेव्हा तिथे साफसफाई करण्यासाठी मेकअप रुममध्ये पोहोचला तेव्हा त्याला हे दोघे तिथे लपलेले दिसले. त्यानंतर सतीशने दोघांनाही तेथून लॉबीमध्ये नेले आणि अचानक या दोघांना तिथे पाहून शाहरुख खान आश्चर्यचकित झाला. त्यानंतर मन्नत बंगल्याचे गार्ड्स आले आणि त्यांनी त्या दोघांना पोलिसांच्या ताब्यात दिले. अटक केलेल्या आरोपींचे नावे पठाण साहिल सलीम खान आणि राम सराफ कुशवाह अशी असून दोघेही गुजरातमधील भरूच येथील रहिवासी आहेत.
वांद्रे पोलीस स्टेशनमधील एका अधिकाऱ्यानं दिलेल्या माहितीनुसार, दोघांचीही तपासणी केली असता काही संशयास्पद आढळले नाही, त्यांच्या कुटुंबीयांनाही माहिती देण्यात आली, त्यानंतर दोघांच्याही कुटुंबीयांनी येऊन त्यांना जामीन मिळवून दिला. दोघांना कोर्टातून 10 हजार रुपयांवर जामीन मिळाला.
शाहरुख खानचे चित्रपट
शाहरुखचा पठाण चित्रपट हा आदित्य चोप्राच्या (Aditya Chopra) स्पाय युनिव्हर्समधील एक चित्रपट आहे. या चित्रपटात शाहरुखसोबतच दीपिका पादुकोण (Deepika Padukone), जॉन अब्राहम (John Abraham), आशुतोष राणा आणि डिंपल कपाडिया या कलाकरांनी मुख्य भूमिका साकारली आहे. हा चित्रपट ब्लॉकबस्टर ठरला आहे. लवकरच शाहरुखचा जवान आणि डंकी हा चित्रपट प्रेक्षकांच्या भेटीस येणार आहे. शाहरुखच्या या चित्रपटांची प्रेक्षक उत्सुकतेने वाट बघत आहेत.
वाचा इतर महत्वाच्या बातम्या:
Shah Rukh Khan : शाहरुखची सुरक्षा धोक्यात; मध्यरात्री भिंत तोडून दोन तरुण शिरले 'मन्नत'मध्ये
महत्त्वाच्या बातम्या
