Laal Singh Chaddha : आमिरच्या 'लाल सिंह चड्ढा'ला ओटीटी रिलीजसाठी खरेदीदार मिळेना; नेटफ्लिक्सकडून करार रद्द

Laal Singh Chaddha : आमिर खानच्या चाहत्यांना लाल सिंह चड्ढा (Laal Singh Chaddha) हा चित्रपट ओटीटीवर बघता येईल की नाही? असा प्रश्न निर्माण झाला आहे.

Laal Singh Chaddha,OTT,netflix

Laal Singh Chaddha :  बॉलिवूडमधील प्रसिद्ध अभिनेता आमिर खानच्या (Aamir Khan) लाल सिंह चड्ढा (Laal Singh Chaddha) या चित्रपटानं बॉक्स ऑफिसवर फारशी कमाई केली नाही. आमिर खानच्या या चित्रपटावर बहिष्कार टाकण्याची मागणी सोशल मीडियावर अनेक नेटकरी करत आहेत. बॉयकॉट लाल सिंह चड्ढा हा ट्रेंड देखील सोशल मीडियावर व्हायरल झाला. याचा परिणाम या चित्रपटाच्या बॉक्स ऑफिस कलेक्शवर झाला. आमिर आणि अभिनेत्री करीना कपूरच्या काही जुन्या वक्तव्यांमुळे या चित्रपटाला बॉयकॉट करण्याचा निर्णय काही नेटकऱ्यांनी घेतला होता. आमिरचे काही चाहते हा चित्रपट ओटीटीवर रिलीज होण्याची वाट बघत होते. पण आता त्याच्या चाहत्यांना हा चित्रपट ओटीटीवर बघता येईल की नाही? असा प्रश्न निर्माण झाला आहे. लाल सिंह चड्ढा या चित्रपटाच्या ओटीटी रिलीजसाठी खरेदीदार मिळत नाहीये. प्रसिद्ध ओटीटी प्लॅटफॉर्म नेटफ्लिक्सनं देखील हा चित्रपट रिलीज करण्यास नकार दिला आहे. 

सध्या प्रेक्षक थिएटरपेक्षा ओटीटीवर चित्रपट पाहण्यास प्राधान्य देतात. चित्रपटाला जर चित्रपटगृहात प्रेक्षकांचा प्रतिसाद मिळाला नाही तरी हे चित्रपट ओटीटीवर प्रेक्षक बघतात. काही दिवसांपूर्वी अभिनेत्री तापसी पन्नूचा शबास मिथू हा चित्रपट रिलीज झाला होता. या चित्रपटानं बॉक्स ऑफिसवर फारशी कमाई केली नाही पण  नेटफ्लिक्सवर रिलीज झालेल्यानंतर हा चित्रपट भारतात पहिल्या क्रमांकावर ट्रेंड झाला. सध्या लाल सिंह चड्ढा आणि अक्षयच्या रक्षा बंधन या चित्रपटाला बॉयकॉट ट्रेंडचा फटका बसताना दिसत आहे. बॉक्स ऑफिसवर फ्लॉप ठरलेल्या लाल सिंह चड्ढाला आता ओटीटी रिलीजसाठी एकही खरेदीदार मिळत नाहीये. 

नेटफ्लिक्सनं रद्द केला करार
एका वेब साईटनं दिलेल्या माहितीनुसार, नेटफ्लिक्सनं लाल सिंह चड्ढा या चित्रपटाच्या निर्मात्यांसोबत केलेला करार रद्द केला आहे. आमिर खान आणि वायकॉम 18 हे चित्रपटाच्या डिजीटल राइट्ससाठी 200 कोटींची मागणी करत होते. पण लाल सिंह चड्ढा बॉक्स ऑफिसवर फ्लॉप ठरल्यानं नेटफ्लिक्सनं हा चित्रपट त्यांच्या प्लॅटफॉर्मवर रिलीज करण्यास नकार दिला आहे. आता प्रश्न हा निर्माण होतो की, बॉक्स ऑफिसवर फ्लॉप ठरलेला हा चित्रपट ओटीटीवर कोण बघेल? याच कारणामुळे सध्या या चित्रपटाला ओटीटी रिलीजसाठी खरेदीदार मिळत नाहीये. 

लाल सिंह चड्ढा हा चित्रपट फॉरेस्ट गंप या हॉलिवूड चित्रपटाचा रिमेक असणार आहे. हा चित्रपट 11 ऑगस्ट 2022 रोजी रिलीज झाला आहे. आमिर खान प्रोडक्शन्स, किरण राव, वायकॉम 18 स्टडियोज यांनी या चित्रपटाची निर्मिती केली आहे. या चित्रपटाने पहिल्या दिवशी 11.70 कोटी, दुसऱ्या दिवशी 7.26 कोटी आणि तिसऱ्या दिवशी 8.5 कोटींचा व्यवसाय केला होता.