एक्स्प्लोर

निवडणूक २०२४ एक्झिट पोल

(Source: Dainik Bhaskar)

यापुढे पाक कलाकारांना सिनेमात घेणार नाही : करण जोहर

By : एबीपी माझा वेब टीम | Updated at : 18 Oct 2016 07:00 PM (IST)

मुंबई: ऐ दिल है मुश्किल या आगामी सिनेमाचा निर्माता-दिग्दर्शक करण जोहरने पाकिस्तानी कलाकारांबाबत अखेर मौन सोडलं आहे. "ऐ दिल है मुश्किल हा सिनेमा शूट केला तेव्हाची परिस्थिती वेगळी होती आणि आताची परिस्थिती वेगळी आहे. त्यामुळे ऐ दिल है मुश्किल हा सिनेमा प्रदर्शित होऊ द्यावा, यापुढे पाकिस्तानी कलाकारांना घेऊन सिनेमा करणार नाही", असं करण जोहरने म्हटलं आहे. उरी हल्ल्यानंतर भारतात पाकिस्तानविरोधी वातावरण आहे. त्यामुळेच महाराष्ट्र नवनिर्माण सेनेने पाकिस्तानी कलाकार असलेले "ऐ दिल है मुश्किल" आणि रईस हे सिनेमे प्रदर्शित न करण्याचा इशारा दिला आहे. तसंच पाकिस्तानी कलाकारांना भारत सोडण्यासही सांगितलं होतं. त्या पार्श्वभूमीवर करण जोहरने आपली पहिली प्रतिक्रिया दिली. "गेल्या काही दिवसांपासून मी शांत का आहे असं विचारलं जात होतं. मात्र मला हेच सांगायचं होतं. देशापेक्षा मोठं काहीही नाही. गेल्या वर्षी सप्टेंबर ते डिसेंबर या दरम्यान ऐ दिल है मुश्किल सिनेमाचं शूटिंग झालं. मात्र त्यावेळी भारत-पाकिस्तानदरम्यान शांततेसाठी सरकारचे प्रयत्न सुरु होते. शांततेसाठी आपल्या सरकारने खूप प्रयत्न केले. मला माझ्या देशभावनेचा आदर होता आणि कायम राहील", असं करण जोहरने म्हटलं आहे. मी दहशतवाद्यांचा निषेध करतो. मला जवानांचा आदर आहे. माझ्यासाठी माझा देश पहिल्यांदा आहे. मात्र सिनेमावर बंदी घालणं, हा माझ्या सर्व क्रू मेंबरवर अन्याय आहे, असंही करण जोहरने म्हटलं आहे. मला राष्ट्रद्रोही म्हटलं गेलं. त्याचं खूप दु:ख झालं, असंही करणने नमूद केलं. माझ्यासाठी माझा देश सर्वस्वी आहे. यापुढे कोणत्याही पाकिस्तानी कलाकाराला माझ्या सिनेमात स्थान नसेल, असं करण जोहरने म्हटलं आहे. मनसेचा इशारा ‘ऐ दिल है मुश्किल’ या करण जोहरच्या सिनेमात पाकिस्तानी अभिनेता फवाद खान याची भूमिका आहे. तर शाहरुख खानच्या रईस या सिनेमाता पाकिस्तानी अभिनेत्री माहिरा खानची भूमिका आहे. पाकिस्तानी कलाकारांना आपल्या सिनेमात घेऊ नये, यासाठी मनसेने आवाज उठवला होता. त्यानंतर फवाद खान आणि इतर पाकिस्तानी कलाकारांनी भारत सोडला. मात्र, करण जोहरच्या सिनेमात फवादची भूमिका असल्याने तो वादात सापडला. सिंगल स्क्रिन थिएटर असोसिएशन आणि सिनेमा ओनर असोसिएशनने करण जोहरचा सिनेमा थिएटरमध्ये न प्रदर्शित करण्याचा निर्णय घेतला आहे. त्यामुळे 28 ऑक्टोबरला प्रदर्शित होणाऱ्या या सिनेमासमोरील अडचणी आणखी वाढल्या आहेत.